Hnub Tuesday, ib pawg neeg saib xyuas hauv Pawg Sab Laj Nroog Kansas City tau ncua cov txoj cai hauv nroog uas yuav cais $20 million rau tus thawj tswj nroog kom pib ua cov kev cog lus nrog pab pawg Royals txog pab pawg lub tshav puam ntaus pob baseball tshiab hauv plawv nroog.
Txawm tias muaj kev ncua, tus Tswv Nroog Quinton Lucas hais tias lub nroog muaj phiaj xwm yuav ua kom muaj kev vam meej sai ntawm lub tshav puam ua si uas kwv yees raug nqi $1.9 billion.
Tus tswv cuab hauv Pawg Sab Laj Nroog Johnathan Duncan xav tias cov thawj coj hauv nroog txhob txwm kub siab xav nkag mus ua ib qho kev cog lus kom sai. Nws tau hais rau KCUR's Up To Date tias nws muaj kev txhawj xeeb txog seb nws yuav yog hom kev cog lus zoo li cas rau cov neeg them se.
"(Cov neeg nyob hauv Kansas City) xav kom paub tseeb tias peb muaj ib qho kev cog lus zoo mus rau yav tom ntej. Lawv xav khaws pab pawg Royals tseg. Tiag mas, kuv kuj xav khaws pab pawg Royals tseg, tab sis kuv xav kom paub tseeb tias peb tab tom xyuas kom peb lub nroog tsis muaj qhov poob qis," nws hais.
"Peb yuav muaj cov teeb meem txog kev nyab xeeb rau pej xeem ntau ntxiv. Peb tseem muaj ntau yam teeb meem txog cov neeg tsis muaj tsev nyob uas yuav tsum tau saib xyuas, thiab Washington Square Park twb tau ua ib lub chaw pw ntawm cov neeg tsis muaj tsev nyob los tau ntau xyoo lawm. Yog li, peb yuav ua li cas kom paub tseeb tias peb muaj nyiaj tau los txaus coj los saib xyuas cov hauj lwm ntawd? Qhov kev cog lus no tsis muab qhov ntawd."