Cov tswv tsev hauv Kansas City yuav tsis tuaj yeem tsis lees txais ib tug neeg uas xav xauj tsev vim lawv siv daim voucher pab them tsev nyob ntxiv lawm, tom qab Pawg Sab Laj Nroog tau pov npav txwv tsis pub ua li ntawd.
Raws li txoj cai txwv kev ntxub ntxaug ntawm qhov chaw tau nyiaj, uas tau pov npav pom zoo 10-3, cov tswv tsev tsis tuaj yeem tsis lees txais ib tug neeg xauj tsev tsuas yog raws li lawv them nqi xauj tsev li cas. Qhov ntawd yuav suav nrog cov voucher pab them tsev nyob Section 8 thiab lwm yam kev pab los ntawm tsoom fwv.
Cov tswv cuab hauv Pawg Sab Laj Kevin O’Neill, Nathan Willett thiab Wes Rogers tau pov npav tawm tsam txoj cai lij choj no.
Kansas City tam sim no koom nrog 85 lub nroog, 21 lub cheeb nroog (counties) thiab 17 lub xeev uas tau txwv kev ntxub ntxaug raws li qhov chaw tau nyiaj. Kev tshawb fawb tau qhia tias txoj kev ua no cuam tshuam tsis sib npaug rau cov neeg muaj xim tawv nqaij, tshwj xeeb yog cov neeg Dub uas xauj tsev, vim nws ua rau nyuaj dua rau lawv nrhiav tau tsev nyob.
Txoj cai no yuav pib siv hauv rau lub hlis.
Tus Tswv Nroog Quinton Lucas tau tawm tswv yim txhawb txoj cai no thiab tau ua hauj lwm nrog lub koom haum neeg xauj tsev thoob nroog KC Tenants los tsim txoj cai no. Tus tswv cuab hauv Pawg Sab Laj Johnathan Duncan yog lwm tus neeg txhawb txoj cai hauv nroog no.
“Txoj cai zoo tshaj plaws yog tsim los ntawm cov kev paub tiag hauv lub neej ntawm cov neeg uas raug teeb meem no loj tshaj plaws,” nws hais. “Thiab txoj cai no yog li ntawd.”
Tus thawj coj ntawm KC Tenants, Brandon Henderson, tau hais tias kev txwv no yuav qhib ntau lub cib fim rau cov neeg xauj tsev uas ua hauj lwm nrhiav tau tsev nyob hauv Kansas City.
“Koj yuav pom ntau tus neeg muaj cib fim mus nyob hauv cov zej zog uas yav dhau los lawv tsis tau muaj cib fim mus nyob,” nws hais. “Koj yuav pom cov neeg nyob raws txoj kev tsawg dua, vim muaj ntau tus neeg uas muaj nyiaj them chaw nyob, tab sis tsis paub yog vim li cas lawv tsis raug xav txog lossis raug muab tso tseg vim yog qhov chaw uas lawv tau nyiaj los.”
Cov neeg tawm suab pab pej xeem hais tias kev tsis lees txais cov neeg xauj tsev uas muaj daim voucher Section 8 yuam kom lawv yuav tsum mus xauj tsev ntawm “cov tswv tsev uas yog kev xaiv kawg nkaus.”
Txoj cai no kuj txwv tsis pub cov tswv tsev tsis lees txais cov neeg xauj tsev vim yog saib raws li lawv cov qhab nia credit xwb, kev raug ntiab tawm tsev yav dhau los, kev raug txiav txim txhaum cai lossis kev raug ntes.
Nadra Barnes yog ib tug thawj coj ntawm KC Tenants uas tau pab tsim txoj cai no. Nws hais tias txoj cai no cuam tshuam txog nws tsev neeg thiab ntau lwm tus nyob hauv Kansas City.
“ Txhua tus yeej paub ib tug twg uas tau poob mus ua neeg tsis muaj tsev nyob vim lawv muaj credit tsis zoo,” nws hais. “Nws tseem ceeb heev, heev li rau peb uas muaj kev yeej no nyob rau hnub no.”
Cov tus tswv cuab hauv Pawg Sab Laj Nroog tau hloov txoj cai no txawv ntawm thawj daim uas tau sib cav txog thaum lub Kaum Ob Hlis Ntuj, feem ntau yog ua kom cov tswv tsev txaus siab. Qee cov tswv tsev uas tawm tsam txoj cai no tau hais tias nws yuav yuam kom lawv yuav tsum lees txais cov neeg xauj tsev.
Txoj cai no qhia meej tias cov tswv tsev tuaj yeem tsis lees txais cov neeg xauj tsev tsuav yog lawv tau luj xyuas lwm yam xwm txheej uas tus neeg xauj tsev thiab nws daim ntawv thov tau muab. Cov tswv tsev kuj raug tso cai luj xyuas txog kev raug ntiab tawm tsev thiab cov kev puas tsuaj uas raug iab liam tias tau tshwm sim nyob rau hauv ib xyoos ua ntej tus neeg xauj tsev ua daim ntawv thov los ua laj thawj tsis lees txais.
Txoj cai no muaj ib pob nyiaj pab daws teeb meem $1 million rau cov tswv tsev coj los pab them cov nqi uas cuam tshuam nrog kev lees txais cov voucher. Txoj cai no kuj tsim ib txoj hauj lwm ua tus txuas lus rau cov tswv tsev nyob ntawm Tsev Hauj Lwm Nroog.
Txoj cai tshiab no yuav txwv tsis pub cov tswv tsev siv cov lus xws li “tsis txais Section 8” lossis “tsis txais neeg raug ntiab tawm tsev yav dhau los” hauv lawv cov ntawv tshaj tawm xauj tsev.
Txoj kev cai lij choj no yuav tsum kom lub nroog ua ntej mus tshawb xyuas cov ntawv tshaj tawm txog kev xauj tsev kom pom cov lus uas muaj kev ntxub ntxaug.