ခဲစၢးစံထံၣ်, မံၣ်စူရံၣ် (Mo.) — ဖဲ ခဲစၢးစံထံၣ် ကမျၢၢ်ကၠိတဖၣ် (Kansas City Public Schools) အပူၤ ကၠိဖိအါန့ၢ်ဒံး ၇၀၀ ဂၤ ဘၣ်တၢ်ပာ်ဖှိၣ်ထီၣ်အဝဲသ့ၣ်ဒီး ပှၤလီၤကွၢ်လီၤဒိလၢ ပှၤတဝၢအပူၤ ဒ်အမ့ၢ် ဟီၣ်ကဝီၤ အတၢ်နဲၣ်ကျဲဟ့ၣ်ကူၣ်ဟ့ၣ်ဖးတၢ်ရဲၣ်တၢ်ကျဲၤ အတၢ်မၤတကူာ်, လၢအစးထီၣ်အိၣ်ထီၣ်ဝဲ ဖဲအပူၤကွံာ်ခံနံၣ်န့ၣ်လီၤ.
တၢ်ရဲၣ်တၢ်ကျဲၤအံၤ ပာ်ဖှိၣ်ဃာ်ဝဲ ကၠိဖိတဖၣ်ဒီး ပှၤဒိၣ်တုာ်ခိၣ်ပှဲၤလၢ ပှၤတဝၢအပူၤတဖၣ် ဒ်သိးကမၤစၢၤ ထုးန့ၢ်အသး, ဟ့ၣ်ဂံၢ်ဟ့ၣ်ဘါ ဒီးဟံးစုနဲၣ်ကျဲအဝဲသ့ၣ် ဆူတၢ်မၤန့ၢ်မၤထီၣ်ထီလၢ ကၠိပူၤဒီးလၢ အတၢ်အိၣ်မူပူၤအဂီၢ်လီၤ.
"ယအဲၣ်ဒိးမၤစၢၤဟ့ၣ်က့ၤတၢ်," Johnathan Duncan စံးဝဲလီၤ, "ယဘၣ်ဘျုးဘၣ်ဖှိၣ်ဒိၣ်မးလၢ ယအိၣ်ဒီး ပှၤဟ့ၣ်ကူၣ်နဲၣ်ကျဲတၢ် တဂၤလၢယတၢ်အိၣ်မူပူၤ, ပှၤဟ့ၣ်ကူၣ်နဲၣ်ကျဲတၢ် အါဂၤလၢယတၢ်အိၣ်မူပူၤ, လၢအတဲဘၣ်ယၤလၢ ယမၤတၢ်ဂ့ၤန့ၢ်အံၤသ့ ဒီးကိးနံၤဒဲး ယကြၢးဂုာ်ကျဲးစၢးမၤတၢ် လၢအဂ့ၤဒိၣ်ထီၣ်န့ၣ်လီၤ."
တနွံတဘျီ, အဝဲဒီး ကၠိဖိလၢအဝဲဟံးစုနဲၣ်ကျဲအီၤ လၢအမ့ၢ် နွံတီၤကၠိဖိ Rayon Miller န့ၣ် ထံၣ်လိာ်အသးဖဲ Central High School လီၤ. အဝဲသ့ၣ်ခံဂၤ တဲသကိးဘၣ်ဃးဒီး တနံၤအံၤအတၢ်ကဲထီၣ်သး ဒီး Duncan မၤစၢၤဝဲ Miller လၢအကၠိတၢ်မၤတဖၣ်လီၤ.
"ပမ့ၢ်တအိၣ်ဖဲန့ၣ်ဘၣ် ဒီးပမ့ၢ်တဘျၢလီၤပတၢ်ဖဲ ပအိၣ်ပဆိးအလီၢ်ဘၣ်န့ၣ်, ဖဲတၢ်တလဲၤအသးဒ် တၢ်ရဲၣ်ကျဲၤပာ်အသးဘၣ်အခါ ပသးထီၣ်တသ့ဘၣ်," Duncan စံးဝဲလီၤ. "ပမ့ၢ်အဲၣ်ဒိးပာ်ဃုာ်လၢ တၢ်မၤန့ၢ်မၤထီၣ်ထီတဖၣ်အပူၤ ဒီးဘှီဘၣ်က့ၤတၢ်လၢ အကမၣ်တဖၣ်န့ၣ်, ပကဘၣ်မၤစၢၤဟ့ၣ်က့ၤတၢ် ဒီးဘျၢလီၤပတၢ်ဆၢကတီၢ်လၢ ပှၤတဝၢအံၤ အသးစၢ်တဖၣ်အဖီခိၣ် ဒ်သိးကလီၤတံၢ်လၢ အဝဲသ့ၣ် ကဟဲက့ၤ ဒီးဘျၢလီၤက့ၤအတၢ် ကဒီးတဘျီအဂီၢ်လီၤ."
မဟါတနံၣ်န့ၣ်, ကၠိကဝီၤ စးထီၣ်ဝဲ တၢ်ဟူးတၢ်ဂဲၤတခါ လၢကဃုထၢန့ၢ် ပှၤဟ့ၣ်ကူၣ်နဲၣ်ကျဲတၢ် အါထီၣ်အဂီၢ် မ့ၢ်လၢ ကၠိဖိအဂၤ ၆၀၀ ဃၣ်ဃၣ် အိၣ်ခိးဝဲလၢ တၢ်ကပာ်ဖှိၣ်အဝဲသ့ၣ်ဒီး ပှၤဟ့ၣ်ကူၣ်နဲၣ်ကျဲတၢ် အဃိလီၤ.
ပှၤတဂၤဂၤလၢ အအဲၣ်ဒိးကဲထီၣ် ပှၤဟ့ၣ်ကူၣ်နဲၣ်ကျဲတၢ်န့ၣ် ကဘၣ်ပတံထီၣ်လၢ အ့ထၢနဲးအဖီခိၣ်, ထီၣ်တၢ်သိၣ်လိလၢ အယံာ်ခံနၣ်ရံၣ်တဘျီ ဒီးမၤပှဲၤ တၢ်သမံသမိးကွၢ် တၢ်အိၣ်မူအတၢ်စံၣ်စိၤတဲစိၤလီၤ.