Kansas City txoj Cheeb Tsam 6 nthuav txij li Country Club Plaza mus txog ntawm ciam teb Cass County. Hauv lub nroog txoj kev xaiv tsa Pawg Sab Laj Nroog uas yuav los txog no, tus qub neeg tsim cai hauv Jackson County Dan Tarwater thiab tus neeg ua hauj lwm rau lub koom haum pab qub tub rog uas tsis nrhiav paj ntsais Johnathan Duncan tab tom sib tw rau lub rooj sawv cev uas tseem khoob.
Kev sib tw no qhia txog kev sib txeeb kev nom kev tswv dav dua hauv Kansas City ntawm cov neeg uas xav kom muaj kev hloov pauv tshiab uas tsis lees txais qhov muaj nyob tam sim no thiab xav kom Kansas City muab cov kev xav tau ntawm cov neeg nyob hauv nroog uas raug kev nyuaj tshaj plaws los ua qhov tseem ceeb, thiab cov neeg uas tawm suab kom muaj cov kev daws teeb meem uas nyob nruab nrab dua.
Duncan thiab Tarwater yog ob tug uas tau cov suab npav ntau tshaj plaws hauv lub nroog txoj kev xaiv tsa thawj zaug thaum lub Plaub Hlis. Tarwater tau txais 45% ntawm cov suab npav, thaum Duncan tau txais 24%.
Tarwater tau ua hauj lwm hauv Jackson County Legislature txij xyoo 1994 txog 2022. Nws hais tias nws xav coj nws txoj kev paub hauv pawg tsim cai tuaj rau hauv Pawg Sab Laj Nroog.
“Peb tus nqi ntawm kev ua txhaum cai tam sim no tau dhau qhov tswj tau lawm,” Tarwater hais. “Peb cov kev hauv zej zog, cov kev taug ko taw ntawm ntug kev, cov kev loj — tag nrho puav leej xav tau kev kho.”
Duncan yog ib tug qub tub rog Army uas tau mus ua rog nyob rau hauv teb chaws Iraq. Tam sim no nws yog tus Thawj Coj Saib Xyuas Hauj Lwm (Administrative Operations Director) ntawm Veterans of Foreign Wars, uas yog ib lub koom haum pab cov qub tub rog uas tsis nrhiav paj ntsig. Duncan tau koom tes txhim kho nrog lub koom haum neeg xauj tsev thoob nroog hu ua KC Tenants tau peb xyoos dhau los no. Nws hais tias txhua tus neeg uas nyob hauv Kansas City tsim nyog tau nyob txuas ntxiv.
“Thaum peb saib cov kev xav tau hauv peb lub nroog, muaj ntau yam yuav daws tsis tau tshwj tsis yog koj muaj ib lub tsev nyob,” Duncan hais. “Muaj cov neeg uas tham txog kev muab neeg tso mus nyob hauv tsev loj cuj thiab qhov ntawd tsis zoo li yog qhov yog rau kuv.”
Cov koom haum uas txhawb nqa Duncan muaj xws li KC Tenants Power, uas yog pawg txhawb kev cai lij choj ntawm KC Tenants; ceg koom haum Our Revolution nyob hauv Kansas City; Pro-Choice Missouri; Sierra Club thiab Teamsters Local 41.
Tarwater tau txais kev txhawb nqa los ntawm Fraternal Order of Police, Firefighters Local 42 thiab Northland Strong.
Duncan hais tias lub nroog yuav tsum siv nyiaj pej xeem los txhawb tsev nyob thiab muab xauj kom tus nqi qis dua tus nqi lag luam, es tsis txhob muab nyiaj nroog thiab kev txo se rau cov neeg tsim tsev uas xauj nqi siab ua rau ntau tus neeg nyob hauv nroog them tsis taus.
“Peb yuav tsum tau nqis peev rau hauv peb cov zej zog kom tsim tau cov tsev nyob tiag tiag uas tib neeg muaj peev xwm them taus,” nws hais.
Tarwater hais tias nws txhawb nqa “kev pab neeg kom lawv pab tau lawv tus kheej.”
“Tam sim no peb yuav tsum pab kom cov neeg rov mus ua hauj lwm,” Tarwater hais. “Peb yuav tsum pab kom cov neeg tau ua hauj lwm ntawm ntau qhov chaw tsim kho sib txawv, uas yog cov hauj lwm muaj koom haum neeg ua hauj lwm (union) uas them nyiaj zoo.”
Duncan thiab Tarwater kuj tsis pom zoo ib yam txog kev them nyiaj raws kev ncaj ncees rov qab (reparations) rau cov neeg nyob hauv Kansas City uas yog neeg Dub. Tus Tswv Nroog Quinton Lucas tsis ntev los no tau tsa 15 tus tswv cuab rau hauv Mayor’s Commission on Reparations kom kawm saib kev them nyiaj raws kev ncaj ncees rov qab rau cov neeg Dub uas nyob hauv Kansas City yuav zoo li cas.
“Kuv xav tias thaum koj saib txog kev hloov pauv nyiaj txiag thiab khoom muaj nqis uas tau raug coj tawm ntawm peb cov zej zog neeg Dub, peb yuav tsum tau rov nqis peev rau hauv cov zej zog ntawd,” Duncan hais. “Yog li kuv yuav txhawb nqa kev them nyiaj raws kev ncaj ncees rov qab thiab kev pab nyiaj txhawb ncaj qha rau peb cov zej zog neeg Dub.”
Tarwater tsis tau tawm suab txhawb nqa kev them nyiaj ncaj qha rau cov neeg nyob hauv nroog uas yog neeg Dub.
“Kuv xav tias koj pab tau los ntawm kev qhia ib tug neeg kom paub nuv ntses es tsis yog muab ntses rau lawv, yog li kuv xav ua hauj lwm txog qhov no los ntawm kev qiv nyiaj nqi pheej yig thiab lwm yam uas pab tau lawv kom pib tau ib lub lag luam ntawm lawv tus kheej,” nws hais.
Duncan hais tias lub nroog yuav tsum nqis peev rau cov kev pab cuam hauv zej zog ntau dua es tsis yog tsev loj cuj. Kansas City tam sim no tab tom sib tham seb puas yuav siv $1.5 lab los tsim qauv ib lub tsev loj cuj tshiab hauv nroog.
Duncan tsis xav kom lub tuam tsev tub ceev xwm ntiav tub ceev xwm ntxiv, thiab nws ntseeg tias lub nroog yuav tsum muab nyiaj pab rau cov hauj lwm uas tsom ntsoov rau cov hauv paus uas ua rau muaj kev ua txhaum cai. Nws txhawb kom rov muaj txoj cai uas yuav tsum kom cov tub ceev xwm KCPD nyob hauv Kansas City; Board of Police Commissioners tau tso ib txoj cai xyoo tas los uas tso cai rau cov tub ceev xwm KCPD nyob hauv Kansas.
“Peb xav tau cov hauj lwm uas muaj nyiaj hli txaus ua neej zoo. Peb xav tau tsev nyob,” Duncan hais. “Yog vim li ntawd kuv thiaj koom nrog KC Tenants – vim kev muab tsev nyob thiab tsev nyob nqi pheej yig tiag tiag thiab kev ua kom peb cov zej zog ruaj khov yog kev tiv thaiv kev ua phem. Peb cov zej zog xav tau txoj hauv kev ntau ntxiv.”
Tarwater hais tias KCPD xav tau tub ceev xwm ntau ntxiv. Nws hais tias nws tsis txhawb txoj cai yuav tsum nyob hauv nroog vim tias nws nyuaj heev rau kev nrhiav neeg los ua hauj lwm kom txaus.
“Peb yuav tsum muaj cov tub ceev xwm nyob ntawd vim lawv yuav tsum tawm mus saib xyuas kev nyab xeeb,” nws hais. “Peb yuav tsum mus taug kev saib xyuas kev nyab xeeb. Peb tej zaum yuav rov coj kev caij nees saib xyuas kev nyab xeeb rov qab los rau hauv plawv nroog thiab ua kom peb cov txoj kev nyab xeeb dua.”
Lub rooj sawv cev hauv cheeb tsam thib rau, nrog rau lwm 11 lub rooj sawv cev hauv Pawg Sab Laj Nroog tag nrho, yuav muaj kev xaiv tsa rau lub Rau Hli Ntuj hnub tim 20. Cov neeg pov npav hauv Kansas City nyob hauv Jackson County tuaj yeem xyuas lawv txoj kev sau npe ua neeg pov npav thiab nrhiav lawv lub chaw pov npav ntawm lub vev xaib ntawm pawg saib xyuas kev xaiv tsa. Yog tias koj nyob hauv Clay County, mus rau lub vev xaib ntawm Board of Election Commissioners. Cov neeg pov npav hauv Platte County tuaj yeem xyuas ntawm lub vev xaib ntawm Board of Elections.