ခဲစၢးစံထံၣ် အဟီၣ်ကဝီၤ ၆ န့ၣ် စးထီၣ်အသးဖဲ Country Club Plaza တုၤလီၤဖဲ ခဲးစ်ခီထံၣ် အကီၢ်ဆၢန့ၣ်လီၤ. ဖဲဝ့ၢ်အံၤအတၢ်ဃုထၢ ဝ့ၢ်ကီၣ်စ့ၣ် လၢအကဟဲတုၤအပူၤန့ၣ်, Jackson County တၢ်ဘျၢသဲစးဘျီၣ်ဒိၣ် အပှၤမၤတၢ်လီၢ်လံၤ Dan Tarwater ဒီး ပှၤမၤတၢ်လၢ သုးလီၢ်လံၤအတၢ်ကရၢကရိလၢတမၤန့ၢ်ဘျုးအပူၤ Johnathan Duncan တဖၣ် ကျဲးစၢးပြၢလိာ်အသးလၢ လီၢ်ဆ့ၣ်နီၤလၢအအိၣ်ဟိတဖျၢၣ်အံၤအဂီၢ်န့ၣ်လီၤ.
တၢ်ပြၢလိာ်သးတဘျီအံၤ ပာ်ဖျါထီၣ်ဝဲ ထံရူၢ်ကီၢ်သဲးအတၢ်တူၢ်ဘၣ်ခီၣ်ဘၣ်လၢအလဲၢ်ထီၣ်ဖဲ ခဲစၢးစံထံၣ် အပူၤ လၢအအိၣ်ဖဲ ပှၤလၢအအဲၣ်ဒိးတၢ်လဲလိာ်လဲထီၣ်သီ လၢအတတူၢ်လိာ်တၢ်အိၣ်သးဖဲခဲအံၤဘၣ် ဒီးအဲၣ်ဒိးဘၣ် ခဲစၢးစံထံၣ် လၢအပာ်ဆိပှၤအိၣ်လၢဝ့ၢ်ပူၤ လၢအတူၢ်ဘၣ်တၢ်ကီတၢ်ခဲညီကတၢၢ်တဖၣ်အတၢ်လိၣ်ဘၣ်, ဒီး ပှၤလၢအဆီၣ်ထွဲတၢ်မၤဘၣ်ဂီၢ်က့ၤတၢ် လၢအအိၣ်ဖဲအဘၢၣ်စၢၤတဖၣ် အဘၢၣ်စၢၤန့ၣ်လီၤ.
Duncan ဒီး Tarwater တဖၣ် မ့ၢ်ဝဲပှၤခံဂၤလၢအဒိးန့ၢ်ဘၣ် တၢ်ဖးအါကတၢၢ် ဖဲဝ့ၢ်အံၤ အလါအ့ဖြ့ၣ် တၢ်ဃုထၢအဆိအပူၤန့ၣ်လီၤ. Tarwater ဒိးန့ၢ်ဘၣ်ဝဲ တၢ်ဖး 45% ဒီး Duncan ဒိးန့ၢ်ဘၣ်ဝဲ 24% န့ၣ်လီၤ.
Tarwater မၤတ့ၢ်တၢ်ဖဲ Jackson County တၢ်ဘျၢသဲစးဘျီၣ်ဒိၣ်အပူၤ စးထီၣ်ဖဲ 1994 တုၤလီၤလၢ 2022 နံၣ်န့ၣ်လီၤ. အဝဲစံးဝဲလၢ အဝဲအဲၣ်ဒိးဟဲစိာ်အတၢ်လဲၤခီဖျိဖဲ တၢ်ဘျၢသဲစးဘျီၣ်ဒိၣ်အပူၤ ဆူ ဝ့ၢ်ကီၣ်စ့ၣ် အပူၤန့ၣ်လီၤ.
Tarwater စံးဝဲလၢ, “ပတၢ်မၤကမၣ်သဲစးအနီၢ်ဂံၢ်န့ၣ် ပပာ်ဖီၣ်အီၤတန့ၢ်လၢၤဘၣ်ဖဲခဲအံၤလီၤ. ပကျဲမုၢ်တဖၣ်, ပှၤဟးလီၢ်ကျဲကပၤတဖၣ်, ကျဲတဖၣ် — အဝဲသ့ၣ်ခဲလၢာ်လိၣ်ဘၣ်တၢ်မၤဘၣ်ဂီၢ်က့ၤအီၤလီၤ.”
Duncan မ့ၢ်ဝဲ သုးမုၢ်ပှၤဒုးတၢ်သုးလီၢ်လံၤတဂၤ လၢအမၤတ့ၢ်တၢ်ဖဲ ကီၢ်အံၣ်ရး (Iraq) အပူၤန့ၣ်လီၤ. ခဲအံၤ အဝဲမ့ၢ်ဝဲ ပှၤနဲၣ်တၢ်လၢ တၢ်ပၢဆှၢရဲၣ်ကျဲၤတၢ်ဖံးတၢ်မၤ (Administrative Operations Director) ဖဲ Veterans of Foreign Wars, လၢအမ့ၢ် သုးလီၢ်လံၤတၢ်မၤစၢၤတၢ်ကရၢ လၢတဃုအဘျုးအဖှိၣ်ဘၣ်တခါန့ၣ်လီၤ. ဖဲအပူၤကွံာ် သၢနံၣ်အတီၢ်ပူၤန့ၣ် Duncan ပာ်ဖှိၣ်မၤသကိးတၢ်ဒီး ဝ့ၢ်ဒီတဝ့ၢ် ပှၤလိာ်အိၣ်ဟံၣ်ဖိအကရၢ KC Tenants န့ၣ်လီၤ. အဝဲစံးဝဲလၢ ပှၤကိးဂၤဒဲး လၢအအိၣ်ဆိးဖဲ ခဲစၢးစံထံၣ် အပူၤန့ၣ် ကြၢးဘၣ်အိၣ်ဆိးဝဲထီဘိန့ၣ်လီၤ.
“ဖဲပကွၢ် တၢ်လိၣ်ဘၣ်တဖၣ် လၢပဝ့ၢ်ပူၤအခါ, မ့ၢ်တမ့ၢ်လၢ နအိၣ်ဒီးဟံၣ်တဖျၢၣ်ဘၣ်ဒီး တၢ်လိၣ်ဘၣ်အါမးန့ၣ် ပမၤဘၣ်ဂီၢ်ထီၣ်က့ၤအီၤ တသ့ဘၣ်,” Duncan စံးဝဲန့ၣ်လီၤ. “ပှၤတနီၤန့ၣ် ကတိၤတၢ်ဘၣ်ဃးဒီး တၢ်ဒုးအိၣ်ဆိးပှၤဂီၢ်မုၢ်လၢ ဃိာ် တဖၣ်အပူၤ ဒီးတၢ်အံၤ လၢယဂီၢ်န့ၣ် တဖျါလၢအဘၣ်ဘၣ်.”
ကရၢတဖၣ်လၢ အဆီၣ်ထွဲထီၣ်ဖျါ Duncan န့ၣ် ပာ်ဃုာ်ဒီး KC Tenants Power, လၢအမ့ၢ် KC Tenants အထံရူၢ်ကီၢ်သဲး တၢ်ကျဲးစၢးဆီၣ်ထွဲတၢ်သိၣ်တၢ်သီ အတၢ်ဖံးတၢ်မၤအကျိၤတခါ; Our Revolution အ ခဲစၢးစံထံၣ် ဝဲၤကျိၤဖိ; Pro-Choice Missouri; Sierra Club ဒီး Teamsters Local 41 န့ၣ်လီၤ.
Tarwater န့ၣ် ဘၣ်တၢ်ဆီၣ်ထွဲအီၤလၢ Fraternal Order of Police, Firefighters Local 42 ဒီး Northland Strong န့ၣ်လီၤ.
Duncan စံးဝဲလၢ လၢတၢ်ကဟ့ၣ် ဝ့ၢ်အကျိၣ်အစ့ ဒီး တၢ်မၤစှၤလီၤတၢ်သွီ တဖၣ် ဆူပှၤသူၣ်ထီၣ်ဟံၣ်ဃီခွဲးယာ်တဖၣ် လၢအကိးဟံၣ်လဲ လၢပှၤအိၣ်ဆိးဖဲန့ၣ်အါဂၤ ဟ့ၣ်ဝဲတန့ၢ်ဘၣ်အလီၢ်န့ၣ်, ဝ့ၢ်ပဒိၣ် ကြၢးသူဝဲ ကမျၢၢ်အကျိၣ်အစ့လၢ ကသူၣ်ထီၣ်ဟံၣ်ဃီ ဒီး ဒုးလိာ်အိၣ်အီၤလၢ အပှ့ၤလီၤစှၤန့ၢ်ဒံး တၢ်ဆါတၢ်ပှ့ၤအပှ့ၤ လၢတၢ်ချၢန့ၣ်လီၤ.
“ပလိၣ်ဘူၣ်လီၤကျိၣ်စ့ လၢပပှၤတဝၢတဖၣ်အပူၤ ဒ်သိး ပကသူၣ်ထီၣ်န့ၢ် ဟံၣ်ဃီလၢ ပှၤဂီၢ်မုၢ်ဟ့ၣ်အပှ့ၤန့ၢ် တဖၣ်နီၢ်ကီၢ်အဂီၢ်လီၤ,” အဝဲစံးဝဲန့ၣ်လီၤ.
Tarwater စံးဝဲလၢ အဝဲဆီၣ်ထွဲဝဲ “တၢ်မၤစၢၤပှၤဂီၢ်မုၢ် ဒ်သိးအဝဲသ့ၣ် ကမၤစၢၤလီၤက့ၤအသးအဂီၢ်” န့ၣ်လီၤ.
“ခဲအံၤတဘျီ ပလိၣ်ဒုးက့ၤပှၤဂီၢ်မုၢ် ဆူတၢ်ဖံးတၢ်မၤအပူၤလီၤ,” Tarwater စံးဝဲန့ၣ်လီၤ. “ပလိၣ်ဒုးမၤတၢ် ပှၤဂီၢ်မုၢ်ဖဲ တၢ်သူၣ်ထီၣ်ဘှီထီၣ် တၢ်မၤလီၢ်အကလုာ်ကလုာ်တဖၣ်, လၢအမ့ၢ် ပှၤမၤတၢ်ဖိကရၢ အတၢ်ဖံးတၢ်မၤ လၢအဘူးအလဲဂ့ၤတဖၣ်န့ၣ်လီၤ.”
Duncan ဒီး Tarwater တူၢ်လိာ်ထံၣ်သကိးဝဲ တဒ်သိးလိာ်အသးဘၣ် ဘၣ်ဃးဒီး တၢ်ဟ့ၣ်က့ၤတၢ်လိးက့ၤတၢ်ဘၣ်ဒိဘၣ်ထံး (reparations) လၢ ပှၤဖံးသူ ခဲစၢးစံထံၣ်ဖိတဖၣ် အဂီၢ်စ့ၢ်ကီးန့ၣ်လီၤ. ဝ့ၢ်ခိၣ် Quinton Lucas ဖဲတယံာ်ဒံးဘၣ်အခါ ပာ်ထီၣ်ဝဲ ကမံးတံာ်ဖိ ၁၅ ဂၤ ဆူ ဝ့ၢ်ခိၣ်အကမံးရှ့ၣ် ဘၣ်ဃး တၢ်ဟ့ၣ်က့ၤတၢ်လိးက့ၤတၢ်ဘၣ်ဒိဘၣ်ထံး (Mayor’s Commission on Reparations) ဒ်သိး ကမၤလိဃုသ့ၣ်ညါဝဲလၢ တၢ်ဟ့ၣ်က့ၤတၢ်လိးက့ၤတၢ်ဘၣ်ဒိဘၣ်ထံး လၢ ပှၤဖံးသူ လၢအအိၣ်ဆိးဖဲ ခဲစၢးစံထံၣ် တဖၣ်အဂီၢ်န့ၣ် ကမ့ၢ်ဒ်လဲၣ်အဂီၢ်န့ၣ်လီၤ.
“ယဆိကမိၣ်လၢ ဖဲနကွၢ် တၢ်ထုးထီၣ်လဲလိာ်ကွံာ် တၢ်ထူးတၢ်တီၤ လၢအကဲထီၣ်သးလၢ ပပှၤဖံးသူ အပှၤတဝၢတဖၣ်အအိၣ်အခါ, ပလိၣ်ဘူၣ်လီၤက့ၤကျိၣ်စ့ လၢပှၤတဝၢတဖၣ်န့ၣ် အပူၤလီၤ,” Duncan စံးဝဲန့ၣ်လီၤ. “အဃိ ယကဆီၣ်ထွဲ တၢ်ဟ့ၣ်က့ၤတၢ်လိးက့ၤတၢ်ဘၣ်ဒိဘၣ်ထံး ဒီး တၢ်ဟ့ၣ်လီၤတၢ်မၤစၢၤကျိၣ်စ့ လိၤလိၤ ဆူပပှၤဖံးသူ အပှၤတဝၢတဖၣ်အအိၣ်လီၤ.”
Tarwater တစံးဖျါထီၣ်ဝဲလၢ အဆီၣ်ထွဲ တၢ်ဟ့ၣ်လီၤကျိၣ်စ့လိၤလိၤ ဆူ ပှၤဖံးသူ လၢအအိၣ်ဆိးဖဲဝ့ၢ်ပူၤတဖၣ်အအိၣ်ဘၣ်.
“ယဆိကမိၣ်လၢ မ့ၢ်သိၣ်လိပှၤတဂၤလၢ ကဖီၣ်ညှၣ်ဒ်လဲၣ်န့ၣ် မၤစၢၤအီၤသ့ဒိၣ်န့ၢ်ဒံး နဟ့ၣ်လီၤအီၤညှၣ်လီၤ, အဃိ ယအဲၣ်ဒီးမၤတၢ်အံၤ ခီဖျိတၢ်ဟ့ၣ်လိာ်စ့လၢအပှ့ၤဘၣ် ဒီးတၢ်အဂၤတဖၣ် လၢအမၤစၢၤအဝဲသ့ၣ်ဒ်သိး ကစးထီၣ်န့ၢ် အနီၢ်ကစၢ်မူဒါခီပနံာ်တၢ်ဖုံးတၢ်မၤအဂီၢ်လီၤ,” အဝဲစံးဝဲလီၤ.
Duncan စံးဝဲလၢ ဝ့ၢ်အံၤကြၢးဘျၢလီၤစ့လၢ ပှၤတဝၢအတၢ်လိာ်ဘၣ်အဂီၢ် အါန့ၢ်ဒံး ဃိာ်တဖၣ်လီၤ. ခဲစၢးစံထံၣ် ခဲအံၤတဲသကိးဝဲ မ့ၢ်ကြၢးသူစ့ $1.5 ကကွဲၢ် လၢကတ့ထီၣ် ဝ့ၢ်ပူၤဃိာ်အသီတဖျၢၣ် အတၢ်ကူၣ်ထီၣ်ဖးလီၤဧါန့ၣ်လီၤ.
Duncan တဆိကမိၣ်ဝဲလၢ ပှၤပိာ်ကျဲဝဲၤကျိၤ ကြၢးဟံးန့ၢ်အါထီၣ် ပှၤပိာ်ကျဲအသီဘၣ်, ဒီးနာ်ဝဲလၢ ဝ့ၢ်အံၤကြၢးဆီၣ်ထွဲကျိၣ်စ့လၢ တၢ်ရဲၣ်တၢ်ကျဲၤတဖၣ် လၢအသးစဲလၢ တၢ်မၤကမၣ်တၢ်သိၣ်တၢ်သီ အခီၣ်ထံးအဂ့ၢ်တဖၣ်အဖီခိၣ်လီၤ. အဝဲဆီၣ်ထွဲဝဲ တၢ်ပာ်ဂၢၢ်ပာ်ကျၢၤကဒါက့ၤ တၢ်သိၣ်တၢ်သီလၢ KCPD ပှၤပိာ်ကျဲတဖၣ် ကဘၣ်အိၣ်ဆိးလၢ ခဲစၢးစံထံၣ်အပူၤလီၤ. ပှၤပိာ်ကျဲခီမံရှၢၣ်ကမံးတံာ် (Board of Police Commissioners) ပာ်ဂၢၢ်ပာ်ကျၢၤဝဲ တၢ်သိၣ်တၢ်သီတခါ လၢတနံၣ်အံၤအပူၤ လၢအပျဲဝဲ KCPD ပှၤပိာ်ကျဲတဖၣ် အိၣ်ဆိးလၢ Kansas အပူၤလီၤ.
“ပလိာ်ဘၣ် တၢ်ဖုံးတၢ်မၤလၢ အဟ့ၣ်ဘူးလဲလၢအဂ့ၤတဖၣ်လီၤ. ပလိာ်ဘၣ် ဟံၣ်ဃီလီၤ,” Duncan စံးဝဲလီၤ. “အဃိန့ၣ် ယနုာ်လီၤပာ်ဖှိၣ်မၤသကိးတၢ်ဒီး KC Tenants – မ့ၢ်လၢ တၢ်ဟ့ၣ်လီၤဟံၣ်ဃီ ဒီးတၢ်ဟ့ၣ်လီၤ ဟံၣ်လၢအပှ့ၤဘၣ်ဒီးပှၤဒိးလဲအိၣ်သ့ နီၢ်ကီၢ် ဒီးတၢ်မၤဂၢၢ်ကျၢၤထီၣ် ပပှၤတဝၢအလီၢ်အကျဲတဖၣ်န့ၣ် မ့ၢ်တၢ်တြီဆၢ တၢ်မၤဆူၣ်မၤစိးလီၤ. ပပှၤတဝၢတဖၣ် လိာ်ဘၣ်အါထီၣ် တၢ်ခွဲးတၢ်ယာ်တဖၣ်လီၤ.”
Tarwater စံးဝဲလၢ KCPD လိာ်ဘၣ်အါထီၣ် ပှၤပိာ်ကျဲတဖၣ်လီၤ. အဝဲစံးဝဲလၢ အဝဲတဆီၣ်ထွဲ တၢ်သိၣ်တၢ်သီလၢ ဘၣ်ဃးတၢ်အိၣ်ဆိးအလီၢ်ဘၣ် မ့ၢ်လၢ တၢ်ကဟံးန့ၢ်ပှၤမၤတၢ် လၢတၢ်မၤအလီၢ်တဖၣ်အဂီၢ် ကီခဲဝဲဒိၣ်မးအဃိလီၤ.
“ပလိာ်ဘၣ် ပှၤပိာ်ကျဲတဖၣ်အိၣ်ဖဲန့ၣ် မ့ၢ်လၢ အဝဲသ့ၣ်ကဘၣ်ဟးခိးကွၢ်တၢ်လၢ ကျဲချၢအဃိလီၤ,” အဝဲစံးဝဲလီၤ. “ပလိာ်ဘၣ် မၤတၢ်ဟးခိးကွၢ်တၢ်လၢ ခီၣ်လီၤ. ဘၣ်သ့ၣ်သ့ၣ် ပကစိာ်က့ၤကဒါ တၢ်ဒိးကသ့ၣ်ဟးခိးကွၢ်တၢ်လၢ ဝ့ၢ်ခိၣ်ဒီး မၤပူၤဖျဲးထီၣ် ပကျဲတဖၣ်လီၤ.”
ကီၢ်ရ့ၣ်ဖိ ၆ ဘျ့တဘျ့ အလီၢ်ဆ့ၣ်နီၤလၢ ကီၢ်ရ့ၣ်ဖိအပူၤ, ဒ်သိးဒီး ဝ့ၢ်ကီၣ်စ့ၣ် အလီၢ်ဆ့ၣ်နီၤအဂၤ ၁၁ လီၢ်လၢာ်န့ၣ်, တၢ်ကဟ့ၣ်တၢ်ဖးလၢ လါယူၤ ၂၀ သီအနံၤလီၤ. ခဲစၢးစံထံၣ် ပှၤဟ့ၣ်တၢ်ဖးဖိတဖၣ်လၢ Jackson County အပူၤ သမံသမိးကွၢ် အဝဲသ့ၣ် တၢ်ဆဲးလီၤမံၤလၢတၢ်ဟ့ၣ်တၢ်ဖးအဂီၢ် ဒီးဃုထံၣ်န့ၢ် အဝဲသ့ၣ် တၢ်ဖးဟ့ၣ်အလီၢ် သ့ဖဲ တၢ်ဃုထၢကမံးတံာ် အပှာ်ယဲၤသန့ အပူၤလီၤ. နမ့ၢ်အိၣ်ဆိးလၢ ခလ့ခီထံၣ် အပူၤန့ၣ်, လဲၤဆူ Board of Election Commissioners အပှာ်ယဲၤသန့ တက့ၢ်. ဖလဲးခီထံၣ် ပှၤဟ့ၣ်တၢ်ဖးဖိတဖၣ် သမံသမိးကွၢ်သ့ဖဲ Board of Elections အပှာ်ယဲၤသန့ အပူၤလီၤ.