ဖဲထံကီၢ်ဒီဘ့ၣ်အပူၤ ပှၤနီၣ်ဂံၢ်စှၤလၢ အသးဆူၣ်အၢတလၢ ဒီး အစိအကမီၤဒိၣ်တဖု ဂုာ်ကျဲးစၢးဝဲဒ်သိး ကမၤဟးဂီၤထီရီၤကွံာ် ပှၤလၢအလဲလိာ် မုၣ်ခွါအက့ၢ်အဂီၤ ဒ်သိးယၤ ဒီး ယမါ အသိး လၢကမျၢၢ်တၢ်အိၣ်မူအပူၤန့ၣ်လီၤ. အဝဲသ့ၣ် ပၢတၢ်ဖဲ Jefferson City ဒီး Topeka အပူၤလီၤ. ပကဘၣ်တြီဆၢအဝဲသ့ၣ် ဖဲခဲစၢးစံထံၣ် အံၤအပူၤလီၤ.
ဖဲ ၂၀၂၀ နံၣ် တၢ်ကိၢ်ခါအဆၢကတီၢ်န့ၣ် ယပာ်ဖျါထီၣ်ယသးလၢ ယမ့ၢ်ပှၤလၢအဆီတလဲမုၣ်ခွါအက့ၢ်အဂီၤ (trans) ဒီး ဖဲနံၣ်ဝဲန့ၣ်အကတၢၢ်တခီ ယသုးလီၤအိၣ်ဆိးဖဲ ခဲစၢးစံထံၣ် ဟီၣ်ကဝီၤ ၆ အပူၤန့ၣ်လီၤ. ခဲအံၤ ယအိၣ်ဆိးဖဲ ပှၤတဝၢလၢ အအိၣ်ဒီးတၢ်ရ့လိာ်မုာ်လိာ်ဘူးဘူးတံၢ်တံၢ် ဒီးတူၢ်လိာ်မုာ်ပှၤတဖုအကျါန့ၣ်လီၤ. တၢ်ဖီအီၣ်တၢ်ဖဲ ပဟံၣ်ခိၣ်ထးခိၣ်, တၢ်ကတိၤသကိးတၢ်ယံာ်ယံာ်ဖဲ ဒၢးဆှူဆ့ကၤအလီၢ် ဒီး ဖဲဟါခီတဖၣ် တၢ်ဆ့ၣ်နီၤဖဲ တၢ်ကရၢၢ်လၢအအိၣ်ဘူးဒီးပှၤအပူၤတဖၣ်န့ၣ် ဒုးနာ်ယၤလီၤတံၢ်လီၤဆဲးလၢ ယပှၤဘူးပှၤတံၢ်တဖၣ်န့ၣ် မ့ၢ်ပှၤလၢ အထံၣ်ယၤဒီး သးအိၣ်ကဟုကယာ်ယၤ ဒ်ယမ့ၢ်ယတီအသိးနီၢ်နီၢ်န့ၣ်လီၤ. အဝဲသ့ၣ် ဒုးသ့ၣ်ညါယၤလၢ တၢ်လီၢ်အံၤ မ့ၢ်ယဟံၣ်န့ၣ်လီၤ.
တၢ်ဟူးတၢ်ဂဲၤလၢ အအဲၣ်ဒိးထုးထီၣ်ကွံာ်ယၤလၢ ယပှၤတဝၢအကျါန့ၣ် ခဲအံၤ အဲၣ်ဒိးတြီယၤလၢ ယကဒိးန့ၢ်ဘၣ် တၢ်ကွၢ်ထွဲဆူၣ်ချ့ ဒီး အဲၣ်ဒိးပာ်ပတုာ်ယၤလၢ ယသုတသူဘၣ် လုၢ်ထီလီၢ် ဒီး တၢ်လီၢ်လုၢ်ထီတဂ့ၤန့ၣ်လီၤ. ပှၤတဖၣ်အံၤ အဲၣ်ဒိးတြီဖိသၣ်လၢ အမ့ၢ်ဒ်သိးယၤတဖၣ် ဒ်သိးအသုတလိာ်ကွဲဘၣ် တၢ်လိာ်ကွဲတဖၣ်တဂ့ၤ ဒီး တဲဘၣ်ယပှၤဘူးပှၤတံၢ်တဖၣ်လၢ ယမ့ၢ်တၢ်လီၤဘၣ်ယိာ်လၢ အဝဲသ့ၣ်အဖိတဖၣ်အဂီၢ်န့ၣ်လီၤ. အဝဲသ့ၣ် အဲၣ်ဒိးတြီပာ်ပတုာ် လံာ်လဲၢ်တဖၣ်လၢ အဘၣ်ဃးဒီးပှၤဒ်သိးယၤ ဒ်သိးယပှၤဘူးပှၤတံၢ်တဖၣ် သုတထံၣ်ဘၣ် တၢ်ဂ့ၢ်တၢ်ကျိၤတဖၣ်လၢ အပာ်ယၤဒ် ပှၤကညီတဂၤအသိးန့ၣ်တဂ့ၤလီၤ. အဝဲသ့ၣ် အဲၣ်ဒိးလၢ ယကအိၣ်ခူသူၣ်လၢ ယပှၤဘူးပှၤတံၢ်တဖၣ်အမဲာ်ညါ, ဒ်သိးအဝဲသ့ၣ် သုတသ့ၣ်ညါဘၣ် ဘၣ်ဃးဒီး ယသၣ်မံညီဖိလၢအလီၤနံၤသးတဒု, မ့တမ့ၢ် ယဖံအသးပှဲၤထီၣ် ၈၀ နံၣ်လံ, မ့တမ့ၢ် ယအဲၣ်ဖီတဖၣ်လၢ အအိၣ်ဖဲအဝဲသ့ၣ် အဟံၣ်မဲာ်ညါသ့ၣ်တဖၣ်န့ၣ်တဂ့ၤလီၤ. အဝဲသ့ၣ် တအဲၣ်ဒိးလၢ သုဝဲလၢအမ့ၢ်ယပှၤဘူးပှၤတံၢ်တဖၣ် ကထံၣ်ဘၣ်ယၤဘၣ်.
ဖဲ အ့ဖြ့ၣ် ၁၃ သီန့ၣ်, ယပျံၤတၢ်လၢ ယကဘၣ်ဃ့ၢ်ထီၣ်ကွံာ်လၢ ယဟံၣ်န့ၣ်လီၤ. မံၣ်စိရံၣ် ပှၤဘၣ်မူဘၣ်ဒါခိၣ်ကျၢၢ်လၢ တၢ်သိၣ်တၢ်သီတခီ (Attorney General) Andrew Bailey ရၤလီၤတၢ်ကစီၣ်လၢ လၢခံနွံအတီၢ်ပူၤန့ၣ်, အဝဲကပာ်ပတုာ်ကွံာ် ကသံၣ်သရၣ်တဂၤလၢ်လၢ် လၢအမၤစၢၤယၤ ဒ်သိးယကအိၣ်မူဘၣ် ဒ်ယမ့ၢ်ယတီနီၢ်နီၢ်အသိးန့ၣ်လီၤ. ဖဲအပူၤကွံာ်တနွံန့ၣ် အဝဲထုးထီၣ်ကွံာ် တၢ်သိၣ်တၢ်သီဂ့ၢ်ဂီၢ်အူလၢ အတြီပာ်ပတုာ် တၢ်ကူစါယါဘျါလၢ ပှၤလၢအဆီတလဲမုၣ်ခွါအက့ၢ်အဂီၤ (trans) တဖၣ်အဂီၢ်, ဘၣ်ဆၣ် ကီၢ်စဲၣ်ဘျီၣ်ဒိၣ် (General Assembly) န့ၣ် က့ၤစိာ်ထီၣ်ကဒီးတၢ်ဂ့ၢ်အံၤ ညီညီဖိသ့ဝဲန့ၣ်လီၤ.
ဖဲ မ့ၤ ၁၁ သီန့ၣ်, ယဝ့ၢ်ဆၢတဲာ်ဝဲလၢ ယတၢ်အိၣ်ဆူၣ်အိၣ်ချ့, တၢ်ဘံၣ်တၢ်ဘၢ ဒီး ယတၢ်အိၣ်မူန့ၣ် အလုၢ်အပှ့ၤအိၣ်လၢ တၢ်ကဒီသဒၢအီၤအဂီၢ် ဒီး ဃုထၢဝဲလၢ ကပာ် ခဲစၢးစံထံၣ် ဒ်တၢ်အိၣ်ကဒုအလီၢ်လၢ အပူၤဖျဲး လၢတၢ်ကွၢ်ထွဲဆူၣ်ချ့လၢ အပာ်ဂၢၢ်ပာ်ကျၢၤ မုၣ်ခွါအက့ၢ်အဂီၤအဂီၢ် န့ၣ်လီၤ.
ဖဲ လါယူၤ ၂၀ သီန့ၣ်, ယပှၤဘူးပှၤတံၢ်တဖၣ်လၢ ဟီၣ်ကဝီၤ ၆ အပူၤ အိၣ်ဒီးတၢ်ဃုထၢအဂၤတခါ လၢကဘၣ်မၤဝဲန့ၣ်လီၤ.
ဖဲ Dan Tarwater နုာ်လီၤကျဲးစၢးလၢ ဝ့ၢ်ကီၣ်စ့ၣ် အဂီၢ် ဒ်သိးကကဲထီၣ်ပှၤခၢၣ်စးလၢယဂီၢ်အခါ, အဝဲကတိၤတၢ်အါမးဘၣ်ဃး ပှၤတဝၢတဖၣ် ကတူၢ်ဘၣ်လၢအအိၣ်ဒီးတၢ်ဘံၣ်တၢ်ဘၢအဂ့ၢ်, ဘၣ်ဆၣ် အဖျါရှဲပၠးလၢ အဝဲသးအိၣ်မၤန့ၢ်တၢ်ဘံၣ်တၢ်ဘၢ ထဲဒၣ်လၢပှၤလၢ အဝဲဆိကမိၣ်လၢအကြၢးဝဲဘၣ်ဝဲတဖၣ်အဂီၢ်လီၤ — တမ့ၢ်လၢ ပပှၤတဝၢဒီတဖုညါအဂီၢ်ဘၣ်. အဝဲ ထီဒါဝဲ တၢ်ကလုၢ်လၢ ပှၤကဘၣ်ဖီၣ်နါဒၢ ဖဲ Jackson County အပူၤ လၢ COVID-19 တၢ်ဆါသံသတြိာ် အိၣ်ထီၣ်နးနးကျံးကျံးအဆၢကတီၢ်န့ၣ်လီၤ. အဝဲအိၣ်လၢ Jefferson City အကပၤ လၢအထီဒါ တၢ်ထုးထီၣ်ကွံာ်ဖိလၢဟၢဖၢပူၤ အတၢ်ခွဲးတၢ်ယာ်တဖၣ် န့ၣ်လီၤ. ဒ်အမ့ၢ် ကီၢ်ရ့ၣ်ပှၤဘျၢတၢ်သိၣ်တၢ်သီဖိတဂၤအသိး ဖဲအသးဆူၣ်ဝဲလၢ တၢ်ကဘှီထီၣ်ဃိာ် ဒ်သိးကပာ်ခူသူၣ်အါထီၣ် ပပှၤဃၢၤဖိသ့ၣ်တဖၣ်အခါ, အဝဲတဖျါလၢ အသးကိၢ်ဝဲတၢ်ဘၣ်ဒိဘၣ်ထံး လၢအကဲထီၣ်သးခီဖျိ တၢ်နီဟးထီၣ်ကွံာ် ပှၤအိၣ်ဆိးလၢ Heart Village ဟံၣ်လၢတၢ်သုးအီၤသ့ အလီၢ်အကျဲ န့ၣ်ဘၣ်. ဖဲပှၤလဲၤသဂၢၢ်တဲအီၤလိၤလိၤအခါ, ဖဲအဝဲမၢပှၤသ့ၣ်တဖၣ်န့ၣ် ဘိၣ်ထီၣ်အတၢ်ဖိတၢ်လံၤဒီးသုးကွံာ်အသးအဆၢကတီၢ် အဝဲနံၤဘၣ်ပှၤသ့ၣ်တဖၣ်န့ၣ် လၢအမဲာ်ဆှး, ဒ်ပှၤလိာ်အိၣ်ဟံၣ်ဖိ အတၢ်ခွဲးတၢ်ယာ် ပှၤတီခိၣ်ရိၤမဲအကရူၢ် KC Tenants ပာ်ဖျါထီၣ်အီၤလၢ Twitter အပူၤအသိးန့ၣ်လီၤ. ယဆိကမိၣ် အဝဲဆိကမိၣ်ဝဲလၢ အလီၢ်ကအိၣ်အါမး လၢပှၤသ့ၣ်တဖၣ်န့ၣ်အဂီၢ် ဖဲဃိာ်အသီအပူၤန့ၣ်လီၤ.
Tarwater အတၢ်ထံၣ်ဘၣ်ဃး တၢ်ဘံၣ်တၢ်ဘၢန့ၣ် ဖျါလၢအစးထီၣ်ဒီးကတၢၢ်ဝဲ ထဲဒၣ်လၢ ပှၤပၢၤကီၢ်ဒီး ဃိာ်တဖၣ်န့ၣ်လီၤ. ဘၣ်ဆၣ် ဖဲယထံၣ်ဘၣ် ပှၤပၢၤကီၢ်တဂၤအစု ပာ်လီၤအသးလၢ ကျိလၢအအိၣ်လၢကျိဒၢပူၤ အဖီခိၣ် မ့တမ့ၢ် မ့ၣ်အူကပီၤလိၣ်ဖျဲးဖျဲး လၢယသိလ့ၣ်မဲာ်ထံးကွၢ်လီၢ်ခံအပူၤအခါ မၤဘၣ်ယိာ်ယသးဒီး မၤပျံၤယသးလီၤ, တမၤမုာ်ယသးလၢ ယအိၣ်ဒီးတၢ်ဘံၣ်တၢ်ဘၢဘၣ် — လီၤဆီဒၣ်တၢ် ဖဲယသ့ၣ်ညါလၢ Kansas City Police Department လၢကီၢ်စဲၣ်ပၢအီၤတဖု ကဘၣ်တၢ်ဟ့ၣ်လီၤအီၤမူဒါ လၢကမၤလိၤတၢ်တြီတဖၣ် ဘၣ်ဃးဒီး ယတၢ်ကူတၢ်သိးအကျဲ မ့တမ့ၢ် ကသံၣ်ကသီလၢယအီအီၤတဖၣ် အခါန့ၣ်လီၤ.
ဖဲယအိၣ်ဒီးတၢ်ဘျးစဲဒီး ယပှၤဃၢၤဖိသ့ၣ်တဖၣ်, ဒီးသ့ၣ်ညါလၢ ပဆီၣ်ထွဲမၤစၢၤလိာ်ပသး တဂၤဒီးတဂၤအခါ ယတူၢ်ဘၣ်လၢ ယအိၣ်ဒီးတၢ်ဘံၣ်တၢ်ဘၢ နီၢ်နီၢ်လီၤ. Johnathan Duncan ပာ်လီၤအသးလၢ ကမၤန့ၢ်တၢ်ဘံၣ်တၢ်ဘၢ အနီၢ်ကီၢ်တခါန့ၣ်လီၤ: တမ့ၢ်တၢ်ဘံၣ်တၢ်ဘၢလၢ တၢ်မၤန့ၢ်အီၤလၢ ကျိအခိၣ်ထိးဘၣ်, ဘၣ်ဆၣ် မ့ၢ်တၢ်လၢအသူၣ်လီၤအသးလၢ ပှၤတဝၢအတၢ်ကွၢ်ထွဲလိာ်သး အပူၤန့ၣ်လီၤ. အဝဲအတၢ်လဲၤခီဖျိန့ၣ် မ့ၢ်အနီၢ်ကစၢ်တၢ်လဲၤခီဖျိလီၤ — တၢ်အိၣ်ဖှိၣ်ရ့လိာ်မုာ်လိာ်ဒီး မၤစၢၤလိာ်သးန့ၣ် အုၣ်က့ၤခီၣ်က့ၤအသးသမူ ဝံၤလၢအဟဲက့ၤတုၤလၢဟံၣ် လၢတၢ်မၤသုးတၢ်မၤဖဲ ကီၢ်အံၣ်ရၣ် (Iraq) အလီၢ်ခံန့ၣ်လီၤ. Johnathan အတၢ်ပာ်လီၤသးလၢ တၢ်ပၢဃုာ်တၢ်န့ၣ် မၤလီၤတံၢ်ဝဲလၢ ယပှၤဃၢၤဖိတဖၣ်ဒီးယၤ ပကအိၣ်ဒီးတၢ်ခွဲးတၢ်ယာ်လၢ ပကစံးကတိၤနုာ်လီၤတၢ် ဘၣ်ဃး ပကသူၣ်ထီၣ် ပှၤတဝၢလၢအပူၤဖျဲးဒိၣ်ထီၣ်တဖု ဒ်လဲၣ်အဂ့ၢ်န့ၣ်လီၤ. အဝဲအတၢ်ပာ်လီၤသးလၢ နီၢ်ခိအတၢ်ပၢလီၤသးန့ၣ် အခီပညီမ့ၢ်ဝဲ အဝဲကထီဒါ ပှၤစှၤဂၤအတၢ်ပၢ ဖဲ Jefferson City အတၢ်ကျဲးစၢးတဖၣ် လၢကနုာ်လီၤတြီတၢ်လၢ ယၤဒီးယကသံၣ်သရၣ်အဘၢၣ်စၢၤ — ဒီးလၢနၤဒီး နကသံၣ်သရၣ်အဘၢၣ်စၢၤ — ဘၣ်ဃးဒီး နီၢ်ကစၢ်တၢ်အိၣ်ဆူၣ်အိၣ်ချ့ တၢ်ဆၢတဲာ်တဖၣ်န့ၣ်လီၤ. အဝဲအတၢ်မၤ ဒ်ပှၤရဲၣ်ကျဲၤတၢ်တဂၤဒီး KC Tenants န့ၣ် ဟ့ၣ်ယၤတၢ်နာ်လၢ ဒ်ဝ့ၢ်ကီၣ်စ့ၣ် အပှၤဘၣ်မူဘၣ်ဒါတဂၤအသိး, အဝဲကဆဲးမၤဂ့ၤထီၣ် တၢ်သူၣ်ထီၣ်တၢ်ရ့လိာ်မုာ်လိာ် လၢပဟီၣ်ကဝီၤအပူၤ, ဒီးကမၤစၢၤပှၤလၢ ပကဘျးစဲလိာ်ပသး ဒ်သိးပကထီဒါ ပှၤလၢအကမၤဘၣ်ဒိပှၤ ဒီးမၤလီၤဖးပှၤသ့ၣ်တဖၣ်န့ၣ်လီၤ.
အဝဲအတၢ်ထံၣ်လၢ ခဲစၢးစံထံၣ်အဂီၢ်, လၢအမ့ၢ်ဝ့ၢ်တဖျၢၣ်လၢ ပှၤကိးဂၤဒဲး အိၣ်ဒီးတၢ်လၢအဝဲသ့ၣ်လိၣ်ဘၣ်ဝဲ ဒ်သိးကအိၣ်မူဒိၣ်ထီၣ်ထီထီၣ် ပှဲၤဒီးတၢ်ကဲထီၣ်လိၣ်ထီၣ်အဂီၢ်န့ၣ်, မ့ၢ်တၢ်ထံၣ်တခါလၢ အမၤမုာ်ယသးလၢ ယအိၣ်ဒီးတၢ်ဘံၣ်တၢ်ဘၢ နီၢ်နီၢ်လီၤ. လၢတၢ်န့ၣ်အဃိ ယဟ့ၣ်တၢ်ဖးလၢ Johnathan Duncan အဂီၢ် ဒ်သိးကကဲထီၣ် ဟီၣ်ကဝီၤ ၆ ဝ့ၢ်ကီၣ်စ့ၣ် ပှၤခၢၣ်စးအဂီၢ်န့ၣ်လီၤ. ယမုၢ်လၢ်လၢ ယပှၤဃၢၤဖိတဖၣ် ကပာ်ဖှိၣ်ထီၣ်အသးဒီးယၤလီၤ.
Aaron Ratigan မ့ၢ်ဝဲ အ့ၣ်ကၠ့နံယၢၣ်တဂၤလီၤ. အဝဲအိၣ်ဆိးလၢ ခဲစၢးစံထံၣ် ဟီၣ်ကဝီၤ ၆ အပူၤလီၤ.