Koj puas tab tom xauj ib lub tsev lossis chav tsev nyob hauv Kansas City? Lub nroog lav tias koj muaj qee txoj cai. Nov yog tej yam uas koj yuav tsum paub.

Hauv xyoo 2019, Pawg Sab Laj Nroog tau tso cai rau tsab cai Tenant Bill of Rights ( Tsab Cai Txog Cov Cai Ntawm Neeg Xauj Tsev), uas KC Tenants tau tawm suab thov kom muaj.

Yog tias koj xav paub tag nrho cov lus qhia kom ntxaws, qhov no yog daim Bill of Rights tag nrho, thiab qhov no yog lub nroog txoj cai ntev dua uas hais txog kev sib raug zoo ntawm neeg xauj tsev thiab tswv tsev, tab sis ntawm no yog cov ntsiab lus tseem ceeb ntawm xya txoj cai rau cov neeg xauj tsev:

  • Txoj cai muaj tsev nyob kom nyab xeeb thiab nkag tau yooj yim. Qhov no suav nrog cov yam xws li txoj cai muaj cua sov thiab dej kub, thiab kev kho kom haum yog tias koj muaj kev tsis taus.
  • Txoj cai muaj kev ywj pheej kom tsis txhob raug kev ntxub ntxaug thiab kev ua pauj rov qab. Qhov no txhais tau tias ib tug tswv tsev tsis tuaj yeem hem tias yuav ntiab koj tawm lossis ua pauj rov qab rau koj hauv lwm txoj kev yog tias koj tsis txaus siab tawm suab hais lossis thov kom kho vaj tse.
  • Txoj cai tau txais nyiaj them rov qab kom ncaj ncees thiab kev daws teeb meem kom rov zoo li qub. Qhov no txhais tau tias koj tus tswv tsev yuav quab yuam ntiab koj tawm hauv koj lub tsev tsis tau yog tias tsis ua raws li kev cai lij choj hauv tsev hais plaub, thiab lawv yuav txiav koj cov nyiaj luam tsev yam tsis raws cai tsis tau.
  • Txoj cai sib koom ua pab ua pawg thiab sib tham Khom nqe. Qhov no txhais tau tias tus tswv tsev yuav ua phem rov qab rau koj los ntawm kev tsa koj tus nqi xauj tsev lossis hem tias yuav raws koj tawm tsis tau yog tias koj koom nrog lossis tsim ib lub koom haum neeg xauj tsev. Nws kuj txhais tau hais tias yog koj thov kom kho ib yam dab tsi uas tsim nyog yuav tsum kho thiab koj tus tswv tsev tsis kho rau hauv lub sijhawm teem tseg, koj tuaj yeem kho koj tus kheej thiab txiav tus nqi ntawd tawm ntawm koj tus nqi xauj tsev.
  • Txoj cai tau tsev nyob uas nyab xeeb, noj qab nyob zoo, nkag tau yooj yim thiab yog tsev nyob nqi pheej yig tiag tiag. Qhov no txhais tau tias thaum koj tsiv mus nyob hauv ib lub tsev xauj, tus tswv tsev yuav tsum qhia koj paub txog cov teeb meem yav dhau los ntawm lub tsev thiab kwv yees tias cov nqi dej thiab hluav taws xob yuav raug nqi npaum li cas. Nws kuj txhais tau tias Kansas City yuav pab koj nrhiav chaw nyob tshiab yog tias cov xwm txheej hauv koj lub tsev xauj tsis nyab xeeb.
  • Txoj cai muaj kev tsis pub leej twg paub thiab kev txiav txim siab rau tus kheej. Qhov no txhais tau tias tus tswv tsev yuav tsum ceeb toom qhia koj ua ntej lawv nkag mus hauv koj lub tsev xauj, thiab koj muaj cai sib txuas lus ncaj qha nrog koj tus tswv tsev uas yog tus muaj lub tsev ntawd lossis tus saib xyuas lub tsev.
  • Txoj cai tau txais kev ncaj ncees thiab kev saib xyuas uas ncaj ncees thiab sib luag raws li txoj cai. Qhov no txhais tau tias koj tsuas raug ntiab tawm tsev tau los ntawm kev txiav txim hauv tsev hais plaub raws li txoj cai xwb, thiab koj muaj cai pom daim Ntawv Teev Txoj Cai rau Neeg Xauj Tsev (Tenant Bill of Rights) no thaum koj tsiv mus nyob rau ib qho chaw tshiab.

Tag nrho cov no mloog mas zoo heev, puas yog? Tab sis muaj ib qho teeb meem me me uas peb tau tshaj tawm ua ntej hauv xyoo no. Kom cov cai ntawd muaj nuj nqis tiag rau cov neeg xauj tsev, lub nroog yuav tsum tswj kom ua raws li cov cai ntawd.

NCE NYIAJ PAB RAU COV NEEG XAUJ TSEV

Hauv kev siv nyiaj txiag xyoo no, Kansas City tau muab ntau tshaj ib lab daus las rau nws lub Office of the Tenant (OTA), uas muaj hauj lwm teb cov neeg xauj tsev cov lus tsis txaus siab thiab tiv thaiv cov cai no.

Qhov ntawd yog ze li peb npaug ntawm thawj $300,000 uas lub chaw ua hauj lwm tau pib, uas txaus them rau ib tug neeg pab tawm suab xwb uas muaj luag num teb txhua yam kev tsis txaus siab ntawm cov neeg xauj tsev thoob plaws hauv lub nroog.

“PEB TSIS ZOO DUA LI THAUM PEB XYOO DHAU LOS LAWM”

Cov nyiaj pab ntxiv no yuav tsum ua rau lub nroog muaj peev xwm ua tiav nws lub luag hauj lwm los tiv thaiv cov neeg xauj tsev cov cai no dua qub, tab sis qee cov thawj coj uas tau nqua hu kom tsim muaj Tsab Cai Tiv Thaiv Neeg Xauj Tsev cov Cai (Tenant Bill of Rights) hais tias qhov ntawd tseem tsis tau muaj tseeb tag nrho li, thiab kev tswj siv txoj cai tseem tsis tau txaus.

Jonathan Duncan, ib tug ntawm cov thawj coj nrog KC Tenants, tau hais tias lub chaw ua hauj lwm tseem tsis tau ua hauj lwm raws li qhov nws yuav tsum ua, txawm tias tau muaj nyiaj ntxiv lawm. Nws hais tias KC Tenants muaj cov tswv cuab tau hu xov tooj rau OTA kom nrhiav kev pab tab sis tsis tau txais kev pab li.

Txog tam sim no, Duncan tau hais tias, “Nws yog ib qho kev cog lus uas tsis tau ua kom tiav.”

COV KEV PAB THIab LEEJ TWG YUAV HU RAU

Yog tias koj yog ib tug neeg xauj tsev thiab xav tau kev pab txog nqi xauj tsev, kev siv koj cov cai lossis kev daws teeb meem nyuaj nrog koj tus tswv tsev, muaj cov neeg uas koj hu tau.

Hauv Kansas City, cov neeg xauj tsev tuaj yeem tiv tauj Health Department’s Healthy Homes Inspection Program ntawm 816-513-6347 lossis xa email mus rau Healthy.Homes@kcmo.org kom sau ntawv qhia kev tsis txaus siab. Koj kuj tuaj yeem hu 311, uas yog lub nroog tus xov tooj ceev rau kev qhia txog cov teeb meem.

KC Tenants, lub koom haum neeg xauj tsev thoob nroog, kuj muab cov kev pab rau cov neeg xauj tsev uas xav tau kev pab. Tus xov tooj ceev yog 816-533-5435.

Koj hu tau rau Legal Aid of Western Missouri ntawm tus xov tooj 816-474-6750, Heartland Center for Jobs & Freedom ntawm tus xov tooj 816-278-1344 thiab UMKC School of Law Tenant Assistance Initiative ntawm tus xov tooj 816-343-8709.