Sa Abril 8, hihilingin sa mga botante ng Kansas City na palawigin ang sales tax para sa kaligtasan ng publiko nang 20 taon sa halagang $484 milyon. Sa nakaugalian, pinondohan ng buwis na ito ang mahahalagang serbisyo gaya ng mga 911 dispatcher at emergency responder. Ngunit sa pagkakataong ito, hindi bababa sa $250 milyon ang gagamitin para pondohan ang pagpapatayo ng isang kulungan ng lungsod, na may karagdagang $375 milyon na kakailanganin para sa mga tauhan at pagpapanatili ng pasilidad. Iyan ay mahigit kalahating bilyong dolyar mula sa mga nagbabayad ng buwis na gagastusin sa isang kulungan na hindi tutugon sa ating mga pangangailangan sa kaligtasan ng publiko.
Regular akong nakakarinig mula sa aking mga kapitbahay sa buong Kansas City tungkol sa kanilang mga alalahanin sa kaligtasan ng publiko. Karaniwan na ang mga kuwento tungkol sa mga pagpatay, marahas na pagnanakaw ng sasakyan, sunod-sunod na panloloob, at patuloy na karahasan gamit ang baril. Ngunit hindi matutugunan ng isang kulungan ng lungsod ang mga isyung ito dahil ang mga paglabag gaya ng sadyang pagpatay, pagnanakaw ng sasakyan (grand theft auto), pagnanakaw, o pinsala sa ari-arian na higit sa $750 ay mga krimen sa estado na hahawakan sa antas ng county. Ang mga nagbabayad ng buwis ay gumagastos na ng $301 milyon para sa gastos sa pagpapatayo ng isang bagong kulungan ng Jackson County.
Bilang konsehal ng lungsod para sa Ika-6 na Distrito, nagsilbi ako sa Municipal Detention and Rehabilitation Committee upang mas masusing suriin ang pangangailangan ng lungsod para sa isang bagong kulungan. Karamihan sa mga taong pumapasok sa sistema ng kulungan ng ating lungsod ay ikinukulong dahil sa maliliit na paglabag — pag-ihi sa pampublikong lugar, pagtulog sa labas, trespassing o maliit na pagnanakaw — at madalas ay walang tirahan o nakararanas ng hindi nagagamot na sakit sa pag-iisip. Marami ang nananatiling nakakulong dahil wala sila sa tamang kondisyon ng pag-iisip para humarap sa paglilitis o dahil lamang sa hindi nila kayang magbayad ng piyansa.
Binanggit kamakailan ni Municipal Court Judge Martina Peterson sa KSHB, “Gusto ko silang mapalaya, ngunit hindi pa sila stable para palayain dahil nakakarinig pa rin sila ng mga boses.”
“Ang ilan sa mga taong ito ay dapat nasa isang ospital para sa kalusugang pangkaisipan sa halip na sa isang sentro ng detensyon habang dumadaan sila sa sistema ng hukumang munisipal,” pahayag ni konsehal Crispin Rea, isa pang tagapagtaguyod ng buwis para sa kulungan, sa Martin City Telegraph.
Ang isang bagong kulungan ng lungsod ay hindi mag-aayos sa mga problemang ito — pagsasama-samahin lamang nito sa iisang lugar ang mga ito. Ang mga walang tirahan ay mananatiling walang bahay at ang mga pangangailangan sa kalusugang pangkaisipan ay hindi natutugunan. Sa madaling salita: Ang isang bagong kulungan ng lungsod ay isa na namang magastos na pansamantalang solusyon (Band-Aid solution) na magpapatuloy sa paulit-ulit na pagpasok at paglabas ng mga bulnerableng tao sa kulungan.
Hindi dapat gawain ng Kansas City ang magpakulong ng mga taong ang pinakamalaking krimen ay ang pangangailangan ng propesyonal na suporta sa kalusugang pangkaisipan. Ang hakbang na ito ay magastos at hindi makatao, at walang nagagawa upang pigilan ang krimen at mapabuti ang mga resulta ng ating kaligtasan ng publiko.
Ano ang nangyari sa bahaging “rehabilitasyon” ng sentro ng rehabilitasyon at detensyon?
Noong 2019, nagrekomenda ang mga consultant ng isang community resource center para suportahan ang mga bilanggo na pumapasok at lumalabas sa kulungan, na magpapabuti sa mga resulta at magbabawas ng recidivism. Gayunpaman, bilang bahagi ng $2.3 milyon na kasunduan para bilhin ng lungsod ang lupa mula sa county, ipinagbabawal nito ang pagpapalaya ng mga bilanggo sa mismong lugar, kaya epektibong ipinagbabawal ang pagtatayo ng center kasama ng kulungan. Bukod pa rito, hindi kasama sa buwis na ito ang pondo para sa CRC o anumang katulad nito.
Isang tunay na solusyon para sa recidivism, kaligtasan ng publiko
Mula noong Oktubre 2024, nakikipagtulungan ako sa aking mga kasamahan at sa hukumang munisipal sa isang panukala para sa isang community resource center na magpapabuti sa mga resulta para sa ating mga bilanggo, magbabawas sa recidivism at magpapabuti sa kaligtasan ng publiko.
Ang CRC na ito ay ibabase sa Criminal Mental Health Project mula sa Miami-Dade County, Florida, na nakakita ng pagbaba ng recidivism mula 76% hanggang 20%. Ilalagay ng pasilidad na ito sa iisang sentrong lugar ang mga serbisyo at tulong para sa hukuman at magsasama ng isang detox center, transitional housing at mga care navigator para tulungan ang mga tao na makakuha ng pabahay, health insurance, pangangalaga sa kalusugang pangkaisipan at mga trabaho. Ang mga solusyong tulad nito ay nagbabawas sa ating pag-asa sa mga kulungan at sa gayon ay nagbabawas sa ating mga gastos sa kulungan, ngunit ang buwis na ito para sa kulungan ay hindi magpopondo ng isang CRC.
Sa kasalukuyan, walang plano sa iminumungkahing sales tax na isama o pondohan ang rehabilitasyon. Kung walang rehabilitasyon, patuloy na paulit-ulit na dadaan ang ating mga bilanggo sa ating mga hukuman at sistema ng kulungan, na gagastusan ng mga nagbabayad ng buwis ng milyon-milyong dolyar kada taon nang hindi tinutugunan kung bakit sila nakulong sa simula pa lang.
Ang mga alternatibo sa kulungan ay nagpapabuti ng mga resulta at nagbabawas sa ating pangangailangan para sa isang kulungan, na nakakatipid ng pera ng mga nagbabayad ng buwis habang pinapataas ang kaligtasan ng publiko.
Alam natin na ang mga mapagkukunan ng komunidad ay nakakatipid ng pera at nakakaligtas ng buhay habang pinapataas ang kaligtasan ng publiko — ngunit, taon-taon, di-hamak na mas malaki ang ipinopondo ng Kansas City sa pagpapatupad ng batas kaysa sa pabahay, pampublikong kalusugan at tulong sa mga walang tirahan. Para sa bawat $1 na ginagastos natin sa pampublikong kalusugan, gumagastos tayo ng $12 sa pagpapatupad ng batas; para sa bawat $1 na ginagastos natin sa pabahay, gumagastos tayo ng $12 sa pagpapatupad ng batas; para sa bawat $1 na ginagastos natin sa kawalan ng tirahan, gumagastos tayo ng $74 sa pagpapatupad ng batas. Taon-taon, habang tumataas ang gastos sa pagpapatupad ng batas, tumataas din ang krimen.
Nabigo ang mga pinuno ng Kansas City sa ating mga komunidad na pinaka-naapektuhan ng krimen dahil mas pinipili nating gawin kung ano ang pinakamadali sa politika kaysa sa kung ano ang kinakailangan upang mapabuti ang kalagayan ng ating mga mamamayan. Hindi natin sapat na pinondohan ang mahahalagang mapagkukunan gaya ng abot-kayang pabahay, pangangalaga sa kalusugang pangkaisipan at mga paaralan, at sa halip ay inuna ang pagpapatupad ng batas. Ang isang bagong kulungan ay dapat na huling opsyon lamang, ngunit ang buwis na ito ang unang nagpopondo rito, na lumilikha ng magastos at hindi kinakailangang pasanin sa buwis sa ating mga residente habang napag-iiwanan ang mahahalagang solusyon sa rehabilitasyon na may napatunayang rekord sa pagpapabuti ng kaligtasan ng publiko.
Samahan ninyo ako at bumoto ng hindi sa buwis para sa kulungan, at bumoto ng oo sa school bond para pondohan ang ating mga paaralan at mamuhunan sa ating mga anak sa Abril 8.
Kinakatawan ni Johnathan Duncan ang Ika-6 na Distrito ng Konseho ng Lungsod ng Kansas City.