တၢ်ဒုးအိၣ်ထီၣ်တၢ်လဲလိာ်– ဖဲနံၣ် ၃၀ အတီၢ်ပူၤ ခဲစၢးစံထံၣ် ဃုထၢထီၣ် ပှၤလဲၣ်တံၣ်နိၣ်ဖိ ၂ ဂၤ အဆိကတၢၢ်ဆူ ဝ့ၢ်ကီၣ်စ့ၣ် အပူၤ

ဖဲနံၣ် ၃၀ အတီၢ်ပူၤ အံၤမ့ၢ်တၢ်အဆိကတၢၢ်တဘျီလၢ ပှၤလဲၣ်တံၣ်နိၣ်ဖိ အခၢၣ်စးပာ်ဃုာ်ဝဲဖဲ ခဲစၢးစံထံၣ် ကီၣ်စ့ၣ် အပူၤန့ၣ်လီၤ.

ဘၣ်ဆၣ် သနာ်က့ ပှၤနီၣ်ဂံၢ်စှၤ အတၢ်ပာ်ဖျါထီၣ်အသးအံၤ မ့ၢ်တၢ်လၢအရ့ဒိၣ်သနာ်က့ ကီၣ်စ့ၣ်ပှၤဘၣ်မူဘၣ်ဒါအသီခံဂၤ လၢအစိာ်န့ၢ် တၢ်ကလုာ်စုာ်စုာ်အံၤဆူ ကီၣ်စ့ၣ်အပူၤန့ၣ် စံးဝဲလၢ တၢ်လၢအရ့ဒိၣ်ကတၢၢ်န့ၣ် မ့ၢ်တၢ်လၢအဝဲသ့ၣ်ကမၤကဒီးလၢခံ ဒီး အဝဲသ့ၣ်ကသူ အဝဲသ့ၣ်အတၢ်လဲၤခီဖျိ ဒ်ပှၤလဲတံၣ်နိၣ် (Latino) တဖၣ်လၢအအိၣ်ဆိးလၢ ခဲစၢးစံထံၣ် အပူၤအသိး ဒ်လဲၣ်ဒ်လဲၣ် လၢကမၤစၢၤတီခိၣ်ရိၤမဲဝ့ၢ်အံၤအဂီၢ်န့ၣ်လီၤ.

Johnathan Duncan, လၢအမ့ၢ် ကီၣ်စ့ၣ်ပှၤဘၣ်မူဘၣ်ဒါ အသီလၢ ဘၣ်တၢ်ဃုထၢထီၣ်အီၤလၢ ကီၢ်ရ့ၣ် တၢ်နီၤဖး ၆ အဂီၢ်န့ၣ် စံးဝဲဒၣ်လၢ အမ့ၢ် ကီၣ်စ့ၣ်ပှၤဘၣ်မူဘၣ်ဒါသ့ၣ်တဖၣ် အမူအဒါလၢ ကဘၣ်အိၣ်ဆူၣ်အိၣ်ချ့လၢ ပှၤတဝၢအဂီၢ် ဒီး ပာ်ဖှိၣ်မၤသကိးတၢ်ပၢတၢ်ပြးန့ၣ်လီၤ.

ပှၤအိၣ်ဖျဲၣ်ထီၣ်လၢ KC ဒီး မ့ၢ်ကီၣ်စ့ၣ်ပှၤဘၣ်မူဘၣ်ဒါလၢ ဘၣ်တၢ်ဃုထၢထီၣ်အီၤလၢ ကီၢ်ရ့ၣ် တၢ်နီၤဖး ၄ အဂီၢ်, Crispin Rea စံးဝဲဒၣ်လၢ တၢ်အိၣ်ဒီး တၢ်လဲၤခီဖျိလၢ တၢ်အိၣ်မူအပူၤ ဒ်ပှၤကလုာ်ဆံးတဂၤအသိးန့ၣ် မ့ၢ်တၢ်လၢအရ့ဒိၣ်ဒိၣ်မး လၢတၢ်ကတဲာ်ကတီၤသးလၢ မူဒါအသီအံၤအဂီၢ်န့ၣ်လီၤ.

အဝဲသ့ၣ် အကျဲလၢ အမၤတၢ်အိၣ်ဝဲ ကလီၤဆီလိာ်အသးဘၣ်ဆၣ်, Rea ဒီး Duncan ခံဂၤလၢာ် အိၣ်ဒီး တၢ်မုၢ်လၢ်တမံၤဃီလၢ ကသူၣ်ထီၣ် ဝ့ၢ်လၢ အဂ့ၤဒိၣ်ထီၣ် ဒီး အပူၤဖျဲးဒိၣ်ထီၣ် ခီဖျိ တၢ်မၤတၢ်လၢ ပှၤတဝၢအပူၤ ဒ်သိး ကဆီၣ်ထွဲ တၢ်ဆီတလဲအံၤအဂီၢ်န့ၣ်လီၤ.

‘ယဂုာ်ကျဲးစၢးမၤတၢ်ဆူၣ်ဆူၣ် ဒ်သိး ယကဒုးသ့ၣ်နီၣ်ထီၣ်က့ၤ ယနီၢ်ကစၢ်အသးလၢ ယဟဲဖဲလဲၣ်အဂ့ၢ်’

Rea စံးဝဲဒၣ်လၢ ဖဲအဝဲဒိၣ်ထီၣ်ဘၣ်လၢ ပှၤတဝၢလၢ အကျိၣ်စ့နုာ်စှၤအပူၤ ဖဲ East Side လၢ ခဲစၢးစံထံၣ် အပူၤန့ၣ်, အဝဲထံၣ်ဘၣ်ဝဲလၢ အပှၤတဝၢန့ၣ် တဒိးန့ၢ်ဘၣ် တၢ်ဘျၢလီၤကျိၣ်စ့မၤစၢၤဘၣ်, ဒီး တၢ်မၤကမၣ်သဲစး ဒီး ပှၤကရူၢ်အၢသီ အတၢ်ဟူးတၢ်ဂဲၤ အိၣ်ဝဲအါမးန့ၣ်လီၤ.

အဝဲစံးဝဲဒၣ်လၢ အမိၢ် အတၢ်ဖံးတၢ်မၤလၢ ပှၤတဝၢအပူၤ ဖဲ Local Investment Commission န့ၣ် ဒုးအိၣ်ထီၣ် တၢ်ဘၣ်ဒိဘၣ်ထံးလၢအဖီခိၣ်, လၢအထုးန့ၢ်အသး ဒ်သိး ကနုာ်လီၤမၤ ကမျၢၢ်အတၢ်ဖံးတၢ်မၤ ဒ်တၢ်ဖံးအီၣ်မၤအီၣ်အသိး ဒ်သိး ကဆီၣ်ထွဲမၤစၢၤအါထီၣ် အပှၤတဝၢအဂီၢ်န့ၣ်လီၤ.

အဝဲအနီၢ်ကစၢ် အတၢ်လဲၤခီဖျိ လၢအဒိၣ်ထီၣ်ဘၣ်လၢ ပှၤတဝၢလၢ အတၢ်ဂံၢ်တၢ်ဘါ ဒီး တၢ်မၤစၢၤစှၤအပူၤ ဖဲ ခဲစၢးစံထံၣ်, ဒီး အတၢ်မၤတၢ်လၢ ပှၤတဝၢအပူၤ ဒ်ပှၤစိာ်မိာ်စိာ်ကျဲတဂၤအသိးန့ၣ် ဟ့ၣ်လီၤအီၤ တၢ်ထံၣ်လၢ အလုၢ်ဒိၣ်ပှ့ၤဒိၣ်န့ၣ်လီၤ.

“ယတူၢ်ဘၣ်လၢ ယတၢ်ဘျးစဲဒီး ပှၤတဝၢန့ၣ် ကပျဲယၤလၢ ယကလဲၤထံၣ်လိာ်သးဒီး ပှၤဂ့ၢ်ဝီသ့ၣ်တဖၣ် ဖဲအဝဲသ့ၣ်အိၣ်ဝဲအလီၢ် ဒီး ကဒုးအိၣ်ထီၣ် တၢ်နာ်န့ၢ်လၢ ဝ့ၢ်ပဒိၣ်အဖီခိၣ် လၢပှၤလၢ အတဒိးန့ၢ်ဘၣ် ပှၤပာ်ဖျါထီၣ်အဝဲသ့ၣ်အဂ့ၢ် ထီဘိဖဲ ဝ့ၢ်ပဒိၣ်ရူ အပူၤသ့ၣ်တဖၣ်အဂီၢ်န့ၣ်လီၤ,” Rea စံးဝဲဒၣ်န့ၣ်လီၤ.

Duncan စ့ၢ်ကီး ဒ်သိးဒီး Rea အသိး, ပာ်ဖျါထီၣ်ဝဲ တၢ်ပာ်ဃုာ်မၤသကိးတၢ်လၢ ပှၤတဝၢအပူၤ အတၢ်ရ့ဒိၣ်အဂ့ၢ်န့ၣ်လီၤ.

Duncan စံးအါထီၣ်ဝဲလၢ အဝဲနာ်ဝဲလၢ တၢ်ပာ်ဖှိၣ်မၤသကိးတၢ်ပၢတၢ်ပြး ဃုာ်ဒီး လီၢ်ကဝီၤပှၤအိၣ်တၢ်ဖိသ့ၣ်တဖၣ်န့ၣ် မ့ၢ်တၢ်လၢအရ့ဒိၣ်ဒိၣ်မးန့ၣ်လီၤ.

Duncan ပာ်ဖျါထီၣ်ဝဲလီၤတံၢ်လီၤဆဲး လၢအတၢ်ပာ်ဖျါထီၣ်တၢ်ပာ်သး လၢအဘျးစဲဒီး အပှာ်ယဲၤသန့အပူၤ ဘၣ်ဃးဒီး အတၢ်က့ၢ်ဂီၤ ဒီး အတၢ်လဲၤခီဖျိ လၢအဒိၣ်ထီၣ်ဘၣ် ဒ်ပှၤဖံးသူ, မဲးကစံၣ်ကဲၣ်-အမဲရကဲၣ်, ပှၤဖံးဝါ ပိာ်ခွါတဂၤအသိး ဒီး အတၢ်ဂုာ်ကျဲးစၢးလၢ ကတူၢ်လိာ် တၢ်က့ၢ်ဂီၤသ့ၣ်တဖၣ်အံၤခဲလၢာ် အဂ့ၢ်အါထီၣ်န့ၣ်လီၤ. အဝဲစံးဝဲဒၣ်လၢ အတၢ်ထံၣ်လၢခါဆူညါ လၢ ခဲစၢးစံထံၣ် အဂီၢ်န့ၣ် ဒိးသန့ၤထီၣ်အသးလၢ အတၢ်အိၣ်မူအတၢ်က့ၢ်ဂီၤ အဖီခိၣ်န့ၣ်လီၤ.

အဝဲစံးဝဲဒၣ် ထဲဒၣ်ပှၤကလုာ်ဖီၣ်ဆံးအပှၤခၢၣ်စးဖိတဖၣ် အိၣ်လၢမူဒါအလီၢ်န့ၣ် တလၢပှဲၤလၢၤဘၣ်, ပှၤတဝၢဖိတဖၣ် အဲၣ်ဒိးသ့ၣ်ညါဝဲလၢ ပှၤဘှီဂ့ၤထီၣ်န့ၢ် အဝဲသ့ၣ်အတၢ်ဂ့ၢ်ကီတဖၣ်လီၤ.

“ပကဟဲအိၣ်ဆူပှၤတဝၢအံၤတဖၣ်အအိၣ် ဒီးဆီၣ်ထွဲမၤစၢၤအဝဲသ့ၣ်န့ၣ် အရ့ဒိၣ်ဝဲလီၤ – တၢ်အိၣ်ဒီးပှၤခၢၣ်စးန့ၣ် တမ့ၢ်တၢ်ထူၣ်ဖျဲးဘၣ်,” Duncan စံးဝဲလီၤ.

တၢ်ဘျးစဲဒီး ပှၤတဝၢ

တၢ်သူၣ်ထီၣ်တၢ်ရ့လိာ်မုာ်လိာ်ဘူးဘူးတံၢ်တံၢ် လၢအဝဲသ့ၣ်အပှၤတဝၢအပူၤန့ၣ် မ့ၢ်တၢ်လၢအရ့ဒိၣ်ကတၢၢ် လၢ Rea ဒီး Duncan ခံဂၤလၢာ်အဂီၢ် ဒီးအဝဲသ့ၣ်ခံဂၤလၢာ် သူဝဲအဝဲသ့ၣ်အတၢ်ဖံးတၢ်မၤအစိၤ ဒီးတၢ်ဃုထၢအတၢ်ဟူးတၢ်ဂဲၤတဖၣ် ဒ်သိးကမၤတၢ်အံၤ လၢပှၤတဝၢအတၢ်ကရၢကရိအကလုာ်ကလုာ်အပူၤလီၤ.

တချုးလၢ Rea နုာ်လီၤတြီာ်လိာ်သးလၢ ဝ့ၢ်ကီၣ်စ့ၣ်ဒံးဘၣ်န့ၣ် အဝဲမၤတ့ၢ်တၢ်လၢ Mattie Rhodes, လၢအမ့ၢ် တၢ်ကရၢကရိလၢတဃုအဘျုး လၢအအိၣ်လၢ ခဲစၢးစံထံၣ် အပူၤ ဒီးဒ်အဝဲသ့ၣ်အပှာ်ယဲၤသန့ ပာ်ဖျါဝဲအသိး အဝဲသ့ၣ်အတၢ်ပညိၣ်မ့ၢ်ဝဲ ဒ်သိးကမၤစၢၤတ့ထီၣ် ဝ့ၢ်လၢအဂံၢ်ဆူၣ်ထီၣ် ခီဖျိတၢ်မၤစၢၤ ပှၤလၢအတူၢ်ဘၣ်တၢ်ညီကတၢၢ်တဖၣ် ခီဖျိပှၤတဝၢအကျဲကူၣ်အကလုာ်ကလုာ်န့ၣ်လီၤ.

Rea မၤတၢ်လၢ အဝဲသ့ၣ်အပှၤနဲၣ်တၢ်ကမံးတံာ်အပူၤ ဒ်ပှၤမၤကလီတၢ်တဂၤအသိးလီၤ. အဝဲအတၢ်မၤမ့ၢ်ဝဲ တၢ်မၤသကိးတၢ်ဒီးပှၤတဝၢ ဒ်သိးကဟ့ၣ်ထီၣ်တၢ်ထံၣ်တၢ်ပာ်သးဆူ ပှၤပၢၤကီၢ်အအိၣ် ဒီးမၤစၢၤဟံၣ်ဖိဃီဖိတဖၣ် ဒ်သိးကဃုန့ၢ်တၢ်မၤစၢၤတဖၣ် လၢကမၤစၢၤအဝဲသ့ၣ်လၢ တၢ်ဂ့ၢ်ကီအကလုာ်ကလုာ်အဂီၢ်လီၤ.

John Fierro, လၢအမ့ၢ် Mattie Rhodes အပှၤပၢဆှၢတၢ်ခိၣ် ဒီး CEO စံးဝဲဒၣ် ဖဲ Rea မၤတၢ်ဒီး Mattie Rhodes အဆၢကတီၢ်န့ၣ် အဝဲမၤစၢၤဒုးအိၣ်ထီၣ်ဝဲ Latino Advocacy Task Force လၢတၢ်စံးဆၢက့ၤ တၢ်မၤသံမၤဝီပှၤဂုာ်ဂၤ အနီၢ်ဂံၢ်အါထီၣ်ဝဲ လၢအဘၣ်ထွဲဒီး ပှၤဟံၣ်စပဲန့း (Hispanic) သးစၢ်ဖိတဖၣ် ဒီးအဝဲတူၢ်ဘၣ်ဝဲလၢ မူဒါတခါအံၤ မၤစၢၤကတဲာ်ကတီၤန့ၢ် Rea ဒ်သိးကမၤတၢ်လၢ ဝ့ၢ်ကီၣ်စ့ၣ်အပူၤလီၤ.

“အဝဲပာ်ဖျါထီၣ်ဝဲလၢ အတၢ်ဖံးတၢ်မၤအစိၤဒီတစိၤညါလၢ အဝဲမ့ၢ်ပှၤခိၣ်ပှၤနၢ်တဂၤ လၢပှၤခဲလၢာ်အဂီၢ်လီၤ. အဝဲပာ်ကဖုလဲာ်အသးလၢ အပှၤဟံၣ်စပဲန့း (Hispanic) အတၢ်ဆဲးတၢ်လၤဒိၣ်မး, ဘၣ်ဆၣ် အဝဲမ့ၢ်ပှၤလၢ အဂုာ်ကျဲးစၢး ဒုးအိၣ်ထီၣ်တၢ်ဆီတလဲ လၢပှၤတဂၤစုာ်စုာ် ဒီးပှၤတဝၢခဲလၢာ်အဂီၢ်လီၤ,” Fierro စံးဝဲလီၤ.

Sunrise movement KC အဒ့, လၢအမ့ၢ် ထံကီၢ်ဒီဘ့ၣ် တၢ်ကရၢကရိလၢတဃုအဘျုး လၢအမၤတၢ်ဒ်သိး ကပာ်တၢ်ဂ့ၢ်ဘၣ်ဃး မူခိၣ်ကလံၤသီတၢ်ဆီတလဲ ဒ်တၢ်အရ့ဒိၣ်ကတၢၢ်တခါအသိးန့ၣ် ဆီၣ်ထွဲဝဲ Duncan ဖဲအတၢ်ဃုထၢအတၢ်ဟူးတၢ်ဂဲၤအဆၢကတီၢ်လီၤ.

Laela Zaidi, လၢအမ့ၢ် ပှၤမၤကလီတၢ်ခိၣ်နၢ်တဂၤ လၢအမၤတၢ်ဃုထၢအတၢ်မၤလၢ Duncan အတၢ်ဃုထၢအတၢ်ဟူးတၢ်ဂဲၤအဂီၢ်န့ၣ် စံးဝဲဒၣ် လီၢ်ကဝီၤတၢ်ဟူးတၢ်ဂဲၤကရူၢ်အံၤ အဲၣ်ဒိးန့ၢ်ဝဲ န့ဆၢၣ်တၢ်အၢၣ်လီၤအသီ (green new deal) လၢဝ့ၢ်အံၤအဂီၢ် ဒီးအဲၣ်ဒိးလၢ ဝ့ၢ်အံၤကဘျၢလီၤကျိၣ်စ့လၢ ပှၤဖံးသူ, ပှၤလဲတံနိၣ် (Latino), ပှၤမၤတၢ်ဖိပှၤတဝၢတဖၣ် ဒီးတၢ်လီၢ်တဖၣ် လၢတၢ်ပာ်တ့ၢ်ကွံာ်အီၤလၢ တၢ်တ့ဘှီတၢ်သိၣ်တၢ်သီအပူၤ လၢတၢ်စံၣ်စိၤတဲစိၤအပူၤန့ၣ်လီၤ.

လၢအဝဲအဂီၢ်န့ၣ်, အရ့ဒိၣ်ဝဲလၢ ပှၤလၢအအိၣ်လၢ လီၢ်လၤဖှိၣ်တဖၣ် အတၢ်အိၣ်မူအပူ (story) ကလီၤဂာ်လိာ်အသး မ့တမ့ၢ် အတၢ်ဂဲၤလိာ်ကီခဲတဖၣ် ကဒ်သိးလိာ်အသးလီၤ, မ့ၢ်လၢ တၢ်အံၤမၤဘၣ်ဒိဝဲ အဝဲသ့ၣ်အတၢ်ထံၣ်လၢ ဟီၣ်ခိၣ်ချၢ ဒီး အဝဲသ့ၣ်အတၢ်လုၢ်ဒိၣ်ပှ့ၤဒိၣ်တဖၣ်အဃိလီၤ.

“လၢယဂီၢ်န့ၣ် တၢ်ခၢၣ်စးအံၤ တဘၣ်မ့ၢ်ထဲ ပှၤတဂၤလၢ အက့ၢ်အဂီၤလီၤဂာ်ဒီးယၤဘၣ်, လိၣ်ဝဲလၢ ကမ့ၢ်ပှၤလၢ အသ့ၣ်ညါ တၢ်ရဲၣ်ကျဲၤတၢ် ဒီး တၢ်ဆၢတဲာ်တၢ် မ့ၢ်လၢ လီၢ်လၤအံၤ အစိအကမီၤအိၣ်အါမးအဃိလီၤ,” Zaidi တဲဝဲလီၤ.

အဝဲနာ်ဝဲလၢ Duncan မ့ၢ်ပှၤတဂၤလၢ အပာ် ပှၤတဝၢလၢ အခိၣ်အဃၢၤထီဘိ ဒီး ဒိကနၣ်တၢ်လီၤ, Zaid တဲဝဲ ဒီး ပာ်ဖျါထီၣ်ဝဲလၢ ဖဲအဝဲမၤသကိးတၢ်ဒီးအီၤအခါ အဝဲတူၢ်ဘၣ်ဝဲလၢ အဘၣ်တၢ်ကွၢ်ထွဲပာ်ကဲအီၤ ဒီး လၢအဝဲအဂီၢ် တၢ်အံၤမ့ၢ် တၢ်လၢအပာ်ဖျါထီၣ်က့ၤ အတၢ်အိၣ်မူအပူလီၤ.

‘တၢ်အံၤဟ့ၣ် ပပှၤသးစၢ်တဖၣ် လၢ တၢ်မုၢ်လၢ်’

တၢ်ကဲထီၣ် တၢ်ကလုၢ်လၢ ပှၤတဝၢလၢ အတၢ်ခၢၣ်စးစှၤတဖၣ်အဂီၢ်န့ၣ် မ့ၢ်တၢ်လၢ ပှၤဘၣ်တၢ်ဃုထၢအီၤခံဂၤလၢာ် ပာ်အီၤလၢ တၢ်အရ့ဒိၣ်ကတၢၢ်, ဘၣ်ဆၣ် တမ့ၢ်ထဲတၢ်အံၤတမံၤဧိၤဘၣ်.

တၢ်ကျဲးစၢးပာ်လီၤ တၢ်ဒိဂ့ၤတဲာ်ဘၣ်, လီၤဆီဒၣ်တၢ် လၢသးစၢ်တဖၣ်အကျါန့ၣ်, မ့ၢ်စ့ၢ်ကီး တၢ်အရ့ဒိၣ်တကွီၢ် လၢ အဝဲသ့ၣ် အတၢ်အိၣ်ဖျါလၢ ကမျၢၢ်အမဲာ်ညါအပူၤလီၤ.

Rea တဲဝဲလၢ တၢ်ကူၣ်ဘၣ်ကူၣ်သ့ ဒီး တၢ်ဘျးစဲဒီး သးစၢ်တဖၣ်န့ၣ် မ့ၢ်တၢ်အရ့ဒိၣ်တကွီၢ် လၢအတၢ်လဲၤကျဲ ဆူ ဝ့ၢ်ကီၣ်စ့ၣ် အပူၤလီၤ.

ဖဲအဝဲမၤတၢ်ဒီး Mattie Rhodes အဆၢကတီၢ်န့ၣ်, အဝဲမၤတ့ၢ်စ့ၢ်ကီး ဒ် ကရူၢ်ခိၣ်ခံ လၢ ခဲစၢးစံထံၣ် ကမျၢၢ်ကၠိဘိၣ်ကမံးတံာ် (Kansas City Public School Board) အဂီၢ်, ဒီးမၤသကိးတၢ်ဒီး Hispanic ကၠိဖိတဖၣ် လၢ Northeast High School လီၤ.

“လၢယတၢ်မၤအစိၤအါတက့ၢ်အပူၤ ယမ့ၢ် ပှၤမဲးကစံၣ်ကီၢ်-အမဲရကၤဖိ ထဲတဂၤဧိၤ လၢတၢ်မၤလီၢ်တဖၣ်န့ၣ်အပူၤ, အဃိ ယသ့ၣ်ညါလၢ ဖဲယအိၣ်လၢ လီၢ်လၤအဝဲန့ၣ်အခါ တၢ်ပာ်လီၤ တၢ်ဒိဂ့ၤတဲာ်ဘၣ် လၢ ပှၤလၢအကွၢ်ထီၣ်နၤတဖၣ်အဂီၢ်န့ၣ် အရ့ဒိၣ်ထဲလဲၣ်လီၤ,” Rea တဲဝဲလီၤ.

Edgar Palacios လၢအအိၣ်ဒီး Latinx Education Collaborative, လၢအမ့ၢ် ကရၢတခါလၢ အသးစဲ တၢ်သူၣ်ထီၣ် Latino ပှၤတဝၢ ဘၣ်ဃးဒီး တၢ်ကူၣ်ဘၣ်ကူၣ်သ့ အတၢ်ဂ့ၢ်တဖၣ်န့ၣ်, တဲသကိးစ့ၢ်ကီးဝဲလၢ တၢ်ဆၢကတီၢ်အံၤ မ့ၢ်တၢ်ဆၢကတီၢ်လၢ အလီၤသးခု လၢ Latino ပှၤတဝၢ လၢ ခဲစၢးစံထံၣ် အပူၤအဂီၢ်လီၤ.

Palacios တဲဝဲလၢ Rea မ့ၢ်ပှၤလၢ အပာ်ဖျါထီၣ်က့ၤ ဒီး မ့ၢ်ပှၤတဝၢအခၢၣ်စး နီၢ်နီၢ်တဂၤလီၤ. အဝဲမ့ၢ် ပှၤတဂၤလၢ အအိၣ်ဖဲန့ၣ်ထီဘိ ဒီး အိၣ်ဘူးတံၢ်ဒီး တၢ်ဂ့ၢ်ကီတဖၣ် လၢဝ့ၢ်ပူၤလီၤ.

အဝဲသးခုဝဲလၢ Rea သးအိၣ် ဒီး သ့ၣ်ညါ ဘၣ်ဃးဒီး ကၠိအကျိၤအကျဲအဃိလီၤ.

“အဝဲနၢ်ပၢၢ်... ထံရူၢ်ကီၢ်သဲး ဒီး တၢ်သိၣ်တၢ်သီကျဲတဖၣ် အဃိ ခဲအံၤ ပအိၣ်ဒီးပှၤတဂၤလၢ ဝ့ၢ်ကီၣ်စ့ၣ်အပူၤလၢ အနၢ်ပၢၢ် တၢ်ကူၣ်ဘၣ်ကူၣ်သ့အကျဲ ဒီး ပပှၤတဝၢအသးခံမံၤလၢာ်န့ၣ် မ့ၢ်တၢ်လၢအဂ့ၤဒိၣ်မးလီၤ,” Palacios စံးဝဲလီၤ.

တၢ်ဒိကနၣ် သူၣ်ဘီၣ်သးစၢ်တဖၣ် အကလုၢ်န့ၣ် တၢ်ဘၣ်ဒိဘၣ်ထံး လၢအဂ့ၤအိၣ်ဝဲလီၤ, Duncan စံးဝဲဖဲအဝဲနီၤဟ့ၣ် အတၢ်လဲၤခီဖျိ လၢအမၤသကိးတၢ်ဒီး စိၤသီသူၣ်ဘီၣ်သးစၢ်တဖၣ်အခါလီၤ.

“ယဆိကမိၣ်လၢ ခီဖျိတၢ်ကရၢကရိ ဒီး တၢ်မၤသကိးတၢ်ဒီး သူၣ်ဘီၣ်သးစၢ်ကရၢတဖၣ် ဒ်သိး Sunrise, ဒီး Vote16 ဒီး တၢ်ဒိကနၣ် အဝဲသ့ၣ်အတၢ်ဘၣ်ယိၣ်တဖၣ်, တၢ်ပာ်ဃုာ်အဝဲသ့ၣ်, မ့ၢ်တၢ်ဖးအဝဲသ့ၣ်ဟ့ၣ်တသ့ဒံးဘၣ်သနာ်က့ – အဝဲသ့ၣ်တူၢ်ဘၣ်ဝဲလၢ အဝဲသ့ၣ်မ့ၢ် ပဒိၣ်အံၤအက့ၢ်အဂီၤတကူာ်သ့ဒံးဝဲလီၤ.” Duncan စံးဝဲလီၤ.

တၢ်ပာ်တ့ၢ် တၢ်ဘၣ်ဒိဘၣ်ထံးလၢအဂ့ၤ

ကီၣ်စ့ၣ်ပှၤဘၣ်မူဘၣ်ဒါခံဂၤလၢာ် ဒီး ပှၤလၢအဆီၣ်ထွဲအဝဲသ့ၣ်တဖၣ် စူၢ်က့ၤနာ်က့ၤဝဲလၢ အဝဲသ့ၣ်အတၢ်ထၢဖှိၣ်န့ၣ် တမ့ၢ်ထဲလၢ ခဲစၢးစံထံၣ် ဝ့ၢ်ဒိၣ်အပူၤဧိၤဘၣ် မ့မ့ၢ်တခီ တၢ်ဘၣ်ဒိဘၣ်ထံးလၢအလဲၢ်န့ၢ်အန့ၣ် ကအိၣ်ထီၣ်ဝဲလီၤ.

တၢ်ရဲၣ်တၢ်ကျဲၤ ခိၣ်နၢ်ဒိၣ် Erica Andrade လၢ El Centro သးခုဝဲဒိၣ်မး ဖဲအထံၣ်ဘၣ်လၢ Rea မၤနၢၤ တၢ်ထၢဖှိၣ်အခါလီၤ. အဝဲအကရၢလၢ တဃုအဘျုးအဖှိၣ်ဘၣ်တဖၣ် မၤတၢ်လၢ Wyandotte County အပူၤသနာ်က့, အဝဲစူၢ်က့ၤနာ်က့ၤဝဲလၢ တၢ်ဘၣ်ဒိဘၣ်ထံး ကအိၣ်ထီၣ်ဖဲန့ၣ်စ့ၢ်ကီးလီၤ.

Andrade စံးဝဲလၢ အဝဲမုၢ်လၢ်ဝဲလၢ, “တၢ်ထၢဖှိၣ်လီၤဆူ ဝ့ၢ်ကီၣ်စ့ၣ်အပူၤ, လၢအမၤဟးဂီၤကွံာ် တၢ်လီၤဟိလၢ ပှၤခၢၣ်စးတအိၣ်ဘၣ် အနံၣ် 30 န့ၣ်, ကထုးန့ၢ်ပှၤဂၤအသး ဒ်သီးကပာ်ဖှိၣ်မၤသကိးတၢ် လၢပှၤတဝၢအဂီၢ် အါထီၣ်လီၤ. အဝဲပာ်ဖျါထီၣ်ဝဲလၢ ပှၤလၢနဟ့ၣ်တၢ်ဖး လၢအဂီၢ်န့ၣ် အစိအကမီၤအိၣ်ဝဲ ဒီး ယမုၢ်လၢ်စ့ၢ်ကီးလၢ အဝဲကထုးန့ၢ် ပှၤ Latinos အဂၤတဖၣ်အသး ဒ်သိးကနုာ်လီၤထီဒါတၢ် လၢတၢ်ထၢဖှိၣ် အလီၢ်အလၤတဖၣ်အဂီၢ်လီၤ.”

တၢ်လီၤဂာ်လိာ်သး အဂၤတမံၤလၢ ကီၣ်စ့ၣ်ပှၤဘၣ်မူဘၣ်ဒါ ခံဂၤလၢာ်အိၣ်ဒီးအီၤန့ၣ် မ့ၢ်ဝဲအဝဲသ့ၣ် အတၢ်မုၢ်လၢ် ဖဲအဝဲသ့ၣ် မၤတၢ်လၢဝ့ၢ်အဂီၢ် အဆၢကတီၢ် ဝံၤအလီၢ်ခံလီၤ.

Rea စံးဝဲလၢ ဖဲအဝဲအိၣ်လၢ ကီၣ်စ့ၣ်အပူၤ အဆၢကတီၢ်န့ၣ် အဝဲမုၢ်လၢ်ဝဲလၢ ကမၤဂ့ၤထီၣ်က့ၤ တၢ်မုၢ်လၢ် ဒီး တၢ်နာ်န့ၢ်လၢ အလီၤမၢ်ကွံာ်ဝဲလၢ ကမျၢၢ်အတၢ်ထံၣ် လၢပဒိၣ်အဖီခိၣ် တနီၤန့ၣ်လီၤ.

“ယအဲၣ်ဒိးကွၢ်က့ၤ ယတၢ်ဆၢကတီၢ်လၢ ကီၣ်စ့ၣ်အပူၤ ဒီး ထံၣ်ဘၣ်တၢ်အစၢ လၢပထိၣ်ဒွးအီၤသ့ လၢတၢ်မၤစှၤလီၤ တၢ်မၤသံမၤဝီပှၤဂၤ မ့တမ့ၢ် တၢ်မၤကမၣ်သဲစး လၢတၢ်စုဆူၣ်ခီၣ်တကး ဒီး တၢ်မၤပူၤဖျဲးထီၣ် ခဲစၢးစံထံၣ် အပှၤတဝၢတဖၣ် — ဒ်ပှၤတဂၤလၢ အအိၣ်ဒီး သကဲာ်ပဝးလၢအဂ့ၤ ဒီး မၤတၢ်လၢ တၢ်တီတၢ်လိၤအပူၤ, လၢအပာ်လီၤတၢ်အဒိအတဲာ် တမ့ၢ်ထဲလၢ Hispanic ပှၤတဝၢအဂီၢ်ဧိၤဘၣ် မ့မ့ၢ်တခီ လၢဝ့ၢ်ဒီတဖျၢၣ်ညါအဂီၢ်လီၤ,” Rea စံးဝဲလီၤ.

ဒ်န့ၣ်အသိးစ့ၢ်ကီး, Duncan နီၤဟ့ၣ်ဝဲ အတၢ်ပညိၣ်လၢ ကမၤလီၤတံၢ်ဝဲလၢ ပှၤဖှီၣ်ဖိဲာ်ဖိ ဒီး ပှၤမၤတၢ်ဖိတဖၣ် တၢ်ကထံၣ်အဝဲသ့ၣ် ဒီး တၢ်ကနၢ်ဟူ အဝဲသ့ၣ်အကလုၢ် လၢအဝဲသ့ၣ် အပဒိၣ်အပူၤလီၤ.

Duncan စံးဝဲဒၣ်, “တၢ်မၤန့ၢ်တၢ်မၤနၢၤန့ၣ် မ့ၢ်ဝဲတၢ်ဃုထၢအတၢ်ဟူးတၢ်ဂဲၤအံၤ အတၢ်ပညိၣ်တခါလီၤ, ဘၣ်ဆၣ် တမ့ၢ်ဝဲတၢ်ပညိၣ်အခိၣ်အသ့ၣ်နီတဘျီဘၣ်.”

“တၢ်ဃုထၢအတၢ်ဟူးတၢ်ဂဲၤအံၤ အတၢ်ပညိၣ်ဖးယံာ်န့ၣ် မ့ၢ်ဒ်သိးကပာ်ဖှိၣ်မၤသကိးတၢ်ဒီး ကရဲးကရီထီၣ် ပှၤမၤတၢ်ဖိအပတီၢ်လၢ ယကီၢ်ရ့ၣ်အပူၤ, ဒ်အမ့ၢ်တၢ်ဟူးတၢ်ဂဲၤလၢအလဲၢ်ဒိၣ်မးတခါ အက့ၢ်အဂီၤ ဒ်သိးကသူၣ်ထီၣ်တၢ်စိတၢ်ကမီၤ လၢပှၤဖှီၣ်ဖိဲာ်ဖိ ဒီး ပှၤမၤတၢ်ဖိအပတီၢ်အကျါန့ၣ်လီၤ.”