KANSAS CITY, MO — Neighborhood Planning Committee tau pom zoo ib tsab cai kom paub tseeb tias yog cov neeg pov npav pom zoo rau kev qiv nyiaj (bond issue) $50 lab dollars, cov nyiaj ntawd yuav raug xa mus rau Lub Hnab Nyiaj Pab Tsev Nyob
Lus Nug 2 ntawm daim npav xaiv tsa lub Kaum Ib Hlis hauv KCMO nug cov neeg pov npav kom pom zoo rau kev tso tawm $50 lab dollars nyiaj qiv (general obligation bonds) los muab nyiaj pab tsev nyob nqi pheej yig thiab tshem tawm cov vaj tse thiab thaj chaw uas puas tsuaj.
Neighborhood Planning Committee tau pom zoo ib tsab cai uas yuav lav tias cov nyiaj ntawd yuav raug xa mus rau Lub Hnab Nyiaj Pab Tsev Nyob.
Cov tswv cuab ntawm KC Tenants tau qhia lawv cov dab neeg thiab kev nyuaj siab ntawm lub neej uas raug kev tsis muaj tsev nyob thiab tsev nyob nqi kim dhau uas tsis muaj nyiaj them ua rau puas tsuaj.
“Tsis ntev tom qab ntawd, kuv pom kuv tus kheej tsis muaj tsev nyob thiab mus thov pw ntawm lwm tus tsev lub rooj zaum ntev tau 6 lub hlis ua ntej kuv yuav tsis muaj nyiaj xauj tsev chav nyob hauv midtown ntxiv lawm,” ib tug tswv cuab ntawm KC Tenants tau hais rau cov tswv cuab hauv Pawg Sab Laj.
Tsab cai ntawd tau raug pom zoo los ntawm txhua tus.
“Ua ke peb tuaj yeem xyuas kom txhua tus neeg hauv peb lub nroog muaj tsev nyob, muaj zaub mov noj, thiab tau txais cov kev pab uas tsim nyog kom muaj lub neej noj qab nyob zoo, nyab xeeb thiab muaj kev zoo siab,” ib tug tswv cuab ntawm KC Tenants tau hais.
Tus tswv cuab hauv Pawg Sab Laj Melissa Robinson thiab cov thawj coj ntawm KC Tenants hais tias cov nyiaj no, yog tias tau txais kev pom zoo, yuav pab cov neeg uas muaj nyiaj tau los nyob ntawm lossis qis dua 30% ntawm Area Median Income kom nrhiav tau tsev nyob uas lawv muaj peev xwm them tau.
“Daim ntawv txiav txim siab hnub no qhia meej thiab lav tias $50 lab dollars yuav mus rau tsev nyob nqi pheej yig tiag tiag,” Johnathan Duncan, ib tug thawj coj ntawm KC Tenants tau hais.
“Qhov thib ob yog tias cov nyiaj yuav mus rau hauv Lub Hnab Nyiaj Pab Tsev Nyob tiag tiag, nws yuav tsis raug siv rau lwm yam kev xav tau hauv nroog tab sis nws yuav raug teev tseg rau peb Lub Hnab Nyiaj Pab Tsev Nyob,” tus tswv cuab hauv Pawg Sab Laj Cheeb Tsam 3 Melissa Robinson tau hais.
Tus tswv cuab hauv Pawg Sab Laj Nroog Melissa Robinson thiab cov thawj coj ntawm KC Tenants hais tias cov nyiaj no yuav pab muab tsev nyob rau cov neeg uas muaj nyiaj tau los nyob ntawm lossis qis dua 30% ntawm Area Median Income.
“Yog saib cov neeg uas khwv tau nyiaj kwv yees li $18,000 dollars ib xyoo lossis ib ncig ntawd, lawv khwv tsis tau nyiaj txaus kom tau txais nyiaj pab lossis tsev nyob uas muaj nyiaj pab los ntawm Housing Authority,” tus tswv cuab hauv Pawg Sab Laj Robinson tau hais. "Tiam sis lawv kuj them tsis taus nqi xauj tsev raws li nqi lag luam, yog li peb tab tom saib cov neeg uas muaj peev xwm them tau kwv yees li $600 dollars lossis ib ncig ntawd rau ib chav tsev xauj (apartment).”
Duncan, ntawm KC Tenants, tau hais ntxiv tias 30 feem pua AMI, uas rau feem ntau cov neeg uas tsis paub, yog kwv yees li $500 dollars rau tsev muaj ib chav pw piv rau 60 feem pua AMI uas yog $1,200 dollars rau tsev muaj ib chav pw," Duncan hais. "Qhov no thiaj yog tsev nyob nqi pheej yig tiag tiag,” Duncan hais.
Cov thawj coj ntawm KC Tenant thiab tus tswv cuab hauv Pawg Sab Laj Robinson qhia rau KSHB 41 News tias kev xa daim ntawv txiav txim siab no mus rau Pawg Sab Laj Nroog yog thawj kauj ruam zoo heev rau kev daws qhov teeb meem tsev nyob.
“Yog peb muaj cov neeg uas ua hauj lwm, uas nyob, uas tsim tau txiaj ntsig hauv lub nroog no, ces peb muaj ib lub nroog uas muaj zog dua thiab yog li ntawd qhov no yog ib qho kev xav tau loj thiab tob heev uas peb yuav tsum muab tso ua qhov tseem ceeb ua ntej.” Tus tswv cuab hauv Pawg Sab Laj Robinson tau hais.