ဖဲ ဝ့ၢ်ကီၣ်စ့ၣ် ဟ့ၣ်လီၤတၢ်ဖးလၢ ကပာ်တၢ်ဖံးတၢ်မၤအံၤ ဒ်တၢ်တဖိးသဲစးဘၣ်အသိး ဝံၤအလီၢ်ခံ, ဟံၣ်ကစၢ်တဖၣ် လၢ ခဲစၢးစံထံၣ် အပူၤ ကဂ့ၢ်လိာ် ပှၤလၢအကလိာ်အိၣ်ဟံၣ်တဂၤ မ့ၢ်လၢအဝဲသ့ၣ်သူဝဲ ဟံၣ်ဃီအလဲတၢ်မၤစၢၤလံာ်အဃိ တသ့လၢၤဘၣ်န့ၣ်လီၤ.
လၢတၢ်တြီ တၢ်ခီဖးလၢကျိၣ်စ့ဟဲနုာ်အကျိၤအကျဲအဖီခိၣ် လၢဘၣ်တၢ်ပာ်ဂၢၢ်ပာ်ကျၢၤအီၤလၢ တၢ်ဖး ၁၀-၃ အဖီလာ်န့ၣ်, ဟံၣ်ကစၢ်တဖၣ် ဂ့ၢ်လိာ် ပှၤလိာ်အိၣ်ဟံၣ်ဖိတဂၤ ထဲလၢအဝဲသ့ၣ် ဟ့ၣ်ဟံၣ်လဲလၢကျဲဒ်လဲၣ်အဖီခိၣ် တသ့ဘၣ်န့ၣ်လီၤ. တၢ်န့ၣ် အကျိာ်ပာ်ဃုာ်ဝဲ Section 8 ဟံၣ်ဃီအလဲတၢ်မၤစၢၤလံာ်တဖၣ် ဒီး ပဒိၣ်တၢ်မၤစၢၤ အကျိၤအကျဲအဂၤတဖၣ်န့ၣ်လီၤ.
ကီၣ်စ့ၣ်အပှၤဘၣ်မူဘၣ်ဒါ Kevin O’Neill, Nathan Willett ဒီး Wes Rogers ဟ့ၣ်လီၤတၢ်ဖး ထီဒါဝဲ တၢ်သိၣ်တၢ်သီအံၤန့ၣ်လီၤ.
ခဲစၢးစံထံၣ် အခဲအံၤ ပာ်ဖှိၣ်ထီၣ်အသးဒီး ဝ့ၢ် ၈၅ ဖျၢၣ်, ကီၢ်ရ့ၣ်ဖိ (counties) ၂၁ ဘ့ၣ် ဒီး ကီၢ်စဲၣ် ၁၇ ဘ့ၣ် လၢအတြီပာ်ဝဲ တၢ်ခီဖးလၢကျိၣ်စ့ဟဲနုာ်အကျိၤအကျဲအဖီခိၣ်န့ၣ်လီၤ. တၢ်ဃုသ့ၣ်ညါန့ၣ် ပာ်ဖျါထီၣ်ဝဲလၢ တၢ်ဖံးတၢ်မၤအံၤ ဘၣ်ဒိဘၣ်ထံးဝဲ အါန့ၢ်ဒံးပှၤဂၤ လၢ ပှၤကလုာ်ဖံးဘ့ၣ်အလွဲၢ်အိၣ်တဖၣ်အဖီခိၣ်, လီၤဆီဒၣ်တၢ် ပှၤဖံးသူ ပှၤလိာ်အိၣ်ဟံၣ်ဖိတဖၣ်, ခီဖျိ မၤကီမၤခဲထီၣ်တၢ် လၢအဝဲသ့ၣ် ကဒိးန့ၢ်ဘၣ် ဟံၣ်ဃီအဂီၢ်န့ၣ်လီၤ.
တၢ်သိၣ်တၢ်သီအံၤ ကစးထီၣ်ဘၣ်တၢ်သူအီၤ လၢလါဃုလါအပူၤန့ၣ်လီၤ.
ဝ့ၢ်ခိၣ် Quinton Lucas ဆီၣ်ထွဲတီခိၣ်ရိၤမဲဝဲ တၢ်ဖံးတၢ်မၤအကျိၤအကျဲအံၤ ဒီး မၤသကိးတၢ်ဒီး တဝ့ၢ်ညါ ပှၤလိာ်အိၣ်ဟံၣ်ဖိကရၢ KC Tenants ဒ်သိးကကတဲာ်ကတီၤ တ့ဘှီထီၣ်အီၤအဂီၢ်န့ၣ်လီၤ. ကီၣ်စ့ၣ်အပှၤဘၣ်မူဘၣ်ဒါ Johnathan Duncan မ့ၢ်စ့ၢ်ကီး ပှၤဆီၣ်ထွဲ ဝ့ၢ်တၢ်သိၣ်တၢ်သီအံၤ အဂၤတဂၤန့ၣ်လီၤ.
“တၢ်ဖံးတၢ်မၤအကျိၤအကျဲ လၢအဂ့ၤကတၢၢ်န့ၣ် ကဲထီၣ်သးခီဖျိ ပှၤလၢအဘၣ်ဒိဘၣ်ထံးဒိၣ်ကတၢၢ် လၢတၢ်ဂ့ၢ်ကီအံၤအဃိတဖၣ် အတၢ်လဲၤခီဖျိနီၢ်နီၢ်လၢ အတၢ်အိၣ်မူအပူၤန့ၣ်လီၤ,” အဝဲစံးဝဲလီၤ. “ဒီး တၢ်ဖံးတၢ်မၤအကျိၤအကျဲအံၤ မ့ၢ်ဒၣ်တၢ်န့ၣ်လီၤ.”
KC Tenants အခိၣ်အနၢ် Brandon Henderson စံးဝဲဒၣ်လၢ တၢ်တြီအံၤ ကအိးထီၣ်န့ၢ်တၢ်ခွဲးတၢ်ယာ်အါထီၣ်လၢ ပှၤဖံးတၢ်မၤတၢ် ပှၤလိာ်အိၣ်ဟံၣ်ဖိတဖၣ် ကဃုန့ၢ်ဟံၣ်လၢ ခဲစၢးစံထံၣ် အပူၤအဂီၢ်န့ၣ်လီၤ.
အဝဲစံးဝဲလၢ “နကထံၣ်ဘၣ် ပှၤအါဂၤဒိးန့ၢ်ဘၣ် တၢ်ခွဲးတၢ်ယာ်လၢ ကအိၣ်ဆိးလၢ ပှၤတဝၢအလီၢ်အကျဲလၢ အဝဲသ့ၣ်တဒိးန့ၢ်ဘၣ်ဝဲလၢညါဘၣ် အပူၤန့ၣ်လီၤ. နကထံၣ်ဘၣ် ပှၤလၢအအိၣ်လၢကျဲမုၢ်ဖီခိၣ် စှၤလီၤဝဲဒၣ်, မ့ၢ်လၢပှၤအိၣ်အါဂၤလၢ အအိၣ်ဒီးကျိၣ်စ့လၢ ကဟ့ၣ်တၢ်လီၢ်လၢအကအိၣ်ဆိးဝဲအဂီၢ်, ဘၣ်ဆၣ် ခီဖျိလၢတၢ်ဂ့ၢ်တမံၤမံၤအဃိ တၢ်တဆိကမိၣ်န့ၢ်အဝဲသ့ၣ် မ့ၢ်တမ့ၢ် တၢ်တြီကွံာ်အဝဲသ့ၣ် ခီဖျိလၢအဝဲသ့ၣ် အကျိၣ်စ့ဟဲနုာ်အကျိၤအကျဲအဃိန့ၣ်လီၤ.”
ပှၤတီခိၣ်ရိၤမဲတၢ်တဖၣ် စံးဝဲလၢ တၢ်ဂ့ၢ်လိာ်ကွံာ် ပှၤလိာ်အိၣ်ဟံၣ်ဖိလၢ အအိၣ်ဒီး Section 8 လံာ်တၢ်မၤစၢၤ (voucher) အလုၢ်အလၢ်အံၤ မၤဆူၣ်အဝဲသ့ၣ်လၢ ကဘၣ်လိာ်အိၣ်ဟံၣ်လၢ “ဟံၣ်ကစၢ်လၢ အမ့ၢ်တၢ်ဃုထၢလီၢ်ခံကတၢၢ်” အအိၣ်န့ၣ်လီၤ.
တၢ်သိၣ်တၢ်သီအံၤ တြီဝဲ ဟံၣ်ကစၢ်တဖၣ်လၢ အသုတဂ့ၢ်လိာ်ကွံာ် ပှၤလိာ်အိၣ်ဟံၣ်ဖိတဖၣ် ထဲလၢအဝဲသ့ၣ် အခရဲဒ့းအနီၣ်ဂံၢ် (credit score), တၢ်ဟီထီၣ်ကွံာ်လၢဟံၣ် လၢညါတဖၣ်, တၢ်စံၣ်ညီၣ်ပာ်တၢ်ကမၣ် မ့ၢ်တမ့ၢ် တၢ်ဖီၣ်စုာ်အဖီခိၣ်တဂ့ၤန့ၣ်လီၤ.
Nadra Barnes မ့ၢ်ဝဲ KC Tenants အခိၣ်အနၢ်တဂၤလၢ အမၤစၢၤတ့ဘှီထီၣ် တၢ်သိၣ်တၢ်သီအံၤန့ၣ်လီၤ. အဝဲစံးဝဲလၢ တၢ်အံၤဘၣ်ဒိဘၣ်ထံး အဟံၣ်ဖိဃီဖိ ဒီးပှၤအဂၤအါဂၤလၢ ခဲစၢးစံထံၣ် အပူၤန့ၣ်လီၤ.
အဝဲစံးဝဲလၢ “ပှၤတဂၤဂၤသ့ၣ်ညါဝဲ ပှၤတဂၤဂၤလၢ အဟံၣ်တအိၣ်ဘၣ် ခီဖျိလၢအဝဲသ့ၣ် အခရဲဒ့း (credit) တဂ့ၤဘၣ်အဃိန့ၣ်လီၤ. တနံၤအံၤ ပဒိးန့ၢ်တၢ်မၤနၢၤအံၤန့ၣ် မ့ၢ်တၢ်လၢအရ့ဒိၣ်ဒိၣ်မး လၢပဂီၢ်န့ၣ်လီၤ.”
ကီၣ်စ့ၣ်ပှၤဘၣ်မူဘၣ်ဒါတဖၣ် ဆီတလဲကွံာ် တၢ်သိၣ်တၢ်သီအံၤလၢ အက့ၢ်အဂီၤလၢ တၢ်ကတိၤလိာ်သးလၢ လါဒံၣ်စဲဘၢၣ်အပူၤန့ၣ်, အါတက့ၢ်မ့ၢ်ဒ်သိး ကမၤမုာ်ထီၣ်က့ၤ ဟံၣ်ကစၢ်တဖၣ်အသးအဂီၢ်န့ၣ်လီၤ. ဟံၣ်ကစၢ်တနီၤလၢ အထီဒါတၢ်ရဲၣ်တၢ်ကျဲၤအံၤ စံးဝဲလၢ တၢ်အံၤကမၤဆူၣ်အဝဲသ့ၣ်လၢ ကဘၣ်တူၢ်လိာ် ပှၤလိာ်အိၣ်ဟံၣ်ဖိတဖၣ်န့ၣ်လီၤ.
တၢ်သိၣ်တၢ်သီအံၤ ပာ်ဖျါထီၣ်ဝဲရှဲရှဲလၢ ဟံၣ်ကစၢ်တဖၣ် ဂ့ၢ်လိာ်ကွံာ်ပှၤလိာ်အိၣ်ဟံၣ်ဖိသ့ဝဲ ဖဲအဝဲသ့ၣ် မ့ၢ်ဆိကမိၣ်ကွၢ် တၢ်ဂ့ၢ်အဂၤတဖၣ်လၢ ပှၤလိာ်အိၣ်ဟံၣ်ဖိ ပာ်ဖျါထီၣ်ဝဲ ဒီးအဝဲသ့ၣ်အလံာ်ပတံထီၣ်တၢ်အပူၤန့ၣ်လီၤ. ဟံၣ်ကစၢ်တဖၣ် ဒိးန့ၢ်ဘၣ်စ့ၢ်ကီးအခွဲးလၢ ကဆိကမိၣ်ကွၢ် တၢ်ဟီထီၣ်ကွံာ်လၢဟံၣ် ဒီးတၢ်စံးလၢအမၤဟးဂီၤတၢ်တဖၣ် လၢအကဲထီၣ်သးဖဲ ပှၤလိာ်အိၣ်ဟံၣ်ဖိ ပတံထီၣ်တၢ် အနံၣ်တနံၣ်အတီၢ်ပူၤ ဒ်တၢ်ဂ့ၢ်လၢ ကဂ့ၢ်လိာ်ကွံာ်တၢ်အဂီၢ်န့ၣ်လီၤ.
တၢ်သိၣ်တၢ်သီအံၤ ပာ်ဃုာ်ဒီး ကျိၣ်စ့တၢ်မၤစၢၤ ၁ ကွဲၢ်ဒီလာ် လၢဟံၣ်ကစၢ်တဖၣ်အဂီၢ် ဒ်သိးကကျၢၢ်ဘၢက့ၤ တၢ်လုၢ်ဘူၣ်လုၢ်စ့ၤလၢ အဘၣ်ထွဲဒီး တၢ်တူၢ်လိာ်လံာ်တၢ်မၤစၢၤ (vouchers) တဖၣ်အဂီၢ်န့ၣ်လီၤ. တၢ်သိၣ်တၢ်သီအံၤ ဒုးအိၣ်ထီၣ်စ့ၢ်ကီးဝဲ ဟံၣ်ကစၢ်အပှၤဆဲးကျိးတၢ် အလီၢ်အလၤတခါဖဲ ဝ့ၢ်ပဒိၣ်ရူ အပူၤန့ၣ်လီၤ.
တၢ်သိၣ်တၢ်သီအသီအံၤ ကတြီဝဲ ဟံၣ်ကစၢ်တဖၣ်လၢ အသုတသူ တၢ်ကတိၤဒ်သိးဒီး “တတူၢ်လိာ် Section 8 ဘၣ်” မ့ၢ်တမ့ၢ် “တူၢ်လိာ်ပှၤလၢ အဘၣ်တၢ်ဟီထီၣ်ကွံာ်အီၤလၢညါတဖၣ်ဘၣ်” လၢအဝဲသ့ၣ် အတၢ်ဒုးသ့ၣ်ညါ လိာ်အိၣ်ဟံၣ်အပူၤတဂ့ၤန့ၣ်လီၤ.
တၢ်သိၣ်တၢ်သီတခါအံၤ လိၣ်ဘၣ်ဝဲလၢ ဝ့ၢ်ပဒိၣ်ကဘၣ်ဃုထံၣ်သ့ၣ်ညါဆိတၢ်ဒိးလဲဟံၣ်အတၢ်ဘိးဘၣ်သ့ၣ်ညါတဖၣ် ဒ်သိးကထံၣ်တၢ်ကတိၤလၢအပာ်တၢ်ဒူၣ်ချ့တဖၣ်အဂီၢ်န့ၣ်လီၤ.