Kansas City yuav siv $16 lab los hloov ib feem ntawm lub tuam tsev tub ceev xwm lub chaw hauj lwm loj kom ua ib lub chaw rau kev kaw neeg, Pawg Sab Laj Nroog tau pov npav rau hnub Thursday.
Txoj cai hauv nroog tau pom zoo 12-1.
Tus tswv cuab hauv Pawg Sab Laj Nroog Johnathan Duncan tau tawm tsam txoj cai no, thiab nws tau hais hauv social media tias qhov kev pov npav no yog ib qho “kev txiav txim siab maj dhau”.
Txoj cai hauv nroog no tau raug tso tawm tom qab muaj ntau qhov kev nyiag khoom loj hauv cov chaw lag luam uas neeg paub txog thiab kev tua phom ua phem uas tseem ua rau lub nroog muaj teeb meem.
“Muaj kev kub ntxhov kom peb ua ib yam dab tsi, tab sis lub tsev kaw neeg no yuav daws tsis tau ib yam ntawm cov teeb meem ntawd hlo li thiab tsuas yuav coj cov neeg tsis tau ua phem ntaus neeg & cov neeg tsis muaj tsev nyob los kaw cia xwb,” Duncan tau tshaj tawm. “Txhua xyoo peb siv nyiaj ntau pua lab rau kev tswj kev cai lij choj thiab siv ib feem me me ntawm qhov ntawd rau kev tiv thaiv xwb. Qhov no yog ib qho kev tsis ncaj ncees.”
Kansas City Police Department tau txais nyiaj $317 lab rau xyoo nyiaj txiag 2024-2025.
Nag hmo Pawg Sab Laj tau pov npav siv $16 lab los kho KCPD HQ kom ua ib lub chaw kaw neeg. Qhov kev txiav txim siab maj dhau no tau ua yam tsis paub txog cov nqi ua hauj lwm & kev tu thiab yuav ntxiv $2 lab rau KCPD kev siv nyiaj txiag rau 40 tus tub ceev xwm ntxiv los ua hauj lwm hauv lub chaw no- Kuv tau pov npav tsis pom zoo. — Johnathan Duncan (@JDuncanKC) Lub Cuaj Hli 20, 2024
Raws li lub nroog hais, tus nqi tsim kho rau lub chaw sau npe kaw neeg yuav them los ntawm Public Safety Sales Tax Fund thiab General Debt and Interest Fund. Txawm li cas los xij, cov nqi los ntiav neeg ua hauj lwm thiab tswj hwm lub tsev loj cuj tseem tsis tau paub meej.
Board of Police Commissioners yuav tsum tau pom zoo rau txoj hauj lwm no, Sgt. Phil DiMartino, tus neeg hais lus rau chaw hauj lwm tub ceev xwm tau hais.
Cov thawj coj ntawm lub rooj sib tham ntawm Board of Police Commissioners thaum lub hli no pib tau hais tias lawv cia siab tias kev tsim kho yuav ua tiav raws sij hawm rau FIFA World Cup. Kansas City yuav tuav rau qhov kev sib tw pib thaum Lub Rau Hli 2026.
Lub tsev pem teb thib yim ntawm lub tsev hauj lwm loj ntawm tub ceev xwm ntawm 11th thiab Locust yuav muaj chaw txaus tuav tau 144 tus neeg, suav nrog 55 lub txaj pw hmo ntuj.
Cov neeg yuav raug kaw cia rau ntawd mus txog li 72 teev tom qab raug ntes.
Hauv ib lub rooj sib tham tshwj xeeb ntawm pawg saib xyuas nyiaj txiag, kev tswj hwm thiab kev nyab xeeb rau pej xeem thaum Lub Cuaj Hli hnub tim 10, qee cov neeg hauv zej zog tau tawm suab txhawb kom muaj txim hnyav dua rau cov neeg uas ua txhaum cai. Lwm cov neeg hais tias lawv xav kom lawv cov nyiaj se coj mus siv rau cov kev pab cuam xws li tsev nyob, kev kho mob hlwb thiab hauj lwm, es tsis txhob siv rau txoj hauj lwm ua lub tsev loj cuj.
Lub chaw hauj lwm tub ceev xwm yav tas los muaj ib lub chaw kaw neeg thiab sau npe neeg raug ntes hauv plawv nroog txog thaum nws kaw rau xyoo 2015. Lub chaw tub ceev xwm saib xyuas hauv nroog (metro patrol division) muaj chaw kaw tau 18 tus neeg. Qee cov neeg uas raug ntes raug xa mus rau cov chaw kaw neeg hauv Johnson thiab Vernon counties hauv Missouri, raws li Officer Alayna Gonzalez, uas yog tus cev lus rau KCPD, tau hais qhia rau The Star ua ntej no.
Lub chaw kaw neeg no yuav yog ib qho ntxiv rau lub tswv yim thov tsim ib lub tsev loj cuj tshiab rau lub nroog Kansas City, uas tau npaj tseg kom muaj li 250 lub txaj. Jackson County kuj tab tom tsim ib lub tsev loj cuj tshiab uas raug nqi ntau tshaj $300 million.