ဖဲမုၢ်ဘူၣ်နံၤန့ၣ် ပှၤအဂၤ ၂၀၀ ဃၣ်ဃၣ် ပာ်ဖှိၣ်ထီၣ်အသးဖဲ ခဲစၢးစံထံၣ် ဝ့ၢ်ခိၣ်သ့ၣ် လၢတၢ်စးထီၣ်အိးထီၣ် KC Tenants Power, လၢအမ့ၢ် KC Tenants အတၢ်ကရၢကရိဒီပုၢ်ဝဲၢ် လၢအမၤဘၣ် တၢ်မၤနၢၤအါမးအပွဲ စးထီၣ်ဖဲ အအိၣ်ထီၣ်ဝဲဖဲ ၂၀၁၉ နံၣ်န့ၣ်လီၤ.
KC Tenants Power ကပာ်သးလၢ တၢ်ကူၣ်ဘၣ်ကူၣ်သ့ ဒီး တၢ်သူၣ်ထီၣ် ထံရူၢ်ကီၢ်သဲးအစိအကမီၤအဖီခိၣ်န့ၣ်လီၤ.
ပှၤဆီၣ်ထွဲတၢ်တဖၣ်, လၢအါဂၤကူသိးဝဲ KC Tenants ဆ့ဘှီၣ်ဖ့အဘီတဖၣ်န့ၣ်, ကိးပသူထီၣ်တၢ်ဖဲ Ilus Park အပူၤ ဒီး ဖီၣ်ထီၣ်ဝဲလံာ်ဘ့ၣ်တဖၣ် လၢအကွဲးဝဲ “ဟံၣ်လဲအပှ့ၤဒိၣ်တလၢကွံာ်အခၢးလီၤ” ဒီး “ပဝ့ၢ် ပခါဆူညါ” န့ၣ်လီၤ.
ပှၤကတိၤတၢ်တနီၤ ဖဲတၢ်ပာ်ဖှိၣ်ရဲၣ်ကျဲၤအခါ တဲနဲၣ်ဝဲလၢ ကနုာ်လီၤပြၢ လၢ ဝ့ၢ်ကီၣ်စ့ၣ် အဂီၢ် န့ၣ်လီၤ.
Johnathan Duncan, လၢအအိၣ်ဖဲ ကီၢ်ရ့ၣ် ၆ အပူၤန့ၣ်, စံးဝဲလၢ တၢ်သ့ၣ်န့ၣ် “အိၣ်လၢယသးပူၤလီၤတံၢ်လီၤဆဲးလီၤ” ဒီး အဝဲဆီၣ်ထွဲဝဲ “တၢ်ပၢတၢ်ပြးသကိးတၢ်” န့ၣ်လီၤ.
“ယအဲၣ်ဒိးထံၣ် ပဝ့ၢ်အခိၣ်အနၢ်တဖၣ် ဒိကနၣ်ပိာ်ထွဲ ပှၤဂ့ၢ်ဝီလၢ အဃုထၢထီၣ်အဝဲသ့ၣ် လၢကမၤစၢၤအီၤတဖၣ် အတၢ်တီခိၣ်ရိၤမဲလီၤ,” အဝဲစံးဝဲလီၤ. “ဖဲပဝ့ၢ်အခိၣ်အနၢ်တဖၣ် ပာ်ဂၢၢ်ပာ်ကျၢၤ ဝ့ၢ်တၢ်သိၣ်တၢ်သီ တဖၣ် လၢအမၤဟးထီၣ်ကွံာ်ပှၤလၢပလီၢ်အခါ, အဝဲသ့ၣ် ကဘၣ်ဟံးမူဒါလၢ ပှၤသ့ၣ်တဖၣ်န့ၣ်အဖီခိၣ်လီၤ.”
လၢ KC Tenants အတၢ်ကိးပသူတဖၣ်အဖီခိၣ်ဒၣ်လဲာ်, ဖဲလါအီကူးအပူၤ ဝ့ၢ်ကီၣ်စ့ၣ် မၤစှၤလီၤ တၢ်လိၣ်ဘၣ်တဖၣ် လၢပှၤသူၣ်ထီၣ်ဟံၣ်တဖၣ်အဂီၢ် လၢကတ့ထီၣ် ဟံၣ်လၢအပှ့ၤဘၣ်ဒီးပှၤဒိးလဲအိၣ်သ့ ခီဖျိ တၢ်ပာ်ပနီၣ်ဝဲလၢ တၢ်လၢအပှ့ၤဘၣ်န့ၣ် မ့ၢ်ဝဲ ဘူးထီၣ် $1,200 လၢတလါအဂီၢ် လၢဟံၣ်ဒွဲလၢ အိၣ်ဒီးတၢ်မံဒၢးတဒၢး အဂီၢ်န့ၣ်လီၤ.
ခိၣ်နၢ်တဖၣ်လၢ KC Tenants Power အပူၤ စံးဝဲဖဲမုၢ်ဘူၣ်နံၤလၢ ကရူၢ်အံၤ ကရဲၣ်ကျဲၤထီၣ် တၢ်ဒိကနၣ်အတၢ်အိၣ်ဖှိၣ်တဖၣ် ဒီး ကဆီၣ်ထွဲပာ်ဖျါထီၣ် ပှၤနုာ်လီၤပြၢထံရူၢ်ကီၢ်သဲးတဖၣ် ဖဲခါဆူညါ တၢ်ဃုထၢတဖၣ်အပူၤန့ၣ်လီၤ. Denise Brown ကတိၤဖျါထီၣ် အတၢ်ဆီၣ်ထွဲလၢ $50 ကွဲၢ် ဘီၣ်စ့လံာ်အုၣ်သး တၢ်တိာ်ကျဲၤ လၢဝ့ၢ်အ တၢ်သူၣ်ထီၣ်ဟံၣ်ဃီစ့ပာ်ကီၤ အဂီၢ် လၢအကအိၣ်ဖဲ လါနိၣ်ဝ့ဘၢၣ် တၢ်ဖးလံာ်က့အဖီခိၣ်န့ၣ်လီၤ.
လါလၢအပူၤကွံာ်တလါန့ၣ်, ဝ့ၢ်တၢ်ပာ်ဖျါတခါ စံးဝဲလၢ လၢပှၤလိာ်အိၣ်ဟံၣ်ဖိလၢ အန့ၢ်ဘၣ်တၢ်ဟဲနုာ် ၃၀% ဒီးအဖီလာ် လၢတၢ်ဟဲနုာ်ထီရီၤအဖီခိၣ်တဖၣ်အဂီၢ် ဟံၣ်အိၣ်လီၢ် လီၤစှၤဒံးဝဲ ၂၇,၀၀၀ ဒူၣ်န့ၣ်လီၤ.
“ဒ်သိးတၢ်ဖးလၢ ကျိၣ်စ့တၢ်တိာ်ကျဲၤ (bond) အံၤကလဲၤခီဖျိအဂီၢ် ပကလဲၤဒုးသီၣ် ပှၤဟံၣ်ခိၣ် ၂၅,၀၀၀ ဖျၢၣ်အတြဲၤလီၤ,” Brown စံးဝဲဒၣ်လီၤ. “ဖဲပမၤနၢၤတၢ်အခါ, မ်ပကနၢ်ပၢၢ်သကိးဝဲလီၤတံၢ်လီၤဆဲးလၢ, တၢ်အံၤမ့ၢ်ဒၣ် ပှၤဂ့ၢ်ဝီဖိတဖၣ် မၤန့ၢ်ဝဲ ကျိၣ်စ့တဖၣ်အံၤ ဒီး ဘၣ်ဃးတၢ်ကသူအီၤဒ်လဲဉ်န့ၣ် ကဘၣ်မ့ၢ်ဝဲ ပှၤဂ့ၢ်ဝီဖိတဖၣ် အတၢ်ဆၢတဲာ်န့ၣ်လီၤ.”
Daj Moreland တဲဘၣ် ပှၤဂီၢ်မုၢ်လၢ အဝဲအဲၣ်ဒိးအိၣ်ဆိးလၢ ဝ့ၢ်တဖျၢၣ်လၢ အဒိးန့ၢ်ဘၣ် ဟံၣ်အိၣ်လီၢ် လၢတလိၣ်ဟ့ၣ်လီၤ အလဲအပှ့ၤ တုၤလၢ အတၢ်မၤအဘူးအလဲ တဝာ်ဘၣ်န့ၣ်လီၤ.
“ဝ့ၢ်တဖျၢၣ်လၢ ပှၤလၢအအိၣ်ဒီးတၢ်စိတၢ်ကမီၤတဖၣ် မ့ၢ်ပှၤဒ်သိး ယပှၤဘူးပှၤတံၢ်တဖၣ်, ပှၤလၢအအိၣ်မူခီဖျိဘၣ် တၢ်ကီတၢ်ခဲဒ်သိးယၤ ဒီး ပှၤလၢအဒုးတၢ်လၢ ပှၤဂ့ၢ်ဝီဖိ အကလးတဖၣ် လၢအမ့ၢ်ပှၤဒ်သိးယၤ, ဒ်သိးပှၤတဖၣ်အဂီၢ်န့ၣ်လီၤ,” အဝဲစံးဝဲဒၣ်လီၤ. “မုၢ်မဆါတနံၤအံၤ ယဟဲလၢအံၤ မ့ၢ်လၢ ယနာ်လၢ KC Tenants Power ဒုးဘူးထီၣ်ယၤ ဒီးယတၢ်မံမီၢ်န့ၣ် တခီၣ်ကာ်အဃိလီၤ.”
Duncan စံးဝဲလၢ တၢ်ပာ်ဖှိၣ်မၤသကိးတၢ်ဒီး KC Tenants Power န့ၣ် ဟ့ၣ်အီၤ တၢ်မုၢ်လၢ်လီၤ.
“ခဲအံၤန့ၣ်, ယနာ်လၢ ပဝ့ၢ်အံၤ မ့ၢ်ဆဲးလဲၤဒၣ်လၢ ကျဲတဘိအံၤအပူၤန့ၣ်, ဖိသၣ်တဖၣ်လၢ အဒိၣ်ထီၣ်ခဲအံၤန့ၣ် ဖဲအဝဲသ့ၣ် ဒိၣ်တုာ်ခိၣ်ပှဲၤထီၣ်အခါ ကအိၣ်ဆိးက့ၤလၢ ပှၤတဝၢအလီၢ်အကျဲ ဖဲအဝဲသ့ၣ် ဒိၣ်ထီၣ်ဘၣ်ဝဲအပူၤန့ၣ် တန့ၢ်လၢၤဘၣ်. ... ယမုၢ်လၢ်လၢ ပကပာ်ပတုာ် တၢ်အံၤသ့, ဒီး ပှၤကိးဂၤဒဲးလၢ ဝ့ၢ်အံၤအပူၤ, လၢအအဲၣ်ဒိးအိၣ်လၢ ဝ့ၢ်အံၤအပူၤတဖၣ် ကအိၣ်ဒီး အလီၢ်လၢ ကအိၣ်ဆိးဝဲအဂီၢ်န့ၣ်လီၤ,” အဝဲစံးဝဲဒၣ်လီၤ.
KC Tenants န့ၣ် တၢ်ဒုးအိၣ်ထီၣ်အီၤဖဲ လါဖ့ၤဘြူၤအါရံၤ ၂၀၁၉ နံၣ်န့ၣ်လီၤ. စးထီၣ်ဖဲန့ၣ်အလီၢ်ခံ, ကရူၢ်အံၤ မၤန့ၢ်တၢ်မၤနၢၤလၢ တၢ်ဒုးလဲၤခီဖျိ ပှၤလိာ်အိၣ်ဟံၣ်ဖိ အခွဲးအယာ်လၢ ကန့ၢ်ဘၣ် ပှၤသ့စိာ်မီ (Right to Counsel), မၤစၢၤမၤယံာ်ထီၣ် တၢ်နီဟးထီၣ်ပှၤလၢဟံၣ် ဖဲတၢ်ဆါသတြိာ် ရၤလီၤအဆၢကတီၢ် ဒီး ပာ်ဖှိၣ်ထီၣ် ကရၢဖိ အါန့ၢ်ဒံး ၄,၃၀၀ ဂၤ လၢဝ့ၢ်ဒီတဖျၢၣ် ကရၢစၢဖှိၣ်အပူၤန့ၣ်လီၤ.
