Muaj ib qho kev sib zog thoob plaws lub teb chaws los ntawm ib pab neeg tsawg uas muaj hwj chim thiab mob siab heev xav rhuav tshem cov neeg hloov poj niam txiv neej xws li kuv thiab kuv tus poj niam kom ploj tawm hauv lub neej pej xeem. Lawv yog cov tswj hwm hauv Jefferson City thiab Topeka. Peb yuav tsum txwv lawv ntawm no hauv Kansas City.

Kuv tau qhia tawm tias kuv yog ib tug neeg hloov poj niam txiv neej thaum lub caij ntuj sov xyoo 2020, thiab tau tsiv los nyob hauv Kansas City Koom Haum Cheeb Tsam 6 thaum kawg ntawm lub xyoo ntawd. Tam sim no kuv nyob hauv ib lub zej zog uas sib raug zoo thiab txais tos sawv daws. Kev ci nqaij noj ua ke ntawm peb cov sam thiaj, kev sib tham ntev ntev hauv chav ntxhua khaub ncaws thiab tej yav tsaus ntuj zaum ua si hauv lub tiaj ua si nyob ib sab tau ua rau kuv paub tseeb tias kuv cov neeg nyob ze yog cov neeg uas pom thiab txhawj xeeb txog kuv tiag tiag raws li tus neeg uas kuv yog. Lawv ua rau kuv paub tias kuv tau los txog tsev lawm.

Kev txav mus kom tshem kuv tawm ntawm kuv lub zej zog tam sim no xav txwv tsis pub kuv tau txais kev kho mob thiab txwv tsis pub kuv siv chav dej. Cov neeg no xav txwv cov menyuam zoo li kuv tsis pub ua kis las thiab tab tom qhia kuv cov neeg nyob ib puag ncig tias kuv yog ib qho kev phom sij rau lawv cov menyuam. Lawv xav txwv cov phau ntawv hais txog cov neeg zoo li kuv kom kuv cov neeg nyob ib puag ncig tsis pom cov dab neeg uas saib kuv zoo li ib tug tib neeg. Lawv xav kom kuv nkaum ntawm kuv cov neeg nyob ib puag ncig, kom lawv yeej tsis muaj hnub paub txog kuv tus miv txawv txawv, los sis paub tias kuv pog nyuam qhuav muaj 80 xyoo, los sis paub tias kuv nyiam cov paj nyob ntawm lawv lub sam thiaj. Lawv tsis xav kom nej, kuv cov neeg nyob ib puag ncig, pom kuv.

Hnub tim April 13, kuv tau ntshai tias kuv yuav tsum tau khiav tawm ntawm kuv lub tsev. Xeev Missouri Tus Kwslijchoj Loj (Attorney General) Andrew Bailey tau tshaj tawm tias hauv ob lub lim tiam, nws yuav txwv txhua tus kws kho mob uas yuav pab kuv ua neej raws li kuv tus kheej tiag tiag. Lub lim tiam dhau los nws tau rho rov qab txoj cai ceev uas txwv tsis pub muaj kev kho mob rau cov neeg hloov poj niam txiv neej (trans), tab sis lub Tuam Tsev Tsim Cai (General Assembly) tuaj yeem rov coj txoj cai ntawd rov qab los yooj yim.

Hnub tim May 11, kuv lub nroog tau txiav txim siab tias kuv txoj kev noj qab haus huv, kev nyab xeeb thiab kuv txoj sia yog yam tsim nyog tiv thaiv thiab tau xaiv kom Kansas City ua ib qho chaw nyab xeeb rau kev kho mob uas txhawb tus kheej lub cev poj niam txiv neej.

Hnub tim 20 Lub Rau Hli Ntuj, kuv cov neeg zej zog nyob hauv Cheeb Tsam 6 muaj ib qho kev xaiv ntxiv yuav tsum xaiv.

Thaum nws tab tom sib tw nkag mus rau hauv Pawg Sab Laj Nroog kom sawv cev rau kuv, Dan Tarwater hais ntau txog kev kom cov zej zog xav tias nyab xeeb, tab sis nws meej heev tias nws tsuas muab siab rau kev nyab xeeb rau cov neeg uas nws xav tias tsim nyog xwb — tsis yog rau peb lub zej zog tag nrho. Nws tau tawm tsam txoj cai yuav tsum hnav daim npog qhov ncauj hauv Jackson County thaum lub sij hawm uas tus kab mob COVID-19 kis loj tshaj plaws. Nws tau tuaj Jefferson City tog los tawm tsam txoj cai rho menyuam. Hauv nws txoj kev mob siab thaum ua tus tsim cai hauv lub nras xeev kom muaj ib lub tsev kaw neeg coj los zais peb cov neeg zej zog kom ntau ntxiv, nws zoo li tsis txhawj xeeb txog qhov kev puas tsuaj uas tshwm sim los ntawm kev ntiab cov neeg nyob hauv Heart Village mobile home park tawm. Thaum raug nug txog, nws tau luag kiag rau ntawm lawv xub ntiag thaum nws ntiab lawv tawm, raws li pab pawg tiv thaiv cov neeg xauj tsev txoj cai KC Tenants tau muab tso tseg rau hauv Twitter. Kuv xav tias nws nyaj yuav xav tias muaj chaw txaus rau lawv nyob hauv lub tsev loj cuj tshiab.

Tarwater lub zeem muag txog kev nyab xeeb zoo li pib thiab xaus ntawm cov tub ceev xwm thiab cov tsev kaw neeg xwb. Tab sis thaum pom ib tug tub ceev xwm txhais tes npaj tuav rawv rab phom hauv lub hnab phom los yog pom lub teeb tsheb tub ceev xwm ci ntsa iab hauv kuv daim iav saib tom qab, nws ua rau kuv txhawj xeeb thiab ntshai, tsis yog xav tias nyab xeeb — tshwj xeeb tshaj yog thaum paub tias lub chaw tub ceev xwm Kansas City Police Department uas lub xeev tswj yuav raug muab luag num kom tswj cov kev txwv txog kuv txoj kev hnav khaub ncaws lossis cov tshuaj uas kuv noj.

Kuv xav tias kuv nyab xeeb tiag tiag thaum kuv muaj kev sib raug zoo nrog kuv cov neeg zej zog, thiab paub tias peb sib pab txhawb nqa ib leeg. Johnathan Duncan muab siab rau txoj kev nyab xeeb tiag tiag ntawd: tsis yog qhov uas siv phom los yuam, tab sis yog qhov uas tsim los ntawm kev sib hlub sib pab hauv zej zog. Nws muaj kev paub txog qhov no ntawm nws tus kheej — kev sib koom siab tau cawm nws lub neej tom qab nws rov qab los tsev los ntawm kev ua tub rog hauv teb chaws Iraq. Johnathan txoj kev muab siab rau kev koom tes tswj hwm ua kom kuv cov neeg zej zog thiab kuv muaj suab hais txog tias peb yuav tsim ib lub zej zog kom nyab xeeb dua li cas. Nws txoj kev muab siab rau txoj cai tswj hwm tus kheej lub cev txhais tau tias nws yuav tawm tsam cov kev sim los ntawm cov neeg tsawg uas tswj hwm hauv Jefferson City uas xav los cuam tshuam ntawm kuv thiab kuv tus kws kho mob — thiab ntawm koj thiab koj tus kws kho mob — txog kev txiav txim siab txog kev noj qab haus huv ntawm tus kheej. Nws txoj hauj lwm ua tus txhawb nqa zej zog nrog KC Tenants ua rau kuv ntseeg tias thaum ua ib tug tswv cuab hauv Pawg Sab Laj Nroog, nws yuav txuas ntxiv txhawb kev tsim kev sib raug zoo hauv peb lub cheeb tsam, pab kom peb koom siab los tiv thaiv cov neeg uas xav ua phem thiab xav muab peb faib.

Nws lub zeem muag rau Kansas City, uas yog ib lub nroog uas txhua tus muaj txhua yam uas lawv xav tau kom lub neej vam meej, yog qhov uas ua rau kuv xav tias nyab xeeb tiag tiag. Vim li ntawd kuv thiaj li pov npav rau Johnathan Duncan ua tus sawv cev hauv Pawg Sab Laj Nroog rau Cheeb Tsam 6. Kuv vam tias kuv cov neeg zej zog yuav koom nrog kuv.

Aaron Ratigan yog ib tug engineer. Nws nyob hauv Kansas City lub Cheeb Tsam 6.