ခဲစၢးစံထံၣ် ကသူဝဲ ဒီလၣ် ၁၆ ကကွဲၢ် လၢကက့ၤဘှီဘၣ်သူ ပူၤလီၢ်ဝဲၤကျိၤအဝဲၤလီၢ်ခိၣ်သ့ၣ် တကူာ် ဒ်တၢ်ဖီၣ်ဃာ်အလီၢ်တခါအသိးအဂီၢ်, ဝ့ၢ်ကီၣ်စ့ၣ် ဟ့ၣ်တၢ်ဖးဖဲ မုၢ်လ့ၤဧိၤအနံၤန့ၣ်လီၤ.
ဝ့ၢ်တၢ်သိၣ်တၢ်သီ အံၤ ဘၣ်တၢ်တူၢ်လိာ်အီၤလၢ တၢ်ဖး ၁၂-၁ န့ၣ်လီၤ.
ဝ့ၢ်ကီၣ်စ့ၣ် ပှၤဘၣ်မူဘၣ်ဒါ Johnathan Duncan ထီဒါဝဲတၢ်ရဲၣ်တၢ်ကျဲၤအံၤ, ဒီးကိးဝဲတၢ်ဟ့ၣ်တၢ်ဖးအံၤလၢအမ့ၢ် “တၢ်ဆၢတဲာ်လၢတၢ်မၤအီၤချ့ချ့သဒံး” ဖဲစိၤၡၢၣ်မံဒံယါ အဖီခိၣ်န့ၣ်လီၤ.
ဝ့ၢ်တၢ်သိၣ်တၢ်သီ အံၤ ဘၣ်တၢ်ဒုးဟူထီၣ်သါလီၤအီၤ ဖဲတၢ်ဟုၣ်န့ၢ်ဘျ့န့ၢ်တၢ်ဖဲ မုၢ်ကျိၤဝဲၤကွာ်တၢ်လီၢ်တဖၣ် လၢပှၤသ့ၣ်ညါအါထီၣ်အလီၢ်ခံ ဒီးကျိတၢ်စုဆူၣ်ခီၣ်တကး လၢအဆဲးကဲထီၣ်ဒီး မၤဘၣ်ဒိဘၣ်ထံးဝဲဝ့ၢ်အံၤ အဃိန့ၣ်လီၤ.
“တၢ်ဆီၣ်သနံးအိၣ်ဝဲလၢ ကဘၣ်မၤတၢ်တမံၤမံၤ, ဘၣ်ဆၣ် တၢ်သူၣ်ထီၣ်တၢ်လီၢ်အံၤ တမၤဘှါရှဲဝဲ တၢ်ဂ့ၢ်ကီသ့ၣ်တဖၣ်န့ၣ် နီတမံၤဘၣ် ဒီးကပာ်ဝဲ ပှၤလၢတမၤတၢ်စုဆူၣ်ခီၣ်တကးတဖၣ် ဒီးပှၤလၢဟံၣ်ဃီတအိၣ်တဖၣ်န့ၣ်လီၤ,” Duncan ပာ်ထီၣ်ဝဲလီၤ. “ကိးနံၣ်ဒဲးန့ၣ် ပသူလီၤစ့ အကကွဲၢ်လၢအကယၤတဖၣ် လၢတၢ်မၤလိာ်ထီၣ်သဲစးအဂီၢ် ဒီးပသူလီၤထဲ စ့အနီၢ်ဖးဖိတစဲး လၢတၢ်ဒီတဒၢအဂီၢ်န့ၣ်လီၤ. တၢ်အံၤမ့ၢ်ဝဲ တၢ်တတီတလိၤဘၣ်န့ၣ်လီၤ.”
Kansas City Police Department (ခဲစၢးစံထံၣ် ပူၤလံးဝဲၤကျိၤ) ဘၣ်တၢ်နီၤလီၤဟ့ၣ်အီၤစ့ ဒီလၣ် 317 ကကွဲၢ် လၢ ၂၀၂၄-၂၀၂၅ စ့တၢ်ရဲၣ်တၢ်ကျဲၤအနံၣ် အဂီၢ်န့ၣ်လီၤ.
မဟါန့ၣ် ကီၣ်စ့ၣ် ဟ့ၣ်တၢ်ဖးလၢ ကသူလီၤစ့ ဒီလၣ် 16 ကကွဲၢ် လၢကဘှီဂ့ၤထီၣ်က့ၤ KCPD HQ (ခဲစၢးစံထံၣ် ပူၤလံးဝဲၤကျိၤ ဝဲၤလီၢ်ခိၣ်သ့ၣ်) ဒ်သိးကကဲထီၣ် တၢ်ဖီၣ်ပာ်ပှၤအလီၢ်တခါအဂီၢ်န့ၣ်လီၤ. တၢ်ဆၢတဲာ်လၢတၢ်မၤအီၤချ့ချ့သဒံးအံၤ ဘၣ်တၢ်မၤအီၤ လၢတၢ်တသ့ၣ်ညါ တၢ်မၤတၢ် ဒီး တၢ်ကွၢ်ထွဲပာ်ဂ့ၤတၢ် အတၢ်လၢာ်ဘူၣ်လၢာ်စ့ၤဘၣ် ဒီးကပာ်ဖှိၣ်အါထီၣ်စ့ ဒီလၣ် 2 ကကွဲၢ် ဆူ KCPD စ့တၢ်ရဲၣ်တၢ်ကျဲၤ အပူၤ လၢပူၤလံးအပှၤမၤတၢ်ဖိ အါထီၣ် ၄၀ ဂၤ လၢကမၤတၢ်ဖဲ တၢ်လီၢ်အံၤအဂီၢ်လီၤ- ယ ဟ့ၣ်တၢ်ဖးလၢ တတူၢ်လိာ်ဘၣ်. — Johnathan Duncan (@JDuncanKC) စဲးပထ့ဘၢၣ် ၂၀ သီ, ၂၀၂၄ နံၣ်
တၢ်သူၣ်ထီၣ် တၢ်လၢာ်ဘူၣ်လၢာ်စ့ၤ လၢပှၤလၢဘၣ်တၢ်ဖီၣ်အီၤ တၢ်ကွဲးနုာ်အမံၤအလီၢ်အဂီၢ် ကဘၣ်တၢ်ဟ့ၣ်လီၤအီၤလၢ Public Safety Sales Tax Fund (ကမျၢၢ်တၢ်ဘံၣ်တၢ်ဘၢ တၢ်ဆါတၢ်ပှ့ၤအခိအသွဲ စ့ပာ်ကီၤ) ဒီး General Debt and Interest Fund (တၢ်ကမၢ်ဒီးအ့ၣ်ထရဲး စ့ပာ်ကီၤလီၢ်ခိၣ်သ့ၣ်) အပူၤ, ဒ်ဝ့ၢ်ပှၤဘၣ်မူဘၣ်ဒါ စံးဝဲအသိးန့ၣ်လီၤ. ဘၣ်ဆၣ်, တၢ်လၢာ်ဘူၣ်လၢာ်စ့ၤတဖၣ် လၢတၢ်ကပာ်ပှၤမၤတၢ်ဖိ ဒီးတၢ်ကမၤတၢ်ဖဲ ဃိာ် အပူၤအဂီၢ်န့ၣ် တဖျါရှဲဒံးဘၣ်.
Board of Police Commissioners (ပူၤလံးခီမံၡ့ၣ်နၢ် ကမံးတံာ်ကရူၢ်) ကလိၣ်ဘၣ် အၢၣ်လီၤတူၢ်လိာ် တၢ်တိာ်ကျဲၤအံၤလီၤ, Sgt. Phil DiMartino လၢအမ့ၢ် ပူၤလံးဝဲၤကျိၤ အပှၤကတိၤတၢ်ပၢ အခၢၣ်စး စံးဝဲန့ၣ်လီၤ.
ပှၤဘၣ်မူဘၣ်ဒါတဖၣ် ဖဲ Board of Police Commissioners (ပူၤလံးခီမံၡ့ၣ်နၢ် ကမံးတံာ်ကရူၢ်) တၢ်အိၣ်ဖှိၣ် ဖဲလါအံၤအခီၣ်ထံးခါ စံးဝဲလၢ အဝဲသ့ၣ် မုၢ်လၢ်ဝဲလၢ တၢ်သူၣ်ထီၣ်အံၤ ကဝံၤဝဲ ဘၣ်ဆၢဘၣ်ကတီၢ်လၢ FIFA World Cup အဂီၢ်န့ၣ်လီၤ. ခဲစၢးစံထံၣ် ကတူၢ်လိာ်မၤဝဲ တၢ်လိာ်ခိၣ်လိာ်ကွဲ သူဘျီ လၢကစးထီၣ်ဝဲဖဲ လါယူၤ ၂၀၂၆ နံၣ်အပူၤန့ၣ်လီၤ.
ပူၤလံးဝဲၤလီၢ်ခိၣ်သ့ၣ် တၢ်ဘ့ၣ်ခိၣ် အဘ့ၣ်ဃိးတဘ့ၣ် ဖဲ 11th ဒီး Locust အလီၢ်န့ၣ် ကပာ်ပှၤသ့တုၤလၢ ၁၄၄ ဂၤ, လၢအပာ်ဃုာ်ဒီး လီၢ်မံလၢတၢ်မံတနၤအဂီၢ် ၅၅ ခါန့ၣ်လီၤ.
ဖဲတၢ်ဖီၣ်န့ၢ်ပှၤဂီၢ်မုၢ်ဝံၤအလီၢ်ခံ တၢ်ကဖီၣ်ဃာ်အီၤဖဲန့ၣ် တုၤလၢ ၇၂ နာ်ရံၣ်န့ၣ်လီၤ.
ဖဲ လါစဲးပထ့ဘၢၣ် ၁၀ သီ, ကျိၣ်စ့, တၢ်ပၢတၢ်ပြး ဒီး ကမျၢၢ်တၢ်ဘံၣ်တၢ်ဘၢ ကမံးတံာ် အတၢ်အိၣ်ဖှိၣ်လီၤဆီအပူၤန့ၣ် ပှၤတဝၢဖိတနီၤ ပာ်ဖျါထီၣ်အတၢ်ဆီၣ်ထွဲ လၢတၢ်ကဟ့ၣ်တၢ်စံၣ်ညီၣ်အနး ဒ်သိးပှၤလၢအမၤကမၣ်သဲစးတဖၣ် ကဘၣ်တူၢ်ဘၣ်အဂီၢ်န့ၣ်လီၤ. ပှၤအဂၤတဖၣ်စံးဝဲဒၣ် အဝဲသ့ၣ်အဲၣ်ဒိးလၢ အဝဲသ့ၣ်အတၢ်ခိတၢ်သွဲအစ့တဖၣ် တၢ်ကသူအီၤလၢ တၢ်လိၣ်ဘၣ်တဖၣ် ဒ်အမ့ၢ် တၢ်အိၣ်တၢ်ဆိးအလီၢ်, သးတၢ်အိၣ်ဆူၣ်အိၣ်ချ့ ဒီး တၢ်ဖံးတၢ်မၤတဖၣ်အဂီၢ် ဒီး တမ့ၢ်လၢ ဃိာ်အတၢ်တိာ်ကျဲၤအဂီၢ်ဘၣ်န့ၣ်လီၤ.
ပှၤပၢၤကီၢ်ဝဲၤကျိၤ အိၣ်ဒီး တၢ်ဖီၣ်ဃာ်ပှၤ ဒီး တၢ်ကွဲးနုာ်မံၤ အလီၢ်ခိၣ်သ့ၣ်တခါ တုၤလီၤလၢ တၢ်က့ၤပာ်တံာ်ကွံာ်အီၤဖဲ ၂၀၁၅ နံၣ်န့ၣ်လီၤ. ဝ့ၢ်ပူၤတၢ်ခိးကွၢ်တၢ်ဝဲၤဒ့န့ၣ် ဖီၣ်ဃာ်ပှၤန့ၢ်တုၤလၢ ၁၈ ဂၤန့ၣ်လီၤ. ပှၤလၢတၢ်ဖီၣ်န့ၢ်အီၤတနီၤန့ၣ် တၢ်ဆှၢအီၤဆူ တၢ်ဖီၣ်ဃာ်အလီၢ်ခိၣ်သ့ၣ်တဖၣ် လၢအအိၣ်ဖဲ Johnson ဒီး Vernon ကီၢ်ရ့ၣ်တဖၣ် လၢကီၢ်စဲၣ် Missouri အပူၤန့ၣ်လီၤ, အဂ့ၢ် ပှၤပၢၤကီၢ်ခိၣ် Alayna Gonzalez လၢအမ့ၢ် KCPD အပှၤကတိၤတၢ်ပၢ န့ၣ် တဲဘၣ် The Star လၢညါန့ၣ်လီၤ.
တၢ်ဖီၣ်ဃာ်အလီၢ်ခိၣ်သ့ၣ်အံၤ ကမ့ၢ်တၢ်လၢအပာ်ဖှိၣ်အါထီၣ်ဒီး တၢ်ဟ့ၣ်ကူၣ်ဟ့ၣ်ဖးလၢ ခဲစၢးစံထံၣ် ဝ့ၢ်ပူၤအဃိာ်အသီတဖျၢၣ် လၢတၢ်ရဲၣ်ကျဲၤပာ်အီၤလၢ အကအိၣ်ဒီး လီၢ်မံအခိၣ် ၂၅၀ ဃၣ်ဃၣ်န့ၣ်လီၤ. Jackson County တ့ထီၣ်စ့ၢ်ကီး ဃိာ်အသီတဖျၢၣ် လၢအလုၢ်အပှ့ၤအိၣ်ဝဲ အါန့ၢ်ဒံး ဒီလာ ၃၀၀ မံလယၢၣ်န့ၣ်လီၤ.