Hnub tim 8 Lub Plaub Hlis Ntuj, cov neeg pov npav hauv Kansas City yuav raug nug kom txuas ntxiv se muag khoom rau kev nyab xeeb rau pej xeem mus ntxiv 20 xyoo ntawm tus nqi $484 lab. Yav dhau los, cov se no tau pab them rau cov kev pab cuam tseem ceeb xws li cov neeg txais xov 911 thiab cov neeg pab thaum muaj xwm txheej ceev. Tiam sis, zaum no, tsawg kawg $250 lab yuav coj mus them rau kev tsim kho ib lub tsev loj cuj hauv nroog, thiab yuav xav tau $375 lab ntxiv los them cov neeg ua hauj lwm thiab saib xyuas lub tsev ntawd. Qhov ntawd yog ntau tshaj ib nrab billion dollars ntawm cov neeg them se siv rau ib lub tsev loj cuj uas yuav tsis daws peb cov kev xav tau txog kev nyab xeeb rau pej xeem.
Kuv niaj hnub hnov los ntawm kuv cov neeg zej zog thoob plaws Kansas City txog lawv tej kev txhawj xeeb txog kev nyab xeeb rau pej xeem. Tej zaj lus hais txog kev tua neeg, kev siv zog nyiag tsheb, kev nyiag khoom hauv tsev ntau zaus thiab kev siv phom ua phem tsis tu ncua yog tej yam uas niaj hnub hnov. Tab sis ib lub tsev loj cuj hauv nroog yuav tsis daws tau cov teeb meem no vim cov kev ua txhaum xws li kev tua neeg, kev nyiag tsheb, kev nyiag khoom lossis kev ua khoom puas tsuaj tshaj $750 yog cov kev ua txhaum cai hauv lub xeev uas yuav raug tswj hwm hauv theem county. Cov neeg them se twb tab tom siv $301 lab rau tus nqi tsim kho ib lub tsev loj cuj tshiab hauv Jackson County lawm.
Raws li tus tswv cuab hauv Pawg Sab Laj Nroog rau Cheeb Tsam 6, kuv tau ua hauj lwm hauv Municipal Detention and Rehabilitation Committee kom los saib xyuas kom meej dua txog lub nroog qhov kev xav tau ib lub tsev loj cuj tshiab. Cov neeg feem ntau uas nkag mus rau hauv peb lub tsev loj cuj hauv nroog yog raug kaw vim ua txhaum me me — tso zis rau pej xeem chaw, pw sab nraum zoov, nkag mus rau lwm tus chaw yam tsis tau tso cai lossis ua tub sab nyiag khoom me me — thiab feem ntau yog cov neeg tsis muaj tsev nyob lossis tab tom ntsib kev mob hlwb uas tsis tau txais kev kho. Ntau leej tseem raug kaw hauv tsev loj cuj vim lawv lub hlwb tsis zoo txaus los mus hais plaub lossis tsuas yog vim lawv tsis muaj nyiaj them nyiaj txhiv tawm.
Tus Kws Txiav Txim hauv lub tsev hais plaub hauv nroog Martina Peterson tau hais tsis ntev los no rau KSHB tias, “Kuv xav tso lawv tawm, tab sis lawv tseem tsis tau ruaj khov txaus kom tso tawm tau vim lawv tseem hnov tej suab lus.”
“Qee leej ntawm cov neeg no yuav tsum nyob hauv tsev kho mob rau kev mob hlwb es tsis yog nyob hauv chaw rau kev kaw neeg thaum lawv tab tom mus dhau lub tsev hais plaub hauv nroog,” tus tswv cuab hauv Pawg Sab Laj Nroog Crispin Rea, lwm tus neeg txhawb nqa cov se rau tsev loj cuj, tau hais rau Martin City Telegraph.
Ib lub tsev loj cuj tshiab hauv nroog yuav tsis kho cov teeb meem no — nws tsuas yuav sau cov teeb meem ntawd los nyob rau ib qho chaw xwb. Cov neeg tsis muaj tsev nyob tseem tsis muaj tsev nyob thiab cov kev xav tau kev pab txog kev mob hlwb tseem tsis tau txais kev pab. Hais kom yooj yim: Ib lub tsev loj cuj tshiab hauv nroog yog lwm txoj kev daws teeb meem uas nqi kim heev thiab tsuas kho tau lub nplaim tsis kho lub hauv paus, uas yuav ua rau cov neeg uas nyob rau txoj kev pheej hmoo rov nkag mus tawm los hauv tsev loj cuj mus li.
Kansas City tsis tsim nyog yuav mus ua txoj hauj lwm kaw cov neeg uas lawv qhov kev ua txhaum loj tshaj plaws tsuas yog xav tau kev pab txog kev mob hlwb los ntawm cov kws tshaj lij. Txoj kev no raug nqi kim heev thiab tsis muaj lub siab hlub neeg, thiab nws tsis pab dab tsi los tiv thaiv kev ua txhaum cai thiab txhim kho peb cov txiaj ntsig ntawm kev nyab xeeb rau pej xeem.
Muaj dab tsi tshwm sim rau sab “kev pab kho kom rov zoo” ntawm lub chaw pab kho kom rov zoo thiab kev kaw neeg lawm?
Hauv xyoo 2019, cov kws pab tswv yim tau pom zoo kom muaj ib lub chaw pab cuam hauv zej zog los pab cov neeg raug kaw thaum nkag thiab tawm hauv tsev loj cuj, txhim kho cov txiaj ntsig thiab txo kev rov ua txhaum dua. Txawm li cas los xij, raws li ib feem ntawm daim ntawv pom zoo $2.3 lab rau lub nroog mus yuav av ntawm lub county, nws txwv tsis pub tso cov neeg raug kaw tawm ntawm qhov chaw ntawd, uas ua rau tsis tuaj yeem tsim lub chaw pab cuam ntawd ua ke nrog lub tsev loj cuj. Ntxiv mus, cov se no tsis muaj nyiaj pab rau CRC lossis lwm yam zoo li ntawd.
Ib txoj kev daws teeb meem tiag tiag rau kev rov ua txhaum dua, kev nyab xeeb rau pej xeem
Txij Lub Kaum Hli 2024, kuv tau ua hauj lwm nrog kuv cov phooj ywg ua hauj lwm ua ke thiab lub tsev hais plaub hauv nroog ntawm ib lub tswv yim thov tsim ib lub chaw pab cuam hauv zej zog uas yuav txhim kho cov txiaj ntsig rau peb cov neeg raug kaw, txo kev rov ua txhaum dua thiab txhim kho kev nyab xeeb rau pej xeem.
Lub CRC no yuav ua raws li Criminal Mental Health Project los ntawm Miami-Dade County, Florida, uas tau pom kev rov ua txhaum dua txo qis los ntawm 76% mus rau 20%. Lub chaw no yuav muab cov kev pab cuam rau lub tsev hais plaub los nyob ua ke ib qho chaw thiab muaj chaw kho tshuaj lom, tsev nyob ib ntus thiab cov neeg coj kev saib xyuas los pab tib neeg kom tau txais tsev nyob, kev pov hwm kev noj qab haus huv, kev kho mob hlwb thiab hauj lwm. Cov kev daws teeb meem zoo li no txo peb txoj kev vam khom rau cov tsev loj cuj thiab yog li ntawd txo peb cov nqi tsev loj cuj, tab sis cov se tsev loj cuj no yuav tsis muab nyiaj pab rau ib lub CRC.
Tam sim no tsis muaj phiaj xwm nrog cov se muag khoom uas tau thov tawm no los suav nrog lossis muab nyiaj pab rau kev kho kom rov zoo. Yog tsis muaj kev kho kom rov zoo, peb cov neeg raug kaw yuav tseem raug xa rov mus los hauv peb cov tsev hais plaub thiab kev tswj hwm tsev loj cuj, ua rau cov neeg them se poob ntau lab daus las ib xyoos yam tsis tau daws qhov laj thawj tias vim li cas lawv thiaj nyob hauv tsev loj cuj txij thaum pib.
Cov kev xaiv lwm yam hloov chaw rau tsev loj cuj txhim kho cov txiaj ntsig thiab txo peb txoj kev xav tau ib lub tsev loj cuj uas pab txuag nyiaj rau cov neeg them se thaum ua rau kev nyab xeeb rau pej xeem nce ntxiv.
Peb paub tias cov kev pab cuam hauv zej zog pab txuag nyiaj thiab txuag txoj sia thaum ua rau kev nyab xeeb rau pej xeem nce ntxiv — tab sis, xyoo dhau xyoo, Kansas City muab nyiaj tsis sib npaug rau kev tswj txoj cai ntau dua li tsev nyob, kev noj qab haus huv pej xeem thiab kev pab cov neeg tsis muaj tsev nyob. Rau txhua $1 uas peb siv rau kev noj qab haus huv pej xeem, peb siv $12 rau kev tswj txoj cai; rau txhua $1 uas peb siv rau tsev nyob, peb siv $12 rau kev tswj txoj cai; rau txhua $1 uas peb siv rau kev tsis muaj tsev nyob, peb siv $74 rau kev tswj txoj cai. Txhua xyoo, thaum kev siv nyiaj rau kev tswj txoj cai nce siab, kev ua txhaum cai kuj nce siab ib yam nkaus.
Cov thawj coj hauv Kansas City tau ua tsis tau zoo rau peb cov zej zog uas raug kev ua txhaum cai cuam tshuam loj tshaj plaws vim peb xav ua qhov uas yooj yim tshaj plaws rau kev nom kev tswv dua li ua qhov uas tsim nyog los txhim kho txiaj ntsig rau peb cov neeg. Peb tsis tau muab nyiaj txaus rau cov kev pab tseem ceeb xws li tsev nyob nqi pheej yig, kev saib xyuas kev puas siab puas ntsws thiab cov tsev kawm ntawv, tab sis ho muab kev tswj kev ua raws cai ua qhov tseem ceeb dua. Ib lub tsev loj cuj tshiab yuav tsum yog txoj kev xaiv kawg, tab sis txoj se no them nyiaj rau qhov ntawd ua ntej, uas tsim lub nra them se kim heev thiab tsis tsim nyog rau peb cov neeg nyob hauv nroog thaum uas tso tseg cov kev daws teeb meem tseem ceeb los pab kho lub neej rov qab uas muaj pov thawj tseeb tias pab txhim kho kev nyab xeeb rau pej xeem.
Koom nrog kuv thiab pov npav tsis pom zoo rau txoj se tsev loj cuj, thiab pov npav pom zoo rau daim ntawv cog lus nyiaj tsev kawm ntawv (school bond) kom muaj nyiaj pab peb cov tsev kawm ntawv thiab nqis peev rau peb cov menyuam thaum Lub Plaub Hli Ntuj hnub tim 8.
Johnathan Duncan sawv cev rau Kansas City lub Cheeb Tsam 6 ntawm Pawg Sab Laj Nroog.