Johnathan Duncan သ့ၣ်ညါဝဲလၢ ပှၤကမျၢၢ်ဘၣ်သ့ၣ်သ့ၣ် ကသံကွၢ်သမံသမိး အဝဲအတၢ်မ့ၢ်ပှၤ ခဲစၢးစံထံၣ် ကလံၤထံးတခီ နီၢ်ကီၢ်ဧါန့ၣ်လီၤ.
ကီၣ်စ့ၣ်ပှၤဘၣ်မူဘၣ်ဒါအသီတဂၤအံၤ အိၣ်ဆိးဝဲဖဲ ကီၢ်ရ့ၣ် ၆ အကလံၤစိးတခီ, ဒ်အဘူးဒီး Brookside န့ၢ်ဒံး Martin City န့ၣ်လီၤ. တၢ်အံၤမ့ၢ်အဝဲအတၢ်ဃုထၢပြၢလိာ်သး အဆိကတၢၢ်တဘျီ, ဒီးအဝဲတမၤနၢၤဝဲ တၢ်ဖးဟ့ၣ်ဟီၣ်ကဝီၤဖိ လၢအအိၣ်ဖဲ Bannister Road အကလံၤထံးတခီနီတဖျၢၣ်ဘၣ်.
အဃိ, The Telegraph ဟ့ၣ်လီၤဝဲ Duncan တၢ်ခွဲးတၢ်ယာ် ဒ်သိးအကပာ်ဖျါထီၣ်အသးဂ့ၤဂ့ၤ ဘၣ်ဃးဒီးအဝဲအဂ့ၢ် ဆူပှၤဟီၣ်ကဝီၤဖိလၢအဖးဟ့ၣ်တၢ်တဖၣ်အအိၣ်န့ၣ်လီၤ.
အဝဲအဲၣ်ဒိးမၤ တၢ်သံကွၢ်စံးဆၢအံၤ ဖဲလဲၣ်.
Duncan စံးဝဲလၢ “ဖဲ Charlie Hooper’s” န့ၣ်လီၤ.
အဝဲတမ့ၢ် ပှၤမၤထံရူၢ်ကီၢ်သဲးဖိ လၢအကျိာ်လီၤပလိာ် ဒီးပှဲၤဒီးတၢ်ကူၣ်သ့ဘၣ်. အဝဲတကျဲးစၢးဒ်သိးကကဲထီၣ်ဒ်န့ၣ်ဘၣ်, ဒီးတအဲၣ်ဒိးကဲထီၣ်ဒ်န့ၣ်စ့ၢ်ကီးဘၣ်. ဖဲန့ၣ်အဝဲမၤနၢၤကွံာ် အပှၤထီဒါတဂၤ လၢအအိၣ်ဒီးထံရူၢ်ကီၢ်သဲး အတၢ်လဲၤခီဖျိ ပှဲၤဒီးတၢ်ကူၣ်သ့အနံၣ် ၂၄ နံၣ်န့ၣ်လီၤ.
ခဲအံၤ ဃုာ်ဒီးတၢ်မၤနၢၤလၢ တၢ်တမုၢ်လၢ်ပာ်အီၤဘၣ်အံၤအဃိ, ခဲစၢးစံထံၣ် ဒိးန့ၢ်ဘၣ် တၢ်အဆိကတၢၢ်တမံၤလၢအမ့ၢ်– ဝ့ၢ်ကီၣ်စ့ၣ်ပှၤဘၣ်မူဘၣ်ဒါတဂၤ လၢအတ့ၢ်လီၤတ့ၢ်ပဲတြီဖဲကီၢ်အံၣ်ရၣ်အပူၤ, ထၢနုာ်တ့ၢ်ကျိလၢ အကိာ်ပူၤဖဲအဟဲက့ၤတုၤလၢဟံၣ်အခါ, ဟးတြီမၤတံာ်တာ်တ့ၢ် တၢ်စံၣ်ညီၣ်ဟီထီၣ်ကွံာ်ပှၤလၢဟံၣ်ပူၤ လၢအသးဒၣ်ဝဲ ဒီးနုာ်လီၤမၤထံရူၢ်ကီၢ်သဲး ခီဖျိလၢ ဟံၣ်လ့ၣ်တၢ်လီၢ် (trailer park) တခါအဃိန့ၣ်လီၤ.
အဝဲတဘူးဒီး ဝ့ၢ်အံၤအထံရူၢ်ကီၢ်သဲး တၢ်စိတၢ်ကမီၤအကျိၤအကျဲ နီတစဲးဘၣ်, Duncan ဟဲခီဖျိ ပှၤတဝၢအတၢ်ကရၢကရိတၢ်ဖုံးတၢ်မၤန့ၣ်လီၤ. အဝဲသ့ၣ်ညါလၢ ပှၤတနီၤကိးတၢ်န့ၣ်လၢ “တၢ်ထုးထီၣ်တၢ်သဘံၣ်သဘုၣ်” န့ၣ်လီၤ.
Duncan စံးဝဲလၢ “ယကိးအီၤလၢ တၢ်ကရၢကရိတၢ်လီၤ. ဖဲတၢ်ရဲၣ်ကျဲၤဒုးနဲၣ်တၢ်လၢ အတဂ့ၤဘၣ်ယဂ့ၢ်တဖၣ် စးထီၣ်ဝဲအခါ ယသ့ၣ်ညါလၢ ယကမၤနၢၤတၢ်လီၤ.”
ဒ်အဝဲကိးပသူထီၣ် ဒီးအိၣ်ဆၢထၢၣ်လၢ ပှၤမၤတၢ်ဖိတဖၣ်အဂီၢ်အသိး, Duncan ဒီးအပှၤဆီၣ်ထွဲအီၤလၢ အခိၣ်အနၢ်တဖၣ် လဲၤဒိဝဲပှၤဟံၣ်တြဲၤ အဖျၢၣ် ၈,၅၀၀ ဖဲတၢ်ဃုထၢအတၢ်ဟူးတၢ်ဂဲၤ အဆၢကတီၢ်န့ၣ်လီၤ.
ဒီးဖဲလါယူၤ ၂၀ သီအနံၤ, Duncan လၢအဒိးန့ၢ်ဘၣ် တၢ်ဆီၣ်ထွဲလၢ KC Tenants Power ဒီးကရူၢ်လၢ အအဲၣ်ဒိးဒုးအိၣ်ထီၣ် တၢ်ဆီတလဲလၢအဂ့ၤထီၣ်အဂၤတဖၣ်အအိၣ်န့ၣ်, မၤနၢၤကွံာ်ဝဲ Jackson County အပှၤဘျၢတၢ်သိၣ်တၢ်သီဖိလၢ အမၤတၢ်ဖးယံာ်လံတဂၤ လၢအမ့ၢ် Dan Tarwater လၢတၢ်ဖးဟ့ၣ် ၅၆ မျးကယၤ ဒီး ၄၄ မျးကယၤန့ၣ်လီၤ.
Wilson Vance, လၢအမ့ၢ် KC Tenants အပှၤနဲၣ်ကျဲထံရူၢ်ကီၢ်သဲးတဂၤ, စံးဝဲလၢ Duncan ဟဲဆူ ကရၢလၢအဟူးဂဲၤတၢ်ဂ့ၢ်အံၤ ဒီးဃုဝဲ ပှၤဖှီၣ်ဖိယာ်ဖိ ဒီးပှၤမၤတၢ်ဖိတဖၣ် အပှၤတဝၢ ဒ်သိးကဂဲၤလိာ်န့ၢ်တၢ်လၢ အဝဲသ့ၣ်အဂီၢ်န့ၣ်လီၤ.
Vance စံးဝဲလၢ “အဝဲတသးပ့ၤနီၣ် တၢ်ကဲပှၤဖှီၣ်ဖိယာ်ဖိအသးဘၣ်, တသးပ့ၤနီၣ် တၢ်ဒိၣ်ထီၣ်ဘၣ်ဒ် ပှၤကလုာ်နှၢ်ဖးလၢ ဝ့ၢ်ဖိတဖျၢၣ်အပူၤဘၣ်, ဒီးအဝဲတသးပ့ၤနီၣ် တၢ်လၢအကဲထီၣ်အသးဒီးအီၤ ဖဲအဟဲက့ၤလၢ ကီၢ်အံၣ်ရၣ်အခါန့ၣ် နီတဘျီဘၣ်. ပထံၣ်ဘၣ် တၢ်သးဒိၣ်ထီၣ်လီၤ. ဘၣ်ဆၣ် ပထံၣ်ဘၣ်စ့ၢ်ကီး တၢ်အဲၣ်လၢအယိာ်အထီ လၢပှၤဘူးပှၤတံၢ် ဒီးပှၤတဝၢအဂီၢ် လၢယအဲၣ်ဒိးထံၣ်အီၤလၢ ပှၤမၤထံရူၢ်ကီၢ်သဲးဖိတဂၤ အပူၤန့ၣ်လီၤ. ဖဲ Johnathan ပာ်ဃုာ်လၢ ဝ့ၢ်ကီၣ်စ့ၣ်အပူၤန့ၣ် ဝ့ၢ်ကီၣ်စ့ၣ်ဂ့ၤထီၣ်ဝဲလီၤ.
“အဝဲကဆီတလဲကွံာ် တၢ်အိၣ်သးဒီးတၢ်ဟူးတၢ်ဂဲၤလၢ ဒၢးအဝဲန့ၣ်အပူၤလီၤ.”
တၢ်သူၣ်ထီၣ်တၢ်နာ်န့ၢ်လိာ်သး
Duncan လၢအသးအိၣ် ၃၇ နံၣ်န့ၣ် လဲၤတုၤဆိဖဲ Charlie Hooper’s Brookside Bar & Grille လီၤ. ထံခုၣ်ထံလ့, ဆ့ကၤဝါလၢအပျုာ်ထီၣ်အချိး ဒီး ဖျီၣ်က့ဂျ့အသူလၢအကျဲးစၢၤတဖၣ်လီၤ.
အဝဲမ့ၢ်ပှၤတဂၤလၢ အတၢ်မၤအါဝဲလီၤ. အဝဲတချုးဘၣ်တၢ်မၤတၢ်အၢၣ်လီၤအီလီၤ ဒ်သိးကနုာ်လီၤမူဒါအဂီၢ် ဒံးဘၣ် ဘၣ်ဆၣ် အဝဲနုာ်လီၤမၤတၢ် ဖဲဝ့ၢ်ပဒိၣ်ရူ အတၢ်အိၣ်ဖှိၣ်လၢအအါဝဲတဖၣ်အပူၤ တကးဒံးဘၣ် အဝဲရဲၣ်ကျဲၤတ့ၢ်စ့ၢ်ကီး အတၢ်ဖျီလၢ လါစဲးပတ့ဘၢၣ်အပူၤ ဒီးအတၢ်အဲၣ်သးစၢ်လီၤ.
အဝဲမၤတၢ်ဖဲ VFW ထံကီၢ်ဒီဘ့ၣ် ဝဲၤလီၢ်ခိၣ်သ့ၣ် လၢအမၤတ့ၢ်ဝဲဖးယံာ်အပူၤ မုၢ်နံၤလၢခံကတၢၢ်တနံၤ ဝံၤကွံာ်ဖဲန့ၣ်လီၤ. အတၢ်ရဲၣ်ကျဲၤန့ၣ် မ့ၢ်ဒ်သိးကမၤတၢ်ဒ် ကီၣ်စ့ၣ်ပှၤဘၣ်မူဘၣ်ဒါ လၢဆၢကတီၢ်လၢပှဲၤ တဂၤအသိးလီၤ.
ဘၣ်ဃးဒီး တၢ်လီၤတဲာ်ဖဲ ကလံၤထံး တၢ်ဖးဟ့ၣ်ဟီၣ်ကဝီၤဖိ တဖၣ်န့ၣ် အဝဲစံးဝဲဖဲ Hooper အစီၤနီၢ်ထီအခိၣ်လၢ, “ဖျါလၢ ယကဘၣ်မၤ တၢ်သူၣ်ထီၣ်တၢ်နာ်န့ၢ်လိာ်သး တနီၤလီၤ.”
Blue River Road န့ၣ် ကမ့ၢ်တၢ်လီၢ်တတီၤလၢ ပကစးထီၣ်အီၤသ့လီၤ. ကျဲတဘိအံၤ ဘၣ်တၢ်က့ၤပာ်တံာ်အီၤ အနံၣ်တဖၣ်ညါ ဖဲ Bannister Road အကလံၤထံးတကပၤ မ့ၢ်လၢ ကျဲအဖီခိၣ်တဖၣ် ဟ့ၣ်လီၤတဲာ်လီၤဆူ ထံကျိအိၣ်တကပၤအဃိလီၤ. ကဲထီၣ်ကွံာ် တၢ်လီၢ်လၢပှၤတ့ၢ်ကွံာ်တၢ်ကမှံၤ ဒီး တၢ်ဘှီဘၣ်က့ၤအီၤန့ၣ် မ့ၢ်တၢ်ဂ့ၢ်ကီဖးယံာ်တခါ လၢပှၤအိၣ်ဖဲဟီၣ်ကဝီၤအံၤအပူၤတဖၣ်အဂီၢ်လီၤ.
Duncan စံးဝဲလၢ, “အဝဲန့ၣ် မ့ၢ်တၢ်လၢအဒုးသ့ၣ်နီၣ်ထီၣ်က့ၤအဝဲသ့ၣ် လၢမဲာ်ချံဖျါထီဘိလၢ အဝဲသ့ၣ်အတၢ်ဘၣ်ယိၣ်ဘၣ်ဘှီတဖၣ် တဘၣ်တၢ်ကွၢ်ထွဲဘှီဘၣ်အီၤဘၣ်န့ၣ်လီၤ.” “ယဆဲးကျိးဘၣ် ဝ့ၢ်အပှၤသ့စက်ၢ်ဖိတဖၣ် ဒ်သိးကကွၢ်သမံသမိးက့ၤ တၢ်မၤလိဃုသ့ၣ်ညါ လၢဘၣ်တၢ်မၤဝံၤအီၤဖဲ Blue River Road အဖီခိၣ် ဝံၤလံ, ဒီးယကွၢ်လၢ်လၢ ယကပာ်ဖှိၣ်ရဲၣ်ကျဲၤ ပှၤတဝၢဖိလၢအသးစဲတၢ်တဖၣ် ဒ်သိးကဒုးအိၣ်ထီၣ် ကျဲလၢတၢ်ကဘှီဘၣ်အီၤအဂီၢ်လီၤ.”
Duncan စံးဝဲလၢ အဝဲအဲၣ်ဒိးဒုးအိၣ်ထီၣ်အါထီၣ် ကမျၢၢ်တၢ်လဲၤတၢ်က့ၤ ဖဲကလံၤထံးတကပၤ, ဃုာ်ဒီး ဟံၣ်လၢအပှ့ၤဘၣ်ဒီးပှၤဒိးလဲအိၣ်သ့ ဖဲ ကမျၢၢ်တၢ်လဲၤတၢ်က့ၤသိလ့ၣ် အကျဲတဖၣ်အကပၤလီၤ. အဝဲကမၤတၢ်ဖဲ ကီၣ်စ့ၣ် အတၢ်လဲၤတၢ်က့ၤ ဒီး တၢ်သူၣ်ထီၣ်ဘှီထီၣ် ကမံးတံာ်အပူၤလီၤ.
တၢ်လဲၤကျဲလၢ အဘၣ်ကျဲးစၢးဂဲၤလိာ်ဆူၣ်
တၢ်ဂ့ၢ်လၢအဝဲတဲဖျါထီၣ် ဘၣ်ဃးဒီး အဝဲလဲၤတုၤဖဲ ဝ့ၢ်ကီၣ်စ့ၣ် အပူၤဒ်လဲၣ်န့ၣ် ပာ်ဖျါထီၣ်ဝဲ တၢ်လဲၤထီၣ်လဲၤထီ အကျိၤအကျဲလၢ အဖျါရှဲပျီၢ်ဝဲတခါလီၤ. တၢ်လဲၤတပတီၢ်စုာ်စုာ်န့ၣ် မ့ၢ်တၢ်ဂ့ၢ်ခိၣ်တီ ဒီးတၢ်ကဲထီၣ်လၢ အပိာ်ထွဲထီၣ် တၢ်လၢအကဲထီၣ်တ့ၢ် လၢအမဲာ်ညါတခါန့ၣ်လီၤ.
အဝဲဟဲနုာ်လီၤဃုထၢအသးလၢ မူဒါအဂီၢ်ခီဖျိအဝဲအတၢ်မၤတၢ်ရဲၣ်တၢ်ကျဲၤဒီး KC Tenants အဃိန့ၣ်လီၤ. အဝဲဟဲတုၤလၢကရူၢ်အံၤအအိၣ် ခီဖျိတၢ်မၤသကိးတၢ်ဒီး သုးဖိလီၢ်လံၤလၢအလဲၤခီဖျိဘၣ်တၢ်ဒုးပျီ ဖဲဝ့ၢ် Lawrence အပူၤန့ၣ်လီၤ. တၢ်မၤအဝဲန့ၣ် ဟဲကဲထီၣ်အသးခီဖျိ အဝဲအနီၢ်ကစၢ်အသးတၢ်ဘၣ်ဒိဘၣ်ထံးဖးဒိၣ် (PTSD) ဖဲအဝဲအိၣ်လၢ ကီၢ်အံၣ်ရၣ်အပူၤ ၁၈ လါအဃိန့ၣ်လီၤ. အဝဲနုာ်လီၤလၢသုးကျါ မ့ၢ်လၢအနီၢ်ကစၢ်ဒၣ်ဝဲဖှီၣ် ဒီးလိၣ်ဘၣ်ကျိၣ်စ့လၢ ကလဲၤထီၣ်ခီလ့ၢ်ကၠိအဂီၢ်အဃိန့ၣ်လီၤ.
ခဲအံၤအဝဲနံၤကမှံထီၣ်က့ၤ အတၢ်လဲၤကျဲလၢပှၤဂၤတလဲၤဝဲအံၤန့ၣ်လီၤ. တမ့ၢ်လၢအလီၤနံၤအဃိဘၣ်. မ့ၢ်လၢ ဘၣ်မနုၤလဲဉ်တသ့ၣ်ညါဘၣ် အဝဲလဲၤခီဖျိတုၤထီၣ်ဖျိထီၣ်ဝဲအဃိန့ၣ်လီၤ.
အဝဲမ့ၢ် QRF (သုးကျိၤလၢအဟူးဂဲၤချ့) တဖုအပှၤတဂၤ ဖဲဝ့ၢ် Baghdad အကလံၤထံးတခီန့ၣ်လီၤ. တၢ်အံၤမ့ၢ်ဝဲဖဲ ၂၀၀၇ နံၣ်, ဖဲတၢ်ဆှၢအါထီၣ်သုးဖိအဆၢကတီၢ် တၢ်ဒုးအမဲာ်ညါသွါန့ၣ်လီၤ. အဝဲအသုးကျိၤ ဃုထံၣ်ထီၣ်မ့ၣ်ပိၢ်လၢပှၤခူၣ်လီၤအီၤလၢကျဲ (IEDs) တဖၣ် ဒီးစီၣ်ပျီၢ်တြဲာ်တဖၣ် လၢတၢ်လူၤဖီၣ် ဒုၣ်ဒါအခိၣ်အနၢ်လၢအရ့ဒိၣ်တဖၣ်အဂီၢ်န့ၣ်လီၤ.
အဝဲစံးဝဲလၢ “လၢသုးကလၢၤအချၢန့ၣ် ပဘၣ်ကူသိးကျၢၤဘၢ တၢ်ဒုးအတၢ်ပီးတၢ်လီလၢာ်လၢာ်ဆ့ဆ့ ကိးမုၢ်နံၤဒဲးလီၤ,” “ယထံၣ်ဘၣ်ယသကိးတဖၣ်သံ, ယထံၣ်ဘၣ် အံၣ်ရၣ်ကမျၢၢ်တဖၣ်သံ အါမးတုၤပဂံၢ်တန့ၢ်လၢၤဘၣ်. ယတဆိကမိၣ်ဘၣ်လၢ ယကဟဲက့ၤတုၤလၢဟံၣ်လၢၤဘၣ်.”
ဒီးဖဲအဝဲဟဲက့ၤတုၤလၢဟံၣ်ဖဲ ၂၀၀၇ နံၣ်အခါ ပှၤသံကွၢ်အီၤလၢ မ့ၢ်အဝဲကလဲၤခီဖျိ ရဲၣ်ကျဲၤတၢ်ကိးမံၤဒဲး ဖဲအက့ၤနုာ်လီၤကဒါလၢ ကမျၢၢ်အတၢ်အိၣ်မူအပူၤန့ၣ် ကန့ၢ်ဧါန့ၣ်လီၤ.
ဖဲန့ၣ်အခါ အဝဲအသးအိၣ် ၂၁ နံၣ်. အဝဲစံးဝဲ “မ့ၢ်လီၤ, သ့သပှၢ်တၢ်လီၤ.”
တၢ်မနုၤအိၣ်ခိးအီၤလၢ တၢ်ခံးသူကျါလဲဉ်န့ၣ် အဝဲတသ့ၣ်ညါဝဲနီတမံၤဘၣ်. တၢ်သးဒိၣ်ထီၣ်, မံတန့ၢ်, တၢ်ပျံၤတၢ်ဖုး, ဒီးလၢမုၢ်နၤခီ တၢ်မံမီၢ်လီၤပျံၤလီၤဖုးတဖၣ်န့ၣ်လီၤ. အဝဲအတံၤသကိးမုၣ် မံတန့ၢ်ဘၣ် မ့ၢ်လၢအဝဲအတၢ်သးထီၣ်သတူၢ်ကလာ်တဖၣ်အဃိန့ၣ်လီၤ. အဝဲကဖီၣ်ထီၣ်ကျိဖိတခိၣ် ဒီးကိးပသူထီၣ်လၢ ပှၤကမၤဖျါထီၣ်ဒၢးပူၤအဂီၢ်န့ၣ်လီၤ.
အဝဲအိသံးဒ်သိးအမံကန့ၢ်အဂီၢ်န့ၣ်လီၤ.
အဝဲစံးဝဲလၢ “ဘၣ်ဆၣ် ပှၤတဲပှၤထဲလၢ ပကဘၣ်တူၢ်ခီဖျိလဲၤဆူညါဒ်သုးဖိတဂၤအသိး မ့ၢ်လၢတၢ်အံၤမ့ၢ်တၢ်လၢ သုးဖိတဖၣ်မၤဝဲအဃိန့ၣ်လီၤ.”
ဖဲအဝဲထီၣ်ကၠိလၢ University of Kansas အခါ, အဝဲဂုာ်ကျဲးစၢးဃုမၤန့ၢ် သးတၢ်ဆူၣ်တၢ်ချ့ အတၢ်မၤစၢၤ, ဘၣ်ဆၣ် အသးဟါဂီၤဝဲခီဖျိ ဝဲၤကျိၤအတၢ်ဖံးတၢ်မၤ အကျိၤအကျဲလၢ အဘျၢက့ၤဘျၢကဒါတဖၣ်အဃိန့ၣ်လီၤ.
အဝဲစံးဝဲလၢ “ယမ့ၢ်ပှၤလၢ အအိၣ်ဒီးသးတၢ်ဘၣ်ဒိဘၣ်ထံးဖးဒိၣ် (PTSD) အက့ၢ်အဂီၤ နီၢ်နီၢ်တဂၤလီၤ,” “လၢယပျံၤတၢ်အလီၢ်န့ၣ် ယကဲထီၣ်ပှၤလၢအသးဒိၣ်တၢ်လီၤ. ပှၤဆှၢလီၤယၤလၢ ယကလဲၤမၤသံ ပှၤဖံးဘ့ၣ်လွဲၢ်စုာ်သးစၢ်တဖၣ်လၢ အမဲာ်သၣ်လီၤဂာ်ဒီးယၤ, ဒီးလဲၤဒုးတၢ်လၢ ထံကီၢ်တဘ့ၣ်လၢ အတအိၣ်ဒီးတၢ်သးစဲလၢ ကဒုးန့ၢ်တၢ်လၢယဂီၢ်ဘၣ်န့ၣ်လီၤ. ပှၤကိးပှၤလၢ ပှၤဒူပှၤဃိၤတဖၣ်, ဘၣ်ဆၣ် ယတူၢ်ဘၣ်လၢ ပှၤလီန့ၢ်ယၤလီၤ.”
အဝဲအိထီၣ်အထံတစဲး ဒီးတ့ာ်အခိၣ်န့ၣ်လီၤ. “အဃိ ယတ့ထီၣ်တၢ်ကူၣ်ထီၣ်ဖးလီၤတခါလၢ ယတမၤဒ်န့ၣ်လၢၤဘၣ်. ယတ့ထီၣ်တၢ်ကူၣ်ထီၣ်ဖးလီၤလၢ ယကမၤသံလီၤက့ၤယသးလီၤ.”
ကျိဖိလၢအအိၣ်ဒီးအီၤတခါန့ၣ်ဧါ? မ့ၢ်ဝဲ .45 ကျိဖိလၢ သုးမုၢ်ဟ့ၣ်အီၤဖဲအဟးထီၣ်ဝဲအခါန့ၣ်လီၤ. မ့ၢ်ဝဲတၢ်သ့ၣ်နီၣ်ထီၣ်အတၢ်ဟ့ၣ်တခါဒီး တၢ်ကွဲးန့ၢ်အသုးကျိၤအမံၤလၢအလိၤလီၤ.
အဝဲစံးဝဲဒၣ်, “မ့ၢ်လီၤ, ယဒိးန့ၢ်သးအတၢ်အိၣ်ဆူၣ်အိၣ်ချ့ အတၢ်မၤစၢၤတန့ၢ်ဘၣ်, ဘၣ်ဆၣ် အဝဲသ့ၣ်ဟ့ၣ်ယၤကျိတခါလီၤ.”
ဝံၤဒီး အဝဲကတိၤတၢ်ဒီး သုးလီၢ်လံၤတဂၤ လၢအသံကွၢ်အီၤလၢ အအိၣ်ဒ်လဲၣ်န့ၣ်လီၤ. Duncan စံးဆၢဝဲလၢ အအိၣ်ဂ့ၤဝဲလီၤ.
ပိာ်ခွါတဂၤန့ၣ် ဝးတရံးအခိၣ်ဒီးစံးဝဲ, “ယတဆိကမိၣ်လၢ နအိၣ်ဂ့ၤဘၣ်.”
တၢ်ကတိၤအဂၤတဖၣ် မ့ၢ်ဝဲဒ်အံၤလီၤ-
သုးလီၢ်လံၤ- “ကျိဖိလၢအဝဲသ့ၣ်ဟ့ၣ်နၤတခါန့ၣ် အိၣ်ဒံးဒီးနၤဧါ?”
Duncan- “အိၣ်ဒံးလီၤ.”
သုးလီၢ်လံၤ- “နထွ့ကဆှီအီၤဧါ?”
Duncan- “မ့ၢ်လီၤ.”
သုးလီၢ်လံၤ- “ကိးနၤဒဲးဧါ?”
Duncan- “အိၣ်ဒံးလီၤ.”
သုးလီၢ်လံၤ- “နပာ်ထီၣ်အီၤလၢ နခိၣ်သၣ်ဃံလိၤဧါ?”
Duncan- “တမ့ၢ်ဘၣ်.”
သုးလီၢ်လံၤ- “တမ့ၢ်ဘၣ်, နပာ်နုာ်အီၤလၢ နထးခိၣ်ပူၤ, မ့ၢ်ဧါ?”
Duncan- “မ့ၢ်လီၤ.”
ဝံၤအလီၢ်ခံ, အဝဲထံၣ်န့ၢ်ဝဲတၢ်အိၣ်ကဒုအလီၢ်တခါဒီး သုးလီၢ်လံၤလၢအလဲၤတ့ၢ်တၢ်ဒုးအပှၤတဝၢ ဖဲ Lawrence အပူၤ, ဒီးလၢအဝဲသ့ၣ်အကျါ အါဂၤန့ၣ် မ့ၢ်ဝဲဖိသၣ်ကၠိဖိဖဲ KU န့ၣ်လီၤ. ကရူၢ်အံၤ မၤစၢၤဝဲလၢ တၢ်နုာ်လီၤမံၤလၢကၠိ, တၢ်ဒိးန့ၢ်ကီၢ်စဲၣ်ပူၤကၠိအဘူးအလဲ ဒီးတၢ်စးထီၣ် တၢ်မၤလိလံာ်အလီၢ်လၢ သုးလီၢ်လံၤတဖၣ်အဂီၢ်န့ၣ်လီၤ.
ဖဲန့ၣ်မ့ၢ်တၢ်လီၢ်လၢ Brooklynne Mosley, လၢအမၤတ့ၢ် တၢ်လဲၤဖ့ၣ်န့ၢ်သိလၢ မူခိၣ်ချၢလၢ ကီၢ်အံၣ်ရး ဒီး ကီၢ်အာ်ဖကါနံၣ်စတၣ်အဖီခိၣ်တဂၤ, ထံၣ်လိာ်အသးဒီး Duncan န့ၣ်လီၤ. အဝဲစံးဝဲလၢ အဝဲသ့ၣ်ခံဂၤလၢာ် သ့ၣ်ညါဝဲ သုးလီၢ်လံၤတဖၣ်လၢ အဟဲက့ၤတုၤလၢဟံၣ်, “ဘၣ်ဆၣ် အသးတဟဲက့ၤတုၤလၢ တၢ်ဒုးပူၤနီတဘျီဘၣ်” န့ၣ်လီၤ.
Mosley စံးဝဲဒၣ်, “Johnathan သ့ၣ်ညါဝဲလၢ ပမၤတၢ်သ့အါန့ၢ်အံၤအါမးလီၤ.” “အဝဲဘၣ်တၢ်ဆှၢအီၤလၢ တၢ်တီတၢ်လိၤအသး လၢအမ့ၢ် ဖဲနဟ့ၣ်ပှၤဂၤ တၢ်ခွဲးတၢ်ယာ်ထဲသိးတုၤသိးအခါ, ပှၤလၢအဖှီၣ်အနးကတၢၢ်လၢပကျါဒၣ်လဲာ် ဘၣ်တၢ်စိာ်ထီၣ်အီၤလီၤ.”
Duncan အတၢ်မၤဖဲ KU န့ၣ် လၢခံဒုးန့ၢ်အီၤတၢ်မၤဖဲ VFW ထံကီၢ်ဒီဘ့ၣ်ဝဲၤလီၢ်ခိၣ်သ့ၣ်လၢ ခဲစၢးစံထံၣ် အပူၤ ဒီးလၢခံမၤဝဲ တၢ်ပာ်ဖှိၣ်မၤသကိးတၢ် အတၢ်မၤလၢ KC Tenants အဂီၢ်လီၤ. ပှၤမၤတၢ်ဖိတဖၣ် ကဲထီၣ်ဝဲ အပှၤတဝၢအသီလီၤ.
Vance လၢ KC Tenants အပူၤန့ၣ် ရၤလီၤဝဲတၢ်ကစီၣ် ဘၣ်ဃးဒီး ပှၤတဖၣ်ဘၣ်တၢ်ဟီထီၣ်ကွံာ်အီၤလၢ ကျဲမုၢ်ခိၣ် ဖဲတၢ်ဆါသတြိာ်ရၤလီၤသးအဆၢကတီၢ် ဒီးအဝဲအဲၣ်ဒိးဝဲလၢ ပှၤမၤကလီတၢ်တဖၣ် ကနုာ်လီၤမၤတံာ်တာ် ကီၢ်ရ့ၣ်အတၢ်စံၣ်ညီၣ် ဘၣ်ဃးတၢ်ဟီထီၣ်ကွံာ်ပှၤလၢဟံၣ် ဖဲ Zoom အဖီခိၣ်န့ၣ်လီၤ.
Duncan တူၢ်လိာ်ဝဲ တၢ်ကိးအဝဲန့ၣ်လီၤ. အဝဲအိၣ်ကတဲာ်ကတီၤအသး လၢာ်လၢာ်ဆ့ဆ့ လၢကအိးထီၣ် အတၢ်ကလုၢ် (mute) ဒီးကတိၤထီၣ်တၢ်အဂီၢ်လီၤ.
Vance စံးဝဲလၢ “Johnathan န့ၣ် သ့ၣ်ညါနာ်ပှၢ်ဝဲ လီၤတံၢ်လီၤဆဲး တူာ်ဘၣ်တူာ်ထီၣ် ဘၣ်ဃးဒီး တၢ်မနုၤမ့ၢ်တၢ်အဘၣ် ဒီး တၢ်မနုၤမ့ၢ်တၢ်အကမၣ်လဲၣ်န့ၣ်လီၤ.”
Heart Village Mobile Home Park အတၢ်ကီတၢ်ခဲန့ၣ် ဆီၣ်ထွဲထီၣ်အီၤ ထဲတပတီၢ်လီၤ. ပှၤအိၣ်ဖဲန့ၣ်တဖၣ် ဘၣ်တၢ်မၢဆူၣ်အီၤလၢ ကဘၣ်သုးကွံာ်အသး ဒ်သိးကပာ်လီၤတၢ်လီၢ်လၢ Jackson County အဃိာ်အသီအဂီၢ်လီၤ. ပှၤအိၣ်ဖဲန့ၣ်တနီၤ ပာ်ဒ့ၣ်ပာ်ကမၣ်ဝဲ ကီၢ်ရ့ၣ် လၢအပာ်ပနီၣ်ရဲၣ်ကျဲၤတၢ်တဂ့ၤဘၣ် ဒီး ကဒူးကဒ့ၣ်ဝဲလၢ အဝဲသ့ၣ်တဒိးန့ၢ်ဘၣ်ဝဲ ကျိၣ်စ့လၢ ပှၤတဲဘၣ်အဝဲသ့ၣ်လၢ အဝဲသ့ၣ်ကဒိးန့ၢ်ဘၣ်ဝဲ လၢတၢ်သုးလီၢ်သုးကျဲအဂီၢ်န့ၣ်ဘၣ်.
Duncan စံးဝဲလၢ ကီၢ်ရ့ၣ်အတၢ်ရ့လိာ်မၤဘၣ်လိာ်သးဒီး ပှၤအိၣ်ဖဲ Heart တဖၣ်န့ၣ် မ့ၢ်တၢ်တသးကညီၤတၢ် ဒီး တၢ်တပာ်ကဲပှၤဂၤဘၣ်န့ၣ်လီၤ.
Duncan စံးဝဲလၢ “ဖဲန့ၣ်မ့ၢ်တၢ်ဆၢကတီၢ်လၢ ယဆၢတဲာ်လီၤယသး လၢယကနုာ်လီၤပြၢ ဝ့ၢ်ကီၣ်စ့ၣ် အတၢ်ဃုထၢန့ၣ်လီၤ.”
သတူၢ်ကလာ်န့ၣ် Hooper’s အပူၤ ခံးလီၤဝဲ ဒီးတၢ်သူၣ်ထီၣ်ဟူးဝဲလီၤ. ကလံၤမုၢ်လၢ အဟဲဖဲ လါယူၤလံ ၁၄ သီ မုၢ်ဃ့ၢ်လီၤအဆၢကတီၢ် လၢအမၤဟးဂီၤတၢ်ဖဲ ခဲစၢးစံထံၣ် အပူၤန့ၣ် မၤပာ်တ့ၢ်ကွံာ် လီမ့ၣ်အူ၊ မၤသီၣ်ဟူး ပဲတြီဖိတဖၣ် ဒီးမၤလီၤထုကွံာ် သ့ၣ်ဖးဒိၣ်တဖၣ် လၢအအိၣ်ဘူးဖဲန့ၣ်လီၤ.
ဖဲမူခိၣ်စူၤလီၤဆူၣ် လၢဟံၣ်ခိၣ်အခါန့ၣ် Duncan ယူာ်ထီၣ်ဝဲ အလီတဲစိ ဘျ့ဘျ့ဖိ၊ အိးထီၣ်ဝဲ မ့ၣ်အူဖိ ဒီးကွၢ်သမံသမိးဝဲ ရ့ဒၣ် (radar) လီၤ. အဝဲသ့ၣ်ညါပာ်စၢၤ ကျဲလၢအလဲၤဆူ တၢ်သူၣ်ထီၣ်အဖီလာ်တကထၢ (basement) န့ၣ်လီၤ. ပှၤအီၣ်တၢ်ဖိ လၢစီၢ်နီၤခိၣ်အဂၤတဖၣ် ကွၢ်လီၤဆူ အအိၣ်လီၤ.
လၢတၢ်ဆၢကတီၢ်ဖုၣ်ကိာ်ဖိအပူၤန့ၣ် မ့ၢ်ဒ်သိးဒီး အဝဲအိၣ်ဒီး ပှၤတဝၢအဂၤတဖုလီၤ. ပှၤတဝၢတဖုအံၤ အိၣ်လၢတၢ်ခံးကျါ၊ ဘၣ်ဆၣ် Johnathan Duncan န့ၣ် ထံၣ်န့ၢ်ဝဲ ကျဲလၢအလဲၤဆူ တၢ်ကပီၤအပူၤ ထီဘိလီၤ.