ការបង្កើតផលវិជ្ជមាន៖ ទីក្រុងកាន់សាស់ស៊ីធី បោះឆ្នោតជ្រើសរើសជនជាតិឡាទីណូ ២ នាក់ដំបូង ឱ្យចូលក្នុងក្រុមប្រឹក្សាក្រុង ក្នុងរយៈពេល ៣០ ឆ្នាំ

ជាលើកដំបូងក្នុងរយៈពេល ៣០ ឆ្នាំ ក្រុមប្រឹក្សាទីក្រុងកាន់សាស់ស៊ីធី មានតំណាងជនជាតិឡាទីណូ។

ប៉ុន្តែ ទោះបីជាការតំណាងឱ្យក្រុមជនជាតិភាគតិចនោះមានសារៈសំខាន់ក៏ដោយ សមាជិកក្រុមប្រឹក្សាក្រុងថ្មីទាំងពីររូបដែលនាំមកនូវភាពចម្រុះនោះមកកាន់ក្រុមប្រឹក្សា បាននិយាយថា អ្វីដែលសំខាន់បំផុតនោះគឺអ្វីដែលពួកគេធ្វើបន្ទាប់ទៀត ហើយនិងរបៀបដែលពួកគេប្រើប្រាស់បទពិសោធន៍របស់ពួកគេក្នុងនាមជាជនជាតិឡាទីណូដែលរស់នៅក្នុងទីក្រុងកាន់សាស់ស៊ីធី ដើម្បីជួយដឹកនាំទីក្រុងនេះ។

Johnathan Duncan សមាជិកក្រុមប្រឹក្សាក្រុងដែលទើបជាប់ឆ្នោតសម្រាប់មណ្ឌលទី 6 បាននិយាយថា វាគឺជាកាតព្វកិច្ចរបស់សមាជិកក្រុមប្រឹក្សាក្រុងក្នុងការនៅក្បែរសហគមន៍ និងរួមគ្នាគ្រប់គ្រង។

Crispin Rea ដែលជាអ្នកដើមកំណើតទីក្រុងកាន់សាស់ស៊ីធី និងជាសមាជិកក្រុមប្រឹក្សាក្រុងដែលជាប់ឆ្នោតសម្រាប់មណ្ឌលទី 4 បាននិយាយថា ការមានបទពិសោធន៍ជីវិតផ្ទាល់ក្នុងនាមជាជនជាតិភាគតិច គឺមានសារៈសំខាន់ណាស់ក្នុងការត្រៀមខ្លួនសម្រាប់តួនាទីថ្មីនេះ។

ទោះបីជាវិធីសាស្ត្ររបស់ពួកគេអាចខុសគ្នា ប៉ុន្តែទាំង Rea និង Duncan សុទ្ធតែមានក្តីសង្ឃឹមរួមគ្នាក្នុងការកសាងទីក្រុងមួយដែលប្រសើរជាងមុន និងមានសុវត្ថិភាពជាងមុន តាមរយៈការធ្វើការនៅក្នុងសហគមន៍នានា ដើម្បីជំរុញឱ្យមានការផ្លាស់ប្តូរនោះ។

«ខ្ញុំខិតខំរំលឹកខ្លួនឯងជានិច្ចអំពីកន្លែងដែលខ្ញុំធ្លាប់រស់នៅ»

Rea បាននិយាយថា កាលគាត់ធំឡើងនៅក្នុងសង្កាត់ដែលមានប្រាក់ចំណូលទាបនៅតំបន់ East Side ក្នុងទីក្រុងកាន់សាស់ស៊ីធី គាត់បានឃើញថាសង្កាត់របស់គាត់មិនទទួលបានការវិនិយោគទេ ហើយមានអត្រាបទល្មើស និងសកម្មភាពក្រុមបងធំខ្ពស់។

គាត់បាននិយាយថា គាត់ទទួលបានឥទ្ធិពលពីការងាររបស់ម្តាយគាត់នៅក្នុងសហគមន៍នៅ Local Investment Commission ដែលបានជំរុញឱ្យគាត់ចាប់យកការងារបម្រើសាធារណៈជាអាជីព ដើម្បីគាំទ្រសហគមន៍របស់គាត់បន្ថែមទៀត។

បទពិសោធន៍ផ្ទាល់នៃការធំដឹងក្តីនៅក្នុងសង្កាត់ដែលខ្វះខាតធនធានក្នុងទីក្រុងកាន់សាស់ស៊ីធី និងការធ្វើការងារអាជីពនៅក្នុងសហគមន៍ បានផ្តល់ឱ្យគាត់នូវទស្សនវិស័យដ៏មានតម្លៃ។

Rea បាននិយាយថា៖ «ខ្ញុំមានអារម្មណ៍ថា ទំនាក់ទំនងរបស់ខ្ញុំជាមួយសហគមន៍ នឹងអនុញ្ញាតឱ្យខ្ញុំជួបជាមួយប្រជាពលរដ្ឋនៅកន្លែងដែលពួកគេរស់នៅ និងនាំមកនូវភាពជឿជាក់ខ្លះដល់រដ្ឋាភិបាលក្រុង សម្រាប់អ្នកដែលមិនសូវមានតំណាងនៅក្នុងសាលាក្រុង»។

Duncan ក៏ដូចជា Rea ដែរ បានចែករំលែកអំពីសារៈសំខាន់នៃការចូលរួមនៅក្នុងសហគមន៍។

Duncan បានបន្ថែមថា គាត់ជឿជាក់ថាវាមានសារៈសំខាន់ខ្លាំងណាស់ ក្នុងការធ្វើការលើការគ្រប់គ្រងរួមគ្នាជាមួយប្រជាពលរដ្ឋក្នុងមូលដ្ឋាន។

នៅក្នុងសេចក្តីថ្លែងការណ៍អំពីជំហរដែលភ្ជាប់ទៅនឹងគេហទំព័ររបស់គាត់ Duncan បានរៀបរាប់ព័ត៌មានលម្អិតបន្ថែមអំពីអត្តសញ្ញាណ និងប្រវត្តិរបស់គាត់ដែលបានធំដឹងក្តីក្នុងនាមជាបុរសស្បែកខ្មៅ ជនជាតិអាមេរិកដើមកំណើតម៉ិកស៊ិក និងស្បែកស ព្រមទាំងការខិតខំទទួលយកអត្តសញ្ញាណទាំងអស់នោះ។ គាត់បាននិយាយថា ចក្ខុវិស័យរបស់គាត់សម្រាប់ទីក្រុងកាន់សាស់ស៊ីធី គឺផ្អែកលើអត្តសញ្ញាណដែលគាត់បានឆ្លងកាត់ក្នុងជីវិតពិត។

គាត់បាននិយាយថា ការមានអ្នកតំណាងដែលជាមនុស្សមានពណ៌សម្បុរកាន់តំណែងនានាគឺលែងគ្រប់គ្រាន់ទៀតហើយ សមាជិកសហគមន៍ចង់ដឹងថាបញ្ហារបស់ពួកគេកំពុងត្រូវបានដោះស្រាយ។

“វាជារឿងសំខាន់ដែលយើងត្រូវបង្ហាញវត្តមានសម្រាប់សហគមន៍ទាំងនោះ – ការមានតំណាងមិនមែនជាការរំដោះខ្លួននោះទេ” នេះបើតាមសម្តីរបស់ Duncan។

ការផ្សារភ្ជាប់ជាមួយសហគមន៍

ការកសាងទំនាក់ទំនងជិតស្និទ្ធនៅក្នុងសហគមន៍របស់ពួកគេ គឺជាអាទិភាពខ្ពស់សម្រាប់ទាំង Rea និង Duncan ដែលអ្នកទាំងពីរបានចំណាយពេលក្នុងអាជីពការងារ និងយុទ្ធនាការបោះឆ្នោតរបស់ពួកគេ ដើម្បីធ្វើកិច្ចការនេះនៅក្នុងអង្គការសហគមន៍ផ្សេងៗ។

មុនពេលឈរឈ្មោះបោះឆ្នោតជាសមាជិកក្រុមប្រឹក្សាក្រុង Rea ធ្លាប់បានធ្វើការឱ្យ Mattie Rhodes ដែលជាអង្គការមិនស្វែងរកប្រាក់ចំណេញដែលមានមូលដ្ឋាននៅក្នុងទីក្រុងកាន់សាស់ស៊ីធី ដែលមានគោលដៅជួយកសាងទីក្រុងឱ្យកាន់តែរឹងមាំ ដោយការជួយដល់អ្នកដែលងាយរងគ្រោះបំផុតតាមរយៈយុទ្ធសាស្ត្រសហគមន៍ផ្សេងៗ នេះបើយោងតាមគេហទំព័ររបស់ពួកគេ។

Rea បានធ្វើជាសមាជិកក្រុមប្រឹក្សាភិបាលរបស់ពួកគេក្នុងនាមជាអ្នកស្ម័គ្រចិត្ត។ ការងាររបស់គាត់គឺកៀរគរឱ្យសហគមន៍ចូលរួមផ្តល់មតិយោបល់ដល់ប៉ូលិស និងជួយគ្រួសារនានាស្វែងរកធនធានដើម្បីជួយដោះស្រាយបញ្ហាផ្សេងៗជាច្រើន។

John Fierro ប្រធាន និងជានាយកប្រតិបត្តិរបស់ Mattie Rhodes បាននិយាយថា Rea បានជួយបង្កើត Latino Advocacy Task Force ក្នុងអំឡុងពេលដែលគាត់នៅជាមួយ Mattie Rhodes ដើម្បីឆ្លើយតបទៅនឹងការកើនឡើងនៃចំនួនករណីមនុស្សឃាតដែលពាក់ព័ន្ធនឹងក្មេងជំទង់ជនជាតិហ៊ីស្ប៉ានិក ដែលជាតួនាទីមួយដែលគាត់មានអារម្មណ៍ថា បានជួយរៀបចំ Rea ឱ្យត្រៀមខ្លួនដើម្បីបម្រើការងារក្នុងក្រុមប្រឹក្សាក្រុង។

“គាត់បានបង្ហាញឱ្យឃើញពេញមួយអាជីពការងាររបស់គាត់ថា គាត់គឺជាអ្នកដឹកនាំសម្រាប់មនុស្សគ្រប់គ្នា។ គាត់មានមោទនភាពយ៉ាងខ្លាំងចំពោះមរតកហ៊ីស្ប៉ានិករបស់គាត់ ប៉ុន្តែគោលបំណងរបស់គាត់គឺការបង្កើតឱ្យមានការផ្លាស់ប្តូរសម្រាប់បុគ្គលគ្រប់រូប និងសហគមន៍ទាំងអស់” នេះបើតាមសម្តីរបស់ Fierro។

សាខា Sunrise movement KC ដែលជាអង្គការមិនស្វែងរកប្រាក់ចំណេញថ្នាក់ជាតិដែលធ្វើការដើម្បីធ្វើឱ្យបញ្ហាអាកាសធាតុជាអាទិភាព បានគាំទ្រ Duncan ក្នុងអំឡុងពេលយុទ្ធនាការបោះឆ្នោតរបស់គាត់។

Laela Zaidi ដែលជាអ្នកដឹកនាំអ្នកស្ម័គ្រចិត្តដែលបានធ្វើការងារបោះឆ្នោតសម្រាប់យុទ្ធនាការរបស់ Duncan បាននិយាយថា ចលនាក្នុងតំបន់នេះចង់បានកិច្ចព្រមព្រៀងបៃតងថ្មីសម្រាប់ទីក្រុង ហើយចង់ឱ្យទីក្រុងវិនិយោគលើសហគមន៍ជនជាតិស្បែកខ្មៅ ជនជាតិឡាទីណូ សហគមន៍វណ្ណៈកម្មករ និងទីកន្លែងដែលត្រូវបានគេទុកចោលជាប្រវត្តិសាស្ត្រនៅក្នុងការបង្កើតគោលនយោបាយ។

សម្រាប់គាត់ វាសំខាន់ដែលមានមនុស្សនៅក្នុងតំណែងដែលមានរឿងរ៉ាវស្រដៀងគ្នា ឬមានការតស៊ូប្រហាក់ប្រហែលគ្នា ព្រោះវាប៉ះពាល់ដល់ទស្សនវិស័យ និងគុណតម្លៃរបស់ពួកគេ។

Zaidi បាននិយាយថា “សម្រាប់ខ្ញុំ ការតំណាងនេះត្រូវតែមានលើសពីគ្រាន់តែជាអ្នកដែលមានរូបរាងដូចខ្ញុំ ប៉ុន្តែជាអ្នកដែលចេះរៀបចំផែនការ និងចេះធ្វើការសម្រេចចិត្ត ព្រោះថាមានអំណាចច្រើនណាស់”។

Zaid បាននិយាយថា គាត់ជឿថា Duncan គឺជាមនុស្សម្នាក់ដែលតែងតែដាក់សហគមន៍ជាមុនគេ និងចេះស្តាប់ ដោយកត់សម្គាល់ថា នៅពេលដែលគាត់បានធ្វើការជាមួយលោក គាត់មានអារម្មណ៍ថាត្រូវបានយកចិត្តទុកដាក់ ហើយសម្រាប់គាត់ នោះគឺជាការឆ្លុះបញ្ចាំងពីរឿងរ៉ាវរបស់លោក។

‘វាផ្តល់ក្តីសង្ឃឹមដល់យុវជនរបស់យើង’

ការធ្វើជាសំឡេងសម្រាប់សហគមន៍ដែលមិនសូវមានតំណាង គឺជាអាទិភាពដែលមន្ត្រីជាប់ឆ្នោតទាំងពីររូបមានដូចគ្នា ប៉ុន្តែវាមិនមែនជាអាទិភាពតែមួយគត់នោះទេ។

ការខិតខំធ្វើជាគំរូល្អ ជាពិសេសជាមួយយុវជន ក៏ជាផ្នែកដ៏សំខាន់មួយនៃអត្តសញ្ញាណសាធារណៈរបស់ពួកគេផងដែរ។

Rea បាននិយាយថា ការអប់រំ និងការផ្សារភ្ជាប់ទំនាក់ទំនងជាមួយយុវជន គឺជាផ្នែកដ៏សំខាន់មួយនៃដំណើររបស់គាត់ឆ្ពោះទៅកាន់ក្រុមប្រឹក្សាក្រុង។

ក្នុងអំឡុងពេលដែលគាត់នៅជាមួយ Mattie Rhodes គាត់ក៏បានបម្រើការជាអនុប្រធានសម្រាប់ក្រុមប្រឹក្សាសាលារៀនរដ្ឋនៃទីក្រុងកាន់សាស់ស៊ីធី (Kansas City Public School Board) ដោយធ្វើការជាមួយសិស្សជនជាតិហ៊ីស្ប៉ានិក (Hispanic) មកពីវិទ្យាល័យ Northeast High School។

Rea បាននិយាយថា “ខ្ញុំបានចំណាយពេលភាគច្រើននៃអាជីពរបស់ខ្ញុំ ដោយជាជនជាតិអាមេរិកដើមកំណើតម៉ិកសិកតែម្នាក់គត់នៅក្នុងមជ្ឈដ្ឋានវិជ្ជាជីវៈទាំងនោះ ដូច្នេះខ្ញុំដឹងថាវាសំខាន់ប៉ុណ្ណានៅពេលស្ថិតក្នុងតំណែងនោះ ដើម្បីធ្វើជាគំរូល្អសម្រាប់អ្នកដែលគោរពយកគំរូតាមអ្នក”។

Edgar Palacios មកពី Latinx Education Collaborative ដែលជាអង្គការមួយផ្តោតលើការកសាងសហគមន៍ឡាទីណូជុំវិញបញ្ហាអប់រំ ក៏បានចែករំលែកដែរថា នេះគឺជាពេលវេលាដ៏រំភើបសម្រាប់សហគមន៍ឡាទីណូនៅក្នុងទីក្រុងកាន់សាស់ស៊ីធី។

Palacios បាននិយាយថា Rea គឺជាមនុស្សដែលចេះពិចារណាយ៉ាងស៊ីជម្រៅ និងជាតំណាងនៃសហគមន៍។ គាត់គឺជាមនុស្សម្នាក់ដែលតែងតែមានវត្តមាន និងនៅជិតស្និទ្ធជាមួយបញ្ហានានានៅក្នុងទីក្រុង។

គាត់មានក្តីរំភើបដែល Rea យកចិត្តទុកដាក់ និងដឹងអំពីប្រព័ន្ធសាលារៀន។

“គាត់យល់... អំពីនយោបាយ និងគោលនយោបាយ ដូច្នេះវាពិតជាល្អណាស់ដែលឥឡូវនេះមាននរណាម្នាក់នៅក្នុងក្រុមប្រឹក្សាក្រុង ដែលមានការយល់ដឹងទាំងពីប្រព័ន្ធអប់រំ និងបេះដូងនៃសហគមន៍របស់យើង” Palacios បាននិយាយ។

Duncan បាននិយាយថា ការស្តាប់យុវជនគឺមានឥទ្ធិពល ខណៈពេលដែលគាត់បានចែករំលែកបទពិសោធន៍របស់គាត់ក្នុងការធ្វើការជាមួយមនុស្សជំនាន់ក្រោយ។

“ខ្ញុំគិតថា តាមរយៈការរៀបចំ និងការសហការជាមួយអង្គការយុវជនដូចជា Sunrise និង Vote16 ព្រមទាំងការស្ដាប់នូវកង្វល់របស់ពួកគេ និងការឱ្យពួកគេចូលរួម ទោះបីជាពួកគេមិនអាចបោះឆ្នោតបានក៏ដោយ – ក៏ពួកគេនៅតែអាចមានអារម្មណ៍ថា ពួកគេគឺជាផ្នែកមួយនៃរដ្ឋាភិបាលនេះដែរ។” Duncan បាននិយាយ។

ការបន្សល់ទុកនូវឥទ្ធិពល

ទាំងសមាជិកក្រុមប្រឹក្សាក្រុងទាំងពីររូប និងអ្នកគាំទ្ររបស់ពួកគេ ជឿជាក់ថាការបោះឆ្នោតជ្រើសរើសពួកគេនឹងមានឥទ្ធិពលកាន់តែទូលំទូលាយ ជាងតែនៅក្នុងតំបន់មេត្រូនៃទីក្រុងកាន់សាស់ស៊ីធីតែប៉ុណ្ណោះ។

នាយិកាកម្មវិធី Erica Andrade នៃស្ថាប័ន El Centro មានក្តីរំភើបយ៉ាងខ្លាំងដែលបានឃើញ Rea ឈ្នះការបោះឆ្នោតរបស់គាត់។ ទោះបីជាអង្គការមិនស្វែងរកប្រាក់ចំណេញរបស់គាត់គ្របដណ្តប់លើខោនធី Wyandotte ក៏ដោយ ក៏គាត់ជឿថានៅតែមានឥទ្ធិពលដែលនឹងកើតឡើងនៅទីនោះផងដែរ។

Andrade បាននិយាយថា គាត់សង្ឃឹមថា “ការបោះឆ្នោតជ្រើសរើសចូលក្នុងក្រុមប្រឹក្សាក្រុង ដែលបានបំបែកគម្លាត 30 នៃការតំណាង នឹងជំរុញឱ្យអ្នកដទៃចូលរួមក្នុងកិច្ចការស៊ីវិលឱ្យកាន់តែច្រើន។ វាបង្ហាញថាមានអំណាចនៅក្នុងការដែលអ្នកបោះឆ្នោតឱ្យនរណាម្នាក់ ហើយខ្ញុំក៏សង្ឃឹមថាវានឹងជំរុញឱ្យជនជាតិឡាទីនផ្សេងទៀត ឈរឈ្មោះសម្រាប់តំណែងដែលត្រូវបោះឆ្នោតជ្រើសរើសផងដែរ។”

ភាពស្រដៀងគ្នាមួយទៀតដែលសមាជិកក្រុមប្រឹក្សាក្រុងទាំងពីររូបមានដូចគ្នា គឺក្តីសង្ឃឹមរបស់ពួកគេ បន្ទាប់ពីពេលវេលាដែលពួកគេបានបំពេញការងារឱ្យទីក្រុង។

Rea បាននិយាយថា ក្នុងអំឡុងពេលរបស់គាត់ជាមួយក្រុមប្រឹក្សា គាត់សង្ឃឹមថានឹងស្តារក្តីសង្ឃឹម និងទំនុកចិត្តមួយចំនួនដែលបានបាត់បង់ នៅក្នុងការយល់ឃើញរបស់សាធារណជនចំពោះរដ្ឋាភិបាលឡើងវិញ។

“ខ្ញុំចង់ក្រឡេកមើលត្រឡប់ទៅក្រោយវិញ ចំពោះពេលវេលារបស់ខ្ញុំនៅក្នុងក្រុមប្រឹក្សា ហើយឃើញលទ្ធផលដែលអាចវាស់វែងបាន ក្នុងការកាត់បន្ថយអំពើមនុស្សឃាត ឬបទល្មើសហិង្សា និងការធ្វើឱ្យសង្កាត់នានានៅក្នុងទីក្រុងកាន់សាស់ស៊ីធីមានសុវត្ថិភាពជាងមុន — ក្នុងនាមជាមនុស្សម្នាក់ដែលមានសីលធម៌ និងបានធ្វើសកម្មភាពដោយភាពស្មោះត្រង់ ដែលមិនត្រឹមតែធ្វើជាគំរូសម្រាប់សហគមន៍ Hispanic ប៉ុណ្ណោះទេ ប៉ុន្តែសម្រាប់ទីក្រុងទាំងមូល” Rea បាននិយាយ។

ក្នុងន័យដូចគ្នានេះដែរ Duncan បានចែករំលែកនូវគោលដៅរបស់គាត់ ក្នុងការធានាថាអ្នកក្រីក្រ និងវណ្ណៈកម្មករ ត្រូវបានគេមើលឃើញ និងបានឮសំឡេងនៅក្នុងរដ្ឋាភិបាលរបស់ពួកគេ។

“ការឈ្នះគឺជាគោលដៅមួយនៃយុទ្ធនាការនេះ ប៉ុន្តែវាមិនដែលជាគោលដៅចម្បងនោះទេ” នេះជាការលើកឡើងរបស់ Duncan។

“គោលដៅរយៈពេលវែងនៃយុទ្ធនាការនេះ គឺដើម្បីទាក់ទាញការចូលរួម និងរៀបចំវណ្ណៈកម្មករនៅក្នុងមណ្ឌលរបស់ខ្ញុំ ដែលជាផ្នែកមួយនៃចលនាដ៏ធំទូលាយជាងនេះឆ្ងាយណាស់ ដើម្បីកសាងអំណាចក្នុងចំណោមអ្នកក្រីក្រ និងវណ្ណៈកម្មករ។”