Johnathan Duncan paub tias tib neeg yuav muaj lus nug seb nws puas yog neeg paub sab qab teb Kansas City tiag.
Tus tswv cuab hauv Pawg Sab Laj Nroog tshiab nyob hauv thaj chaw sab qaum teb ntawm Cheeb Tsam 6th, nyob ze Brookside dua li Martin City. Nws yog nws thawj zaug sib tw, thiab nws tsis tau yeej ib cheeb tsam pov npav sab qab teb ntawm Bannister Road.
Yog li ntawd, The Telegraph tau muab lub sij hawm rau Duncan kom nws qhia txog nws tus kheej zoo dua rau cov pej xeem uas nws sawv cev.
Nws xav ua qhov kev xam phaj no qhov twg?
“Charlie Hooper’s,” Duncan hais.
Nws tsis yog ib tug neeg ua nom ua tswv uas txawj hais lus mos muag. Nws tsis sim ua li ntawd, thiab nws kuj tsis xav ua li ntawd. Nws nyuam qhuav yeej ib tug neeg sib tw uas tau xyaum ua li ntawd los tau 24 xyoos.
Tam sim no nrog txoj kev yeej uas tsis tau cia siab no, Kansas City muaj thawj zaug: ib tus tswv cuab hauv Pawg Sab Laj Nroog uas tau ncaws qhov rooj hauv Iraq, muab phom tso rau hauv nws lub qhov ncauj thaum nws rov los txog tsev, txhob txwm cuam tshuam cov rooj hais plaub ntiab neeg tawm tsev thiab nkag mus ua nom ua tswv vim muaj ib lub chaw nres tsev trailer.
Tsis nyob ze rau cov neeg muaj hwj chim ua nom ua tswv hauv lub nroog li, Duncan tuaj los ntawm kev txhawb nqa koom tes hauv zej zog. Nws paub tias qee leej hu qhov ntawd tias “kev tsim kev ntxhov siab (rabble-rousing).”
“Kuv hu nws tias kev txhawb nqa koom tes,” Duncan hais. “Kuv paub tias kuv yuav yeej thaum cov ntawv tshaj tawm xov xwm phem pib tawm los.”
Txhawm rau txhawb nqa cov neeg ua hauj lwm, Duncan, nrog rau cov neeg txhawb nqa tseem ceeb, tau mus khob 8,500 lub qhov rooj thaum lub sij hawm nrhiav suab xaiv tsa.
Thiab thaum lub Rau Hli Ntuj tim 20, Duncan, uas tau txais kev txhawb nqa los ntawm KC Tenants Power thiab lwm cov pab pawg uas xav kom muaj kev hloov pauv, tau yeej Jackson County tus tsim cai lij choj Dan Tarwater uas ua hauj lwm los ntev lawm 56 mus rau 44 feem pua.
Wilson Vance, tus thawj coj num tswv ntawm KC Tenants, tau hais tias Duncan tuaj rau lub koom haum tawm suab pab pej xeem no los nrhiav ib lub zej zog ntawm cov neeg txom nyem thiab cov neeg ua hauj lwm kom nws tau pab tawm tsam rau lawv.
“Nws yeej tsis tau hnov qab tias kev txom nyem yog li cas, kev loj hlob ua ib tug neeg ntshav sib xyaw hauv ib lub nroog me yog li cas, thiab nws yeej tsis tau hnov qab qhov uas tau tshwm sim rau nws thaum nws rov qab los ntawm Iraq,” Vance hais. “Peb pom kev npau taws. Tab sis peb kuj pom kev hlub tob rau cov neeg nyob ze thiab lub zej zog uas kuv xav kom muaj nyob hauv ib tug neeg ua nom ua tswv. Pawg Sab Laj Nroog yuav zoo dua yog muaj Johnathan nyob hauv.
“Nws yuav hloov tus cwj pwm sib raug zoo hauv chav ntawd.”
Kev tsim kev ntseeg siab
Duncan, muaj 37 xyoo, tuaj txog ntxov ntawm Charlie Hooper’s Brookside Bar & Grille. Dej tso dej khov, tsho dawb muaj khawm, ris jeans dub hnav ua hauj lwm.
Nws yog ib tug txiv neej uas muaj hauj lwm ntau. Nws yuav tsis tau cog lus lav luag hauj lwm mus txog ob peb lub lim tiam ntxiv, tab sis nws twb pib mus koom cov rooj sib tham puv nkaus hauv Tsev Hauj Lwm Nroog lawm thaum nws tab tom npaj kev ua tshoob thaum lub Cuaj Hli Ntuj nrog nws tusab hluas nkauj uas twb tso cia lawm.
Nws nyuam qhuav ua hnub kawg ntawm nws txoj hauj lwm uas nws tau ua los ntev ntawm VFW lub chaw hauj lwm loj hauv teb chaws. Nws txoj kev npaj yog ua ib tus tswv cuab hauv Pawg Sab Laj Nroog uas ua hauj lwm puv sij hawm.
Hais txog kev poob cov cheeb tsam pov npav sab qab teb ntawd, “Zoo li kuv tseem muaj num yuav tau tsim kev ntseeg siab ntxiv,” nws hais ntawm ib lub rooj siab hauv Hooper’s.
Txoj kev Blue River Road yuav yog ib qho chaw pib tau. Txoj kev no tau kaw los ntau xyoo lawm nyob sab qab teb ntawm Bannister Road vim lub plaj kev nplua poob mus rau hauv tus dej. Nws tau dhau los ua ib qho chaw pov khib nyiab thiab kev kho txoj kev no tau ua ib qho teeb meem ntev los lawm rau cov neeg nyob hauv cheeb tsam ntawd.
“Nws yog ib qho uas niaj hnub pom ntawm qhov muag uas qhia tias lawv cov kev txhawj xeeb tsis tau raug daws,” Duncan hais. “Kuv twb tau tiv tauj lub nroog cov kws tsim kev lawm kom rov saib dua ib qho kev tshawb fawb uas tau ua tiav ntawm Blue River Road, thiab kuv tos ntsoov yuav teeb tsa cov neeg hauv zej zog uas txaus siab los koom tsim cov kev daws teeb meem uas yuav ua tau.”
Duncan hais tias nws kuj xav kom muaj tsheb thauj neeg pej xeem ntau ntxiv nyob rau sab qab teb, nrog rau tsev nyob nqi pheej yig nyob raws cov kab kev tsheb thauj neeg. Nws yuav ua hauj lwm hauv Pawg Sab Laj lub pawg saib xyuas kev thauj neeg thiab kev tsim kho.
Txoj kev taug uas tau tawm tsam hnyav
Zaj dab neeg uas nws qhia txog tias nws ua li cas thiaj los txog hauv Pawg Sab Laj Nroog qhia meej txog kev nce theem zuj zus; txhua kauj ruam yog lub hauv paus thiab qhov tshwm sim los ntawm kauj ruam ua ntej ntawd.
Nws tau sib tw ua nom vim nws txoj hauj lwm teeb tsa thiab txhawb pej xeem nrog KC Tenants. Nws tau tuaj koom pab pawg ntawd los ntawm kev ua hauj lwm nrog cov qub tub rog uas tau mus ua rog hauv Lawrence. Txoj hauj lwm ntawd pib los ntawm nws tus kheej txoj kev mob PTSD tom qab nyob hauv Iraq tau 18 lub hlis. Nws tau mus ua tub rog Army vim nws tus kheej txom nyem thiab xav tau nyiaj mus kawm ntawv qib siab.
Tam sim no nws luag ntxhi rau txoj kev uas tsis tshua muaj neeg taug. Tsis yog vim nws txaus luag. Tab sis yog vim ua cas los tsis paub nws kuj dhau los tau lawm.
Nws yog ib tug hauv pab QRF (quick response force, pab tub rog ceev faj ceev) nyob sab qab teb ntawm Baghdad. Lub sij hawm ntawd yog xyoo 2007, nyob rau pem hauv ntej ntawm lub sij hawm xa tub rog ntxiv mus ua rog hnyav. Nws pab tub rog tau nrhiav cov foob pob IEDs thiab ncaws qhov rooj mus raws ntes cov neeg tseem ceeb uas lawv nrhiav.
“Tawm sab nraud ntawm lub yeej, hnav khaub ncaws thiab nqa riam phom ua rog puv nkaus txhua hnub,” nws hais. “Kuv pom kuv cov phooj ywg tuag, kuv pom cov pej xeem Iraqi suav tsis txheeb tuag. Kuv tsis xav tias kuv yuav tau rov los tsev.”
Thiab thaum nws rov los tsev hauv xyoo 2007 luag tau nug nws seb nws puas tiv taus txhua yam thaum rov qab los ua lub neej pej xeem.
Nws muaj 21 xyoos. “Aw, tau kawg.”
Nws tsis paub hlo li tias muaj dab tsi tos nws nyob hauv qhov tsaus ntuj. Kev npau taws, pw tsis tsaug zog, kev ntshai, thiab kev npau suav phem tsim txom thaum hmo ntuj. Nws tus hluas nkauj pw tsis tsaug zog vim yog nws cov kev npau taws heev dheev. Nws pheej txeeb riam phom luv thiab qw kom txhua tus tawm hauv chav mus.
Nws haus cawv kom pw tsaug zog.
“Tab sis peb raug qhia kom ua siab tawv tiv mus ntxiv xwb vim qhov ntawd yog yam uas tub rog ua,” nws hais.
Thaum nws tab tom kawm ntawv nyob rau University of Kansas, nws tau sim nrhiav kev pab kho kev nyuaj siab thiab lub hlwb, tab sis nws chim siab heev rau txoj kev khiav hauj lwm uas nyuaj thiab tsis meej pem.
“Kuv lub neej thaum ntawd yog tus yam ntxwv ntawm PTSD kiag li,” nws hais. “Kuv hloov ntawm kev ntshai mus ua kev npau taws. Qhov uas raug xa mus tua cov txiv neej hluas uas yog neeg tawv xim zoo li kuv, mus ua rog rau ib lub teb chaws uas tsis quav ntsej yuav tawm tsam pab kuv li. Luag hu peb ua phab ej, tab sis kuv xav tias kuv raug dag.”
Nws haus ib pas dej mam li ncaws hau. “Yog li ntawd kuv thiaj li npaj tswv yim tsis ua li ntawd ntxiv lawm. Kuv tau npaj tswv yim los tua kuv tus kheej.”
Rab phom luv uas nws muaj ntawd ne? Nws yog ib rab .45 uas pawg Tub Rog (Army) muab rau nws thaum nws tawm. Nws yog ib rab phom ua khoom nco, uas muaj sau nws pab tub rog lub npe rau saum.
“Yog las mas, kuv nrhiav tsis tau kev pab kho mob hlwb, tab sis lawv ho muab ib rab phom rau kuv,” nws hais.
Tom qab ntawd nws tau tham nrog ib tug qub tub rog uas nug nws tias nws nyob li cas lawm. Duncan teb tias nws nyob zoo.
Tus txiv neej ntawd co taub hau. “Kuv xav tias koj tsis nyob zoo.”
Cov lus tham ntxiv mus zoo li no:
Qub tub rog: “Koj puas tseem muaj rab phom luv uas lawv muab rau koj ntawd?”
Duncan: “Muaj.”
Qub tub rog: “Koj puas so nws?”
Duncan: “Yog.”
Qub tub rog: “Txhua hmo lov?”
Duncan: “Muaj.”
Qub tub rog: “Koj puas muab nws tso rau ntawm koj lub taub hau?”
Duncan: “Tsis tau.”
Qub tub rog: “Tsis yog, koj muab nws tso rau hauv koj lub qhov ncauj, puas yog?”
Duncan: “Yog.”
Tom qab ntawd, nws tau nrhiav tau ib lub chaw nrog rau pawg qub tub rog uas tau mus ua rog nyob rau Lawrence, uas lawv ntau leej yog cov tub ntxhais kawm ntawv nyob rau KU. Pawg neeg no tau pab txog kev Sau Npe Kawm, kev thov tau tus nqi kawm ntawv rau cov neeg nyob hauv lub xeev thiab kev pib tsim ib chav zaum kawm ntawv rau cov qub tub rog.
Qhov ntawd yog qhov chaw uas Brooklynne Mosley, tus uas tau ua hauj lwm ya dav hlau mus nchuav roj rau lwm lub dav hlau saum huab cua hauv teb chaws Iraq thiab Afghanistan, tau ntsib Duncan. Nws hais tias lawv ob leeg puav leej paub cov qub tub rog uas rov qab los tsev, “tab sis yeej tsis tau rov qab los tiag tiag” ntawm kev ua tsov ua rog.
“Johnathan paub tias peb tseem muaj peev xwm ua tau ntau tshaj qhov ntawd,” Mosley tau hais. “Kev ncaj ncees yog qhov txhawb nqa nws lub siab tias thaum koj muab kev vaj huam sib luag rau txhua tus neeg, tus uas txom nyem tshaj plaws hauv peb pab pawg los kuj yuav raug txhawb nqa nrog.”
Duncan txoj hauj lwm nyob rau hauv KU thaum kawg tau coj nws mus ua ib txoj hauj lwm nyob rau VFW lub chaw hauj lwm loj hauv teb chaws nyob hauv Kansas City thiab tom qab ntawd mus ua hauj lwm txhawb nqa thiab teeb tsa rau KC Tenants. Cov neeg ua hauj lwm tau los ua nws lub zej zog tshiab.
Vance, nyob ntawm KC Tenants, tau tshaj tawm txog cov neeg raug ntiab tawm mus nyob tom txoj kev thaum muaj kab mob kis thoob plaws teb chaws thiab nws xav tau cov neeg ua hauj lwm pab dawb los cuam tshuam cov rooj hais plaub ntiab neeg tawm tsev ntawm nroog lub xeev (county) hauv Zoom.
Duncan tau teb txoj kev hu ntawd. Nws npaj txhij heev los qhib lub suab hais lus.
“Johnathan qhia meej meej yam tsis txaj muag txog qhov twg yog qhov raug thiab qhov twg yog qhov tsis raug,” Vance hais.
Kev txom nyem ntawm Heart Village Mobile Home Park tau txhawb nws mus ntxiv ib kauj ruam. Cov neeg nyob ntawd raug yuam kom tawm mus kom muaj chaw tsim lub tsev loj cuj tshiab ntawm Jackson County. Qee cov neeg nyob ntawd tau liam tias lub nroog xeev (county) tsis tau tswj txoj kev ua hauj lwm kom zoo thiab tau yws tias lawv tsis tau txais cov nyiaj uas lawv tau raug qhia tias yuav tau txais los hloov chaw nyob.
Duncan hais tias txoj kev uas lub nroog xeev (county) ua rau cov neeg nyob hauv Heart yog kev tsis saib xyuas thiab tsis hwm.
“Thaum ntawd yog thaum kuv txiav txim siab los sib tw rau Pawg Sab Laj Nroog,” Duncan hais.
dheev ntawd, Hooper’s kuj tsaus nti thiab lub tsev co. Cua daj cua dub uas tshuab loj kawg hla hauv Kansas City thaum tav su yuav tsaus ntuj lub 7 Hli Ntuj tim 14 tau ua rau hluav taws xob tu, co tej qhov rai nrov qij qawj thiab nkawg tej ntoo loj nyob ze ntawd vau tag.
Thaum nag los ntaus lub ru tsev nrov daj daws, Duncan Maj mam muab nws lub xov tooj, qhib lub teeb thiab saib radar. Nws twb paub txoj kev nqis mus rau hauv qab tsev lawm. Cov neeg tuaj noj mov ntawm lwm cov rooj tau tig los saib nws.
Ib pliag xwb, nws zoo li nws muaj lwm lub zej zog. Lub no nyob hauv qhov tsaus ntuj, tab sis Johnathan Duncan ib txwm nrhiav tau nws txoj kev mus rau qhov ci.